Tarboan si Lot di hamusuon ni halak Sodom 1-12. ᯖᯒ᯲ᯅᯬᯀᯉ᯲ ᯘᯪ ᯞᯖᯬ᯲ ᯑᯪ ᯂᯔᯮᯘᯮᯀᯉᯬ᯲ ᯉᯪ ᯂᯞᯄ᯦᯲ ᯘᯬᯑᯔᯬ᯲ ᯘᯑ – ᯘᯔ᯲ᯇᯮᯞᯮ ᯑᯮᯀ
Si Abram paluahon ibana 13-16. ᯘᯪ ᯀᯅ᯲ᯒᯔ᯲ ᯇᯞᯮᯀᯂᯉᯬ᯲ ᯤᯅᯉ ᯘᯔ᯲ᯇᯮᯞᯮ ᯖᯬᯞᯮ – ᯘᯔ᯲ᯇᯮᯞᯮ ᯀᯬᯉᯔᯬ᯲
Si Melkisedek manabe jala mamasumasu si Abram 17-24. ᯘᯪ ᯔᯞᯩ᯲ᯄ᯦ᯪᯘᯩᯑᯄᯩ᯦᯲ ᯔᯉᯅᯩ ᯐᯞ ᯔᯔᯘᯮᯔᯘᯮ ᯘᯪ ᯀᯅ᯲ᯒᯔ᯲ ᯘᯔ᯲ᯇᯮᯞᯮ ᯇᯪᯖᯮ – ᯑᯮᯀᯇᯮᯞᯮ ᯀᯬᯇᯖ᯲
Tarboan si Lot di hamusuon ni halak Sodom 1-12. ᯖᯒ᯲ᯅᯬᯀᯉ᯲ ᯘᯪ ᯞᯖᯬ᯲ ᯑᯪ ᯂᯔᯮᯘᯮᯀᯉᯬ᯲ ᯉᯪ ᯂᯞᯄ᯦᯲ ᯘᯬᯑᯔᯬ᯲ ᯘᯑ – ᯘᯔ᯲ᯇᯮᯞᯮ ᯑᯮᯀ
I. 1 Dung i di angka ari uju si Amrapel raja ni Sinear, Ariok raja ni Ellasar, Kedor-Laomor raja ni Elam dohot Tidal raja ni angka bangso parbegu. ᯑᯮᯰ ᯤ ᯑᯪ ᯀᯰᯄ᯦ ᯀᯒᯪ ᯥᯐᯮ ᯘᯪ ᯀᯔ᯲ᯒᯇᯞᯩ᯲ ᯒᯐ ᯉᯪ ᯘᯪᯉᯩᯀᯒ᯲, ᯀᯒᯪᯀᯄ᯦ᯬ᯲ ᯒᯐ ᯉᯪ ᯀᯞᯩ᯲ᯞᯘᯒ᯲, ᯄᯩ᯦ᯑᯒᯬ᯲ᯞᯀᯬᯔᯒᯬ᯲ ᯒᯐ ᯉᯪ ᯀᯩᯞᯔ᯲ ᯑᯬᯂᯖᯬ᯲ ᯖᯪᯑᯞ᯲ ᯒᯐ ᯉᯪ ᯀᯰᯄ᯦ ᯅᯰᯘᯬ ᯇᯒ᯲ᯅᯩᯎᯮ
2 Dipungka nasida ma hamusuon tu si Bera raja ni Sodom, dohot tu si Birsa raja ni Gomorra, si Sinab raja ni Adma, dohot tu si Semeber raja ni Zeboim, dohot tu raja sian Bela, i ma Zoar. ᯑᯪᯇᯮᯰᯄ᯦ ᯉᯘᯪᯑ ᯔ ᯂᯔᯮᯘᯮᯀᯉᯬ᯲ ᯖᯮ ᯘᯪ ᯅᯩᯒ ᯒᯐ ᯉᯪ ᯘᯬᯑᯔᯬ᯲, ᯑᯬᯂᯖᯬ᯲ ᯖᯮ ᯘᯪ ᯅᯒᯪ᯲ᯘ ᯒᯐ ᯉᯪ ᯎᯬᯔᯒᯬ᯲ᯒ, ᯘᯪ ᯘᯪᯉᯅ᯲ ᯒᯐ ᯉᯪ ᯀᯑ᯲ᯔ, ᯑᯬᯂᯖᯬ᯲ ᯖᯮ ᯘᯩᯔᯩᯅᯒᯩ᯲ ᯒᯐ ᯉᯪ ᯐᯩᯅᯬᯀᯔᯪ᯲, ᯑᯬᯂᯖᯬ᯲ ᯖᯮ ᯒᯐ ᯘᯪᯀᯉ᯲ ᯅᯩᯞ, ᯤ ᯔ ᯐᯬᯀᯒ᯲
3 Mardomu ma nasida luhut tu rura Siddim, i ma laut sira nuaeng. ᯔᯒ᯲ᯑᯬᯔᯮ ᯔ ᯉᯘᯪᯑ ᯞᯮᯂᯖᯮ᯲ ᯖᯮ ᯒᯮᯒ ᯘᯑᯪ᯲ᯑᯔᯪ᯲, ᯤ ᯔ ᯞᯀᯖᯮ᯲ ᯘᯪᯒ ᯉᯮᯀᯀᯰᯩ
4 Nunga pola sampulu dua taon lelengna dioloi nasida patu tu si Kedor-Laomor, alai pasampulutolutaonhon mangose ma nasida. ᯉᯮᯝ ᯇᯬᯞ ᯘᯔ᯲ᯇᯮᯞᯮ ᯑᯮᯀ ᯖᯀᯉᯬ᯲ ᯞᯩᯞᯰᯩᯉ ᯑᯪᯀᯬᯞᯬᯤ ᯉᯘᯪᯑ ᯇᯖᯮ ᯖᯮ ᯘᯪ ᯄᯩ᯦ᯑᯒᯬ᯲ ᯞᯀᯬᯔᯒᯬ᯲, ᯀᯞᯤ ᯇᯘᯔ᯲ᯇᯮᯞᯮᯖᯬᯞᯮᯖᯀᯉᯬ᯲ᯂᯉᯬ᯲ ᯔᯝᯬᯘᯩ ᯔ ᯉᯘᯪᯑ
5 Jadi pasampuluopattaonhon ro ma si Kedor-Laomor dohot angka raja donganna i dipantaluhon ma halak Repaim di luat Asterot-Karnaim, dohot halak Susim di luat Ham dohot halak Emim, na di adaran Kiriataim. ᯐᯑᯪ ᯇᯘᯔ᯲ᯇᯮᯞᯮᯀᯬᯇᯖ᯲ᯖᯀᯉᯬ᯲ᯂᯉᯬ᯲ ᯒᯬ ᯔ ᯘᯪ ᯄᯩ᯦ᯑᯒᯬ᯲ᯞᯀᯬᯔᯒᯬ᯲ ᯑᯬᯂᯖᯬ᯲ ᯀᯰᯄ᯦ ᯒᯐ ᯑᯬᯝᯉ᯲ᯉ ᯤ ᯑᯪᯇᯉ᯲ᯖᯞᯮᯂᯉᯬ᯲ ᯔ ᯂᯞᯄ᯦᯲ ᯒᯩᯇᯀᯔᯪ᯲ ᯑᯪ ᯞᯮᯀᯖ᯲ ᯀᯘ᯲ᯖᯩᯒᯖᯬ᯲ ᯄ᯦ᯒ᯲ᯉᯀᯔᯪ᯲, ᯑᯬᯂᯖᯬ᯲ ᯂᯞᯄ᯦᯲ ᯘᯮᯘᯔᯪ᯲ ᯑᯪ ᯞᯮᯀᯖ᯲ ᯂᯔ᯲ ᯑᯬᯂᯖᯬ᯲ ᯂᯞᯄ᯦᯲ ᯀᯩᯔᯔᯪ᯲, ᯉ ᯑᯪ ᯀᯑᯒᯉ᯲ ᯄ᯦ᯪᯒᯪᯀᯖᯀᯔᯪ᯲
6 Dohot halak Hori di Seir doloknasida tolhas ro di adaran Elaparan, na marbalokkon halongonan. ᯑᯬᯂᯖᯬ᯲ ᯂᯞᯄ᯦᯲ ᯂᯬᯒᯪ ᯑᯪ ᯘᯩᯀᯒᯪ᯲ ᯑᯬᯞᯄ᯦ᯬ᯲ᯉᯘᯪᯑ ᯖᯞᯬ᯲ᯂᯘ᯲ ᯒᯬ ᯑᯪ ᯀᯑᯒᯉ᯲ ᯀᯩᯞᯇᯒᯉ᯲, ᯉ ᯔᯒ᯲ᯅᯞᯄ᯦ᯬ᯲ᯄ᯦ᯔᯬ᯲ ᯂᯞᯬᯝᯬᯉᯉ᯲
7 Dung i mulak ma nasida ro di mual Eumispat, i ma Kades, jala dipapatu sandok luat ni halak Amalek ro di halak Amori, na maringan di Hazezon-Tamar. ᯑᯮᯰ ᯤ ᯔᯮᯞᯄ᯦᯲ ᯔ ᯉᯘᯪᯑ ᯒᯬ ᯑᯪ ᯔᯮᯀᯞ᯲ ᯀᯩᯥᯔᯘᯪ᯲ᯇᯖ᯲, ᯤ ᯔ ᯄ᯦ᯑᯘᯩ᯲, ᯐᯞ ᯑᯪᯇᯇᯖᯮ ᯘᯉ᯲ᯑᯄ᯦ᯬ᯲ ᯞᯮᯀᯖ᯲ ᯉᯪ ᯂᯞᯄ᯦᯲ ᯀᯔᯞᯄᯩ᯦᯲ ᯒᯬ ᯑᯪ ᯂᯞᯄ᯦᯲ ᯀᯔᯬᯒᯪ, ᯉ ᯔᯒᯪᯝᯉ᯲ ᯑᯪ ᯂᯐᯩᯐᯉᯬ᯲ ᯖᯔᯩ᯲
8 Dung i borhat ma raja ni Sodom dohot raja ni Gomorra dohot raja ni Adma dohot raja ni Zeboim dohot raja ni Bela, i ma Zoar, marodor be ma nasida laho marmusu di rura Siddim. ᯑᯮᯰ ᯤ ᯅᯒᯬ᯲ᯂᯖ᯲ ᯔ ᯒᯐ ᯉᯪ ᯘᯬᯑᯔᯬ᯲ ᯑᯬᯂᯖᯬ᯲ ᯒᯐ ᯉᯪ ᯎᯬᯔᯒᯬ᯲ᯒ ᯑᯬᯂᯖᯬ᯲ᯒᯐ ᯉᯪ ᯀᯑ᯲ᯔ ᯑᯬᯂᯖᯬ᯲ ᯒᯐ ᯉᯪ ᯐᯩᯅᯬᯀᯔᯪ᯲ ᯑᯬᯂᯖᯬ᯲ ᯒᯐ ᯉᯪ ᯅᯩᯞ, ᯤ ᯔ ᯐᯬᯀᯒ᯲, ᯔᯒᯬᯑᯒᯬ᯲ ᯅᯩ ᯔ ᯉᯘᯪᯑ ᯞᯂᯬ ᯔᯒ᯲ᯔᯮᯘᯮ ᯑᯪ ᯒᯮᯒ ᯘᯑᯪ᯲ᯑᯔᯪ᯲
9 Dompak si Kedor-Laomor, raja ni Elam, dohot si Tidal, raja ni angka bangso parbegu, dohot si Amrapel raja ni Sinear, dohot si Ariok raja ni Ellasar; opat raja alo ni na lima i. ᯑᯔᯬ᯲ᯇᯄ᯦᯲ ᯘᯪ ᯄᯩ᯦ᯑᯒᯬ᯲ ᯞᯀᯬᯔᯒᯬ᯲, ᯒᯐ ᯉᯪ ᯀᯩᯞᯔ᯲, ᯑᯬᯂᯖᯬ᯲ ᯘᯪ ᯖᯪᯑᯞ᯲ ᯒᯐ ᯉᯪ ᯀᯰᯄ᯦ ᯅᯰᯘᯬ ᯇᯒ᯲ᯅᯩᯎᯮ, ᯑᯬᯂᯖᯬ᯲ ᯘᯪ ᯀᯔ᯲ᯒᯇᯞᯩ᯲ ᯒᯐ ᯉᯪ ᯘᯪᯉᯩᯀᯒ᯲, ᯑᯬᯂᯖᯬ᯲ ᯘᯪ ᯀᯒᯪᯀᯄ᯦ᯬ᯲ ᯒᯐ ᯉᯪ ᯀᯞᯩ᯲ᯞᯘᯒ᯲ : ᯀᯬᯇᯖ᯲ ᯒᯐ ᯀᯞᯬ ᯉᯪ ᯉ ᯞᯪᯔ ᯤ
10 Alai mansai lan do angka lupaklupak barerang di rura Siddim i. Jadi maporus ma raja ni Sodom dohot Gomorra, angka margunopan ma tusi, ianggo angka na teba i maporus do tu dolok. ᯀᯞᯤ ᯔᯉ᯲ᯘᯤ ᯞᯉ᯲ ᯑᯬ ᯀᯰᯄ᯦ ᯞᯮᯇᯄ᯦᯲ᯞᯮᯇᯄ᯦᯲ ᯅᯒᯩᯒᯰ ᯑᯪ ᯒᯮᯒ ᯘᯑᯪ᯲ᯑᯔᯪ᯲ ᯤ. ᯐᯑᯪ ᯔᯇᯬᯒᯘᯮ᯲ ᯔ ᯒᯐ ᯉᯪ ᯘᯬᯑᯔᯬ᯲ ᯑᯬᯂᯖᯬ᯲ ᯎᯬᯔᯒᯬ᯲ᯒ, ᯀᯰᯄ᯦ ᯔᯒ᯲ᯎᯮᯉᯬᯇᯉ᯲ ᯔ ᯖᯮᯘᯪ, ᯤᯀᯰᯎᯬ ᯀᯰᯄ᯦ ᯉ ᯖᯩᯅ ᯤ ᯔᯇᯬᯒᯘᯮ᯲ ᯑᯬ ᯖᯮ ᯑᯬᯞᯄ᯦ᯬ᯲
11 Jadi dibuat nasida ma sandok ugasan ni Sodom dohot Gomorra, ro di sude sipanganonna, laho ma nasida. ᯐᯑᯪ ᯑᯪᯅᯮᯀᯖ᯲ ᯉᯘᯪᯑ ᯔ ᯘᯉ᯲ᯑᯄ᯦ᯬ᯲ ᯥᯎᯘᯉ᯲ ᯉᯪ ᯘᯬᯑᯔᯬ᯲ ᯑᯬᯂᯖᯬ᯲ ᯎᯬᯔᯒᯬ᯲ᯒ, ᯒᯬ ᯑᯪ ᯘᯮᯑᯩ ᯘᯪᯇᯝᯉᯉᯬ᯲ᯉ, ᯞᯂᯬ ᯔ ᯉᯘᯪᯑ
12 Diboan nasida ma dohot si Lot, anak ni haha ni si Abram, ro di ugasanna, ai di Sodom do ibana maringan, laos laho ma nasida. ᯑᯪᯅᯬᯀᯉ᯲ ᯉᯘᯪᯑ ᯔ ᯑᯬᯂᯖᯬ᯲ ᯘᯪ ᯞᯖᯬ᯲, ᯀᯉᯄ᯦᯲ ᯉᯪ ᯂᯂ ᯉᯪ ᯘᯪ ᯀᯅ᯲ᯒᯔ᯲, ᯒᯬ ᯑᯪ ᯥᯎᯘᯉ᯲ᯉ, ᯀᯤ ᯑᯪ ᯘᯬᯑᯔᯬ᯲ ᯑᯬ ᯤᯅᯉ ᯔᯒᯪᯝᯉ᯲, ᯞᯀᯘᯬ᯲ ᯞᯂᯬ ᯔ ᯉᯘᯪᯑ
Si Abram paluahon ibana 13-16. ᯘᯪ ᯀᯅ᯲ᯒᯔ᯲ ᯇᯞᯮᯀᯂᯉᯬ᯲ ᯤᯅᯉ ᯘᯔ᯲ᯇᯮᯞᯮ ᯖᯬᯞᯮ – ᯘᯔ᯲ᯇᯮᯞᯮ ᯀᯬᯉᯔᯬ᯲
II. 13 Dung i ro sada halak na maporus i, dipaboa ma barita i tu si Abram, halak Heber i, na maringan di tombak Mamre, ginomgom ni si Amori anggi ni si Eskol dohot Aner, angka janji ni si Abram do nasida. ᯑᯮᯰ ᯤ ᯒᯬ ᯘᯑ ᯂᯞᯄ᯦᯲ ᯉ ᯔᯇᯬᯒᯘᯮ᯲ ᯤ, ᯑᯪᯇᯅᯬᯀ ᯔ ᯅᯒᯪᯖ ᯤ ᯖᯮ ᯘᯪ ᯀᯅ᯲ᯒᯔ᯲, ᯂᯞᯄ᯦᯲ ᯂᯩᯅᯒᯩ᯲ ᯤ, ᯉ ᯔᯒᯪᯝᯉ᯲ ᯑᯪ ᯖᯔᯬ᯲ᯅᯄ᯦᯲ ᯔᯔ᯲ᯒᯩ, ᯎᯪᯉᯔᯬ᯲ᯎᯔᯬ᯲ ᯉᯪ ᯘᯪ ᯀᯔᯬᯒᯪ ᯀᯰᯎᯪ ᯉᯪ ᯘᯪ ᯀᯘᯩ᯲ᯄ᯦ᯞᯬ᯲ ᯑᯬᯂᯖᯬ᯲ ᯀᯉᯒᯩ᯲, ᯀᯰᯄ᯦ ᯐᯉ᯲ᯐᯪ ᯉᯪ ᯘᯪ ᯀᯅ᯲ᯒᯔ᯲ ᯑᯬ ᯉᯘᯪᯑ
14 Jadi dung dibege si Abram barita i naung tarboan anakna i, diparsinjatai ma naposona, angka na somal, tolu ratus sampulu ualu halak, angka na tubu di bagasan jabuna, dieak ma musu i tolhas ro di Dan. ᯐᯑᯪ ᯑᯮᯰ ᯑᯪᯅᯩᯎᯩ ᯘᯪ ᯀᯅ᯲ᯒᯔ᯲ ᯅᯒᯪᯖ ᯤ ᯉᯀᯮᯰ ᯖᯒ᯲ᯅᯬᯀᯉ᯲ ᯀᯉᯄ᯦᯲ᯉ ᯤ, ᯑᯪᯇᯒ᯲ᯘᯉᯪ᯲ᯐᯖᯤ ᯔ ᯉᯇᯬᯘᯬᯉ, ᯀᯰᯄ᯦ ᯉ ᯘᯬᯔᯞ᯲ ᯖᯬᯞᯮ ᯒᯖᯘᯮ᯲ ᯘᯔ᯲ᯇᯮᯞᯮ ᯥᯀᯞᯮ ᯂᯞᯄ᯦᯲, ᯀᯰᯄ᯦ ᯉ ᯖᯮᯅᯮ ᯑᯪ ᯅᯎᯘᯉ᯲ ᯐᯅᯮᯉ, ᯑᯪᯀᯩᯀᯄ᯦᯲ ᯔ ᯔᯮᯘᯮ ᯤ ᯖᯞᯬ᯲ᯂᯘ᯲ ᯒᯬ ᯑᯪ ᯑᯉ᯲
15 Dung i disagi ma angka naposona mangarampok musu i bornginna i, jala ditaluhon nasida dung i dilele nasida tolhas ro di Hoba, na tungkan hambirang ni Damaskus. ᯑᯮᯰ ᯤ ᯑᯪᯘᯎᯪ ᯔ ᯀᯰᯄ᯦ ᯉᯇᯬᯘᯬᯉ ᯔᯝᯒᯔ᯲ᯇᯄ᯦ᯬ᯲ ᯔᯮᯘᯮ ᯤ ᯅᯒᯬ᯲ᯝᯉᯪ᯲ᯉ ᯤ, ᯐᯞ ᯑᯪᯖᯞᯮᯂᯉᯬ᯲ ᯉᯘᯪᯑ ᯑᯮᯰ ᯤ ᯑᯪᯞᯩᯞᯩ ᯉᯘᯪᯑ ᯖᯞᯬ᯲ᯂᯘ᯲ ᯒᯬ ᯑᯪ ᯂᯬᯅ, ᯉ ᯖᯮᯰᯄ᯦ᯉ᯲ ᯂᯔ᯲ᯅᯪᯒᯰ ᯉᯪ ᯑᯔᯘ᯲ᯄ᯦ᯘᯮ᯲
16 Jadi mulak ma diboan saluhut ugasan, dohot do si Lot anakna i, ro di ugasanna, angka boruboru dohot halak na torop i mulak diboan. ᯐᯑᯪ ᯔᯮᯞᯄ᯦᯲ ᯔ ᯑᯪᯅᯬᯀᯉ᯲ ᯘᯞᯮᯂᯖᯮ᯲ ᯥᯎᯘᯉ᯲, ᯑᯬᯂᯖᯬ᯲ ᯑᯬ ᯘᯪ ᯞᯖᯬ᯲ ᯀᯉᯄ᯦᯲ᯉ ᯤ ᯒᯬ ᯑᯪ ᯥᯎᯘᯉ᯲ᯉ, ᯀᯰᯄ᯦ ᯅᯬᯒᯮᯅᯬᯒᯮ ᯑᯬᯂᯖᯬ᯲ ᯂᯞᯄ᯦᯲ ᯉ ᯖᯬᯒᯇᯬ᯲ ᯤ ᯔᯮᯞᯄ᯦᯲ ᯑᯪᯅᯬᯀᯉ᯲
Si Melkisedek manabe jala mamasumasu si Abram 17-24. ᯘᯪ ᯔᯞᯩ᯲ᯄ᯦ᯪᯘᯩᯑᯄᯩ᯦᯲ ᯔᯉᯅᯩ ᯐᯞ ᯔᯔᯘᯮᯔᯘᯮ ᯘᯪ ᯀᯅ᯲ᯒᯔ᯲ ᯘᯔ᯲ᯇᯮᯞᯮ ᯇᯪᯖᯮ – ᯑᯮᯀᯇᯮᯞᯮ ᯀᯬᯇᯖ᯲
III. 17 Jadi dung mulak si Abram sian na marporang i dompak si Kedor-Laomor dohot angka raja donganna i, ruar ma raja ni Sodom manomunomu ibana tu rura Sawe i ma rura ni raja i. ᯐᯑᯪ ᯑᯮᯰ ᯔᯮᯞᯄ᯦᯲ ᯘᯪ ᯀᯅ᯲ᯒᯔ᯲ ᯘᯪᯀᯉ᯲ ᯉ ᯔᯒ᯲ᯇᯬᯒᯰ ᯤ ᯑᯔᯬ᯲ᯇᯄ᯦᯲ ᯄᯩ᯦ᯑᯒᯬ᯲ ᯞᯀᯬᯔᯒᯬ᯲ ᯑᯬᯂᯖᯬ᯲ ᯀᯰᯄ᯦ ᯒᯐ ᯑᯬᯝᯉ᯲ᯉ ᯤ, ᯒᯮᯀᯒ᯲ ᯔ ᯒᯐ ᯉᯪ ᯘᯬᯑᯔᯬ᯲ ᯔᯉᯬᯔᯮᯉᯬᯔᯮ ᯤᯅᯉ ᯖᯮ ᯒᯮᯒ ᯘᯋᯩ ᯤ ᯔ ᯒᯮᯒ ᯉᯪ ᯒᯐ ᯤ
18 Alai anggo si Melkisedek, raja ni Salem diboan sagusagu dohot anggur; malim ni Debata na mamunjungi do ibana. ᯀᯞᯤ ᯀᯰᯎᯬ ᯘᯪ ᯔᯞᯩ᯲ᯄ᯦ᯪᯘᯩᯑᯄᯩ᯦᯲, ᯒᯐ ᯉᯪ ᯘᯞᯔᯩ᯲ ᯑᯪᯅᯬᯀᯉ᯲ ᯘᯎᯮᯘᯎᯮ ᯑᯬᯂᯖᯬ᯲ ᯀᯰᯎᯒᯮ᯲ : ᯔᯞᯔᯪ᯲ ᯉ ᯔᯔᯉᯮ᯲ᯐᯮᯝᯪ ᯑᯬ ᯤᯅᯉ
19 Dung i dipasupasu ma si Abram, ninna ma: Na pinasupasu do ho, ale Abram, ditumpak Debata na mamunjungi, sigomgom langit dohot tano on. ᯑᯮᯰ ᯤ ᯑᯪᯇᯘᯮᯇᯘᯮ ᯔ ᯘᯪ ᯀᯅ᯲ᯒᯔ᯲, ᯉᯉᯪ᯲ᯉ ᯔ : ᯉ ᯇᯪᯉᯘᯮᯇᯘᯮ ᯑᯬ ᯂᯬ, ᯀᯞᯩ ᯀᯅ᯲ᯒᯔ᯲, ᯑᯪᯖᯔᯮ᯲ᯇᯄ᯦᯲ ᯑᯩᯅᯖ ᯉ ᯔᯔᯉᯮ᯲ᯐᯮᯝᯪ, ᯘᯪᯎᯔᯬ᯲ᯎᯔᯬ᯲ ᯞᯝᯖᯪ᯲ ᯑᯬᯂᯖᯬ᯲ ᯖᯉᯬ ᯀᯉᯬ᯲
20 Jala pinuji ma Debata na mamunjungi, na pasahathon angka musum tu tanganmu, jadi dilehon si Abram ma tu ibana saparsampulu sian luhutna. ᯐᯞ ᯇᯪᯉᯮᯐᯪ ᯔ ᯑᯩᯅᯖ ᯉ ᯔᯔᯉᯮ᯲ᯐᯮᯝᯪ, ᯉ ᯇᯘᯂᯖ᯲ᯂᯉᯬ᯲ ᯀᯰᯄ᯦ ᯔᯮᯘᯔᯮ᯲ ᯖᯮ ᯖᯝᯉ᯲ᯔᯮ, ᯐᯑᯪ ᯑᯪᯞᯩᯂᯉᯬ᯲ ᯘᯪ ᯀᯅ᯲ᯒᯔ᯲ ᯔ ᯖᯮ ᯤᯅᯉ ᯘᯇᯒ᯲ᯘᯔ᯲ᯇᯮᯞᯮ ᯘᯪᯀᯉ᯲ ᯞᯮᯂᯖᯮ᯲ᯉ
21 Dung i ninna raja ni Sodom i ma mandok si Abram: Nanggo jolma i lehon di ahu, ianggo ugasan i buat ma di ho! ᯑᯮᯰ ᯤ ᯉᯉᯪ᯲ᯉ ᯒᯐ ᯉᯪ ᯘᯬᯑᯔᯬ᯲ ᯤ ᯔ ᯔᯉ᯲ᯑᯄ᯦ᯬ᯲ ᯘᯪ ᯀᯅ᯲ᯒᯔ᯲ : ᯉᯰᯎᯬ ᯐᯞᯬ᯲ᯔ ᯤ ᯞᯩᯂᯉᯬ᯲ ᯑᯪ ᯀᯂᯮ, ᯤᯀᯰᯎᯬ ᯥᯎᯘᯉ᯲ ᯤ ᯅᯮᯀᯖ᯲ ᯔ ᯑᯪ ᯂᯬ
22 Alai ninna si Abram ma tu raja ni Sodom i: Nunga pola maruari ahu tu Jahowa, Debata na mamunjungi, sigomgom langit dohot tano on: ᯀᯞᯤ ᯉᯉᯪ᯲ᯉ ᯘᯪ ᯀᯅ᯲ᯒᯔ᯲ ᯔ ᯖᯮ ᯒᯐ ᯉᯪ ᯘᯬᯑᯔᯬ᯲ ᯤ : ᯉᯮᯝ ᯇᯬᯞ ᯔᯒᯮᯀᯒᯪ ᯀᯂᯮ ᯖᯮ ᯐᯂᯬᯋ, ᯑᯩᯅᯖ ᯉ ᯔᯔᯉᯮ᯲ᯐᯮᯝᯪ, ᯘᯪᯎᯔᯬ᯲ᯎᯔᯬ᯲ ᯞᯝᯖᯪ᯲ ᯑᯬᯂᯖᯬ᯲ ᯖᯉᯬ ᯀᯉᯬ᯲
23 Molo tung hubuat sian nasa na di ho nanggo sada tali ro di ihot ni sipatu, asa unang tardok ho sogot: Ahu do pamora si Abram. ᯔᯬᯞᯬ ᯖᯮᯰ ᯂᯮᯅᯮᯀᯖ᯲ ᯘᯪᯀᯉ᯲ ᯉᯘ ᯉ ᯑᯪ ᯂᯬ ᯉᯰᯎᯬ ᯘᯑ ᯖᯞᯪ ᯒᯬ ᯑᯪ ᯤᯂᯖᯬ᯲ ᯉᯪ ᯘᯪᯇᯖᯮ, ᯀᯘ ᯥᯉᯰ ᯖᯒ᯲ᯑᯄ᯦ᯬ᯲ ᯂᯬ ᯘᯬᯎᯖᯬ᯲ : ᯀᯂᯮ ᯑᯬ ᯇᯔᯬᯒ ᯘᯪ ᯀᯅ᯲ᯒᯔ᯲
24 Holan na pinangan ni angka dolidoli dohot jambar ni si Aner Eskol dohot Mamre, angka na mandongani ahu, itenang dibuat nasida turpuknasida i. ᯂᯬᯞᯉ᯲ ᯉ ᯇᯪᯉᯝᯉ᯲ ᯉᯪ ᯀᯰᯄ᯦ ᯑᯬᯞᯪᯑᯬᯞᯪ ᯑᯬᯂᯖᯬ᯲ ᯐᯔ᯲ᯅᯒ᯲ ᯉᯪ ᯘᯪ ᯀᯉᯒᯩ᯲ ᯀᯘᯩ᯲ᯄ᯦ᯞᯬ᯲ ᯑᯬᯂᯖᯬ᯲ ᯔᯔ᯲ᯒᯩ, ᯀᯰᯄ᯦ ᯉ ᯔᯉ᯲ᯑᯬᯝᯉᯪ ᯀᯂᯮ, ᯤᯖᯩᯉᯰ ᯑᯪᯅᯮᯀᯖ᯲ ᯉᯘᯪᯑ ᯖᯒᯮ᯲ᯇᯄ᯦ᯮ᯲ᯉᯘᯪᯑ ᯤ