Si Abram marjolmahon si Hagar, disosoi si Sarai Halilintun ni si Hagar 1-6. ᯘᯪ ᯀᯅ᯲ᯒᯔ᯲ ᯔᯒ᯲ᯐᯞᯬ᯲ᯔᯂᯉᯬ᯲ ᯘᯪ ᯂᯎᯒ᯲, ᯑᯪᯘᯬᯘᯬᯤ ᯘᯪ ᯘᯒᯤ ᯂᯞᯪᯞᯉᯪ᯲ᯖᯉᯮ᯲ ᯉᯪ ᯘᯪ ᯂᯎᯒ᯲ ᯘᯑ – ᯀᯬᯉᯔᯬ᯲
Diambat surusuruan ni Debata ibana di halongonan. Bagabaga taringot tu si Ismael dohot hatutubuna 7-16. ᯑᯪᯀᯔ᯲ᯅᯖ᯲ ᯘᯮᯒᯮᯘᯮᯒᯮᯀᯉ᯲ ᯉᯪ ᯑᯩᯅᯖ ᯤᯅᯉ ᯑᯪ ᯂᯞᯬᯝᯬᯉᯉ᯲, ᯅᯎᯅᯎ ᯖᯒᯪᯝᯖᯬ᯲ ᯖᯮ ᯘᯪ ᯀᯘᯪ᯲ᯔᯀᯞᯩ᯲ ᯑᯬᯂᯖᯬ᯲ ᯂᯖᯮᯖᯮᯅᯮᯉ
Si Abram marjolmahon si Hagar, disosoi si Sarai Halilintun ni si Hagar 1-6. ᯘᯪ ᯀᯅ᯲ᯒᯔ᯲ ᯔᯒ᯲ᯐᯞᯬ᯲ᯔᯂᯉᯬ᯲ ᯘᯪ ᯂᯎᯒ᯲, ᯑᯪᯘᯬᯘᯬᯤ ᯘᯪ ᯘᯒᯤ ᯂᯞᯪᯞᯉᯪ᯲ᯖᯉᯮ᯲ ᯉᯪ ᯘᯪ ᯂᯎᯒ᯲ ᯘᯑ – ᯀᯬᯉᯔᯬ᯲
I. 1 Alai anggo si Sarai, jolma ni si Abram, ndang adong ditubuhon di ibana; alai adong do sada hatobanna, boru Misir, na margoar si Hagar. ᯀᯞᯤ ᯀᯰᯎᯬ ᯘᯪ ᯘᯒᯤ, ᯐᯞᯬ᯲ᯔ ᯉᯪ ᯘᯪ ᯀᯅ᯲ᯒᯔ᯲, ᯉ᯲ᯑᯰ ᯀᯑᯬᯰ ᯑᯪᯖᯮᯅᯮᯂᯉᯬ᯲ ᯑᯪ ᯤᯅᯉ : ᯀᯞᯤ ᯀᯑᯬᯰ ᯑᯬ ᯘᯑ ᯂᯖᯬᯅᯉ᯲ᯉ, ᯅᯬᯒᯮ ᯔᯪᯘᯒᯪ᯲, ᯉ ᯔᯒ᯲ᯎᯬᯀᯒ᯲ ᯘᯪ ᯂᯎᯒ᯲
2 Dung i ninna si Sarai ma mandok si Abram, boti ma i: Nunga disundati Jahowa ahu mangintubu, ua topot ma hatobanku, anggiat maruli ahu sian ibana. Jadi ditangihon si Abram ma soara ni si Sarai. ᯑᯮᯰ ᯤ ᯉᯉᯪ᯲ᯉ ᯘᯪ ᯘᯒᯤ ᯔ ᯔᯉ᯲ᯑᯄ᯦ᯬ᯲ ᯘᯪ ᯀᯅ᯲ᯒᯔ᯲, ᯅᯬᯖᯪ ᯔ ᯤ : ᯉᯮᯝ ᯑᯪᯘᯉᯮ᯲ᯑᯖᯪ ᯐᯂᯬᯋ ᯀᯂᯮ ᯔᯝᯉᯪ᯲ᯖᯮᯅᯮ, ᯥᯀ ᯖᯬᯇᯖᯬ᯲ ᯔ ᯂᯖᯬᯅᯉ᯲ᯄ᯦ᯮ, ᯀᯰᯎᯪᯀᯖ᯲ ᯔᯒᯮᯞᯪ ᯀᯂᯮ ᯘᯪᯀᯉ ᯤᯅᯉ. ᯐᯑᯪ ᯑᯪᯖᯝᯪᯂᯉᯬ᯲ ᯘᯪ ᯀᯅ᯲ᯒᯔ᯲ ᯔ ᯘᯬᯀᯒ ᯉᯪ ᯘᯪ ᯘᯒᯤ
3 Dung i dibuat si Sarai, jolma ni si Abram i, si Hagar boru Misir i, dilehon ma tu si Abram, sinondukna i bahen jolmana, dung diingani si Abram tano Kanaan i sampulu taon lelengna. ᯑᯮᯰ ᯤ ᯑᯪᯅᯮᯀᯖ᯲ ᯘᯪ ᯘᯒᯤ, ᯐᯞᯬ᯲ᯔ ᯉᯪ ᯘᯪ ᯀᯅ᯲ᯒᯔ᯲ ᯤ, ᯘᯪ ᯂᯎᯒ᯲ ᯅᯬᯒᯮ ᯔᯪᯘᯒᯪ᯲ ᯤ, ᯑᯪᯞᯩᯂᯉᯬ᯲ ᯔ ᯖᯮ ᯘᯪ ᯀᯅ᯲ᯒᯔ᯲, ᯘᯪᯉᯉᯬ᯲ᯑᯄ᯦ᯮ᯲ᯉ ᯤ ᯅᯂᯉᯩ᯲ ᯐᯞᯬ᯲ᯔᯉ, ᯑᯮᯰ ᯑᯪᯤᯝᯉᯪ ᯘᯪ ᯀᯅ᯲ᯒᯔ᯲ ᯖᯉᯬ ᯄ᯦ᯉᯀᯉ᯲ ᯤ ᯘᯔ᯲ᯇᯮᯞᯮ ᯖᯀᯉᯬ᯲ ᯞᯩᯞᯰᯩᯉ
4 Dung i ditopot ma si Hagar i, jadi gabegabean ma ibana. Dung diida naung gabegabean ibana, tingka ma rohana mida soranganna i. ᯑᯮᯰ ᯤ ᯑᯪᯖᯬᯇᯖᯬ᯲ ᯔ ᯘᯪ ᯂᯎᯒ᯲ ᯤ, ᯐᯑᯪ ᯎᯅᯩᯎᯅᯩᯀᯉ᯲ ᯔ ᯤᯅᯉ. ᯑᯮᯰ ᯑᯪᯤᯑ ᯉᯀᯮᯰ ᯎᯅᯩᯎᯅᯩᯀᯉ᯲ ᯤᯅᯉ, ᯖᯪᯰᯄ᯦ ᯔ ᯒᯬᯂᯉ ᯔᯪᯑ ᯘᯬᯒᯝᯉ᯲ᯉ ᯤ
5 Dung i ninna si Sarai ma tu si Abram: Marsapata tu ho do ahu! Hulehon hatobanku parjolmaonmu, hape dung diida naung gabegabean ibana, gabe pis matana mida ahu. Jahowa ma manguhum hita. ᯑᯮᯰ ᯤ ᯉᯉᯪ᯲ᯉ ᯘᯪ ᯘᯒᯤ ᯔ ᯖᯮ ᯘᯪ ᯀᯅ᯲ᯒᯔ᯲ : ᯔᯒ᯲ᯘᯇᯖ ᯖᯮ ᯂᯬ ᯑᯬ ᯀᯂᯮ ! ᯂᯮᯞᯩᯂᯉᯬ᯲ ᯂᯖᯬᯅᯉ᯲ᯄ᯦ᯮ ᯇᯒ᯲ᯐᯞᯬ᯲ᯔᯀᯉᯬ᯲ᯔᯮ, ᯂᯇᯩ ᯑᯮᯰ ᯑᯪᯤᯑ ᯉᯀᯮᯰ ᯎᯅᯩᯎᯅᯩᯀᯉ᯲ ᯤᯅᯉ, ᯎᯅᯩ ᯇᯘᯪ᯲ ᯔᯖᯉ ᯔᯪᯑ ᯀᯂᯮ. ᯐᯂᯬᯋ ᯔ ᯔᯝᯮᯂᯔᯮ᯲ ᯂᯪᯖ
6 Alai ninna si Abram ma mandok si Sarai: Ida ma, guru di ho do hatobanmu, lomo ni roham bahen tu ibana. Jadi dipaposi si Sarai uhumna tu hatobanna i, gabe laho lintun sian jolona. ᯀᯞᯤ ᯉᯉᯪ᯲ᯉ ᯘᯪ ᯀᯅ᯲ᯒᯔ᯲ ᯔ ᯔᯉ᯲ᯑᯄ᯦ᯬ᯲ ᯘᯪ ᯘᯒᯤ : ᯤᯑ ᯔ, ᯎᯮᯒᯮ ᯑᯪ ᯂᯬ ᯑᯬ ᯂᯖᯬᯅᯉ᯲ᯔᯮ, ᯞᯬᯔᯬ ᯉᯪ ᯒᯬᯂᯔ᯲ ᯅᯂᯉᯩ᯲ ᯖᯮ ᯤᯅᯉ. ᯐᯑᯪ ᯑᯪᯇᯇᯬᯘᯪ ᯘᯪ ᯘᯒᯤ ᯥᯂᯔᯮ᯲ᯉ ᯖᯮ ᯂᯖᯬᯅᯉ᯲ᯉ ᯤ, ᯎᯅᯩ ᯞᯂᯬ ᯞᯉᯪ᯲ᯖᯉᯮ᯲ ᯘᯪᯀᯉ᯲ ᯐᯬᯞᯬᯉ
Diambat surusuruan ni Debata ibana di halongonan. Bagabaga taringot tu si Ismael dohot hatutubuna 7-16. ᯑᯪᯀᯔ᯲ᯅᯖ᯲ ᯘᯮᯒᯮᯘᯮᯒᯮᯀᯉ᯲ ᯉᯪ ᯑᯩᯅᯖ ᯤᯅᯉ ᯑᯪ ᯂᯞᯬᯝᯬᯉᯉ᯲, ᯅᯎᯅᯎ ᯖᯒᯪᯝᯖᯬ᯲ ᯖᯮ ᯘᯪ ᯀᯘᯪ᯲ᯔᯀᯞᯩ᯲ ᯑᯬᯂᯖᯬ᯲ ᯂᯖᯮᯖᯮᯅᯮᯉ
II. 7 Alai jumpang suruan ni Jahowa ibana di lambung ni sada mual di halongonan, di lambung mual di dalan laho tu Sur. ᯀᯞᯤ ᯐᯔᯮ᯲ᯇᯰ ᯘᯮᯒᯮᯀᯉ᯲ ᯉᯪ ᯐᯂᯬᯋ ᯤᯅᯉ ᯑᯪ ᯞᯔ᯲ᯅᯮᯰ ᯉᯪ ᯘᯑ ᯔᯮᯀᯞ᯲ ᯑᯪ ᯂᯞᯬᯝᯬᯉᯉ᯲, ᯑᯪ ᯞᯔ᯲ᯅᯮᯰ ᯔᯮᯀᯞ᯲ ᯑᯪ ᯑᯞᯉ᯲ ᯞᯂᯬ ᯖᯮ ᯘᯒᯮ᯲
8 Didok suruan i ma: Sian dia ho, jala tu dia ho ale Hagar, hatoban ni si Sarai? Na lintun do ahu sian jolo ni si Sarai, soranganki, ninna. ᯑᯪᯑᯄ᯦ᯬ᯲ ᯘᯮᯒᯮᯀᯉ᯲ ᯤ ᯔ : ᯘᯪᯀᯉ᯲ ᯑᯪᯀ ᯂᯬ, ᯐᯞ ᯖᯮ ᯑᯪᯀ ᯂᯬ ᯀᯞᯩ ᯂᯎᯒ᯲, ᯂᯖᯬᯅᯉ᯲ ᯉᯪ ᯘᯪ ᯘᯒᯤ ? ᯉ ᯞᯉᯪ᯲ᯖᯉᯮ᯲ ᯑᯬ ᯀᯂᯮ ᯘᯪᯀᯉ᯲ ᯐᯬᯞᯬ ᯉᯪ ᯘᯪ ᯘᯒᯤ ᯘᯬᯒᯝᯉ᯲ᯄ᯦ᯪ, ᯉᯉᯪ᯲ᯉ
9 Dung i ninna suruan ni Jahowa ma mandok ibana: Mulak ma ho tu soranganmu, paunduk ma roham mangoloi ibana. ᯑᯮᯰ ᯤ ᯉᯉᯪ᯲ᯉ ᯘᯮᯒᯮᯀᯉ᯲ ᯉᯪ ᯐᯂᯬᯋ ᯔ ᯔᯉ᯲ᯑᯄ᯦ᯬ᯲ ᯤᯅᯉ : ᯔᯮᯞᯄ᯦᯲ ᯔ ᯂᯬ ᯖᯮ ᯘᯬᯒᯝᯉ᯲ᯔᯮ, ᯇᯀᯉᯮ᯲ᯑᯄ᯦ᯮ᯲ ᯔ ᯒᯬᯂᯔ᯲ ᯔᯝᯬᯞᯬᯤ ᯤᯅᯉ
10 Angkup ni didok suruan ni Jahowa tu ibana: Patoroponku situtu ma pinomparmu, gabe ndang habilangan sogot dibahen hinatoropna. ᯀᯰᯄ᯦ᯇᯮ᯲ ᯉᯪ ᯑᯪᯑᯄ᯦ᯬ᯲ ᯘᯮᯒᯮᯀᯉ᯲ ᯉᯪ ᯐᯂᯬᯋ ᯖᯮ ᯤᯅᯉ, ᯇᯖᯬᯒᯬᯇᯉᯬ᯲ᯄ᯦ᯮ ᯘᯪᯖᯮᯖᯮ ᯔ ᯇᯪᯉᯔᯬ᯲ᯇᯒ᯲ᯔᯮ, ᯎᯅᯩ ᯉ᯲ᯑᯰ ᯂᯅᯪᯞᯝᯉ᯲ ᯘᯬᯎᯖᯬ᯲ ᯑᯪᯅᯂᯉᯩ᯲ ᯂᯪᯉᯖᯬᯒᯇᯬ᯲ᯉ
11 Dung i ninna suruan ni Jahowa muse tu ibana: Ida ma, naung gabegabean ho, jala tubuan anak ho, bahenonmu ma goarna si Ismael, ai nunga ditangihon Jahowa hinadangolmu. ᯑᯮᯰ ᯤ ᯉᯉᯪ᯲ᯉ ᯘᯮᯒᯮᯀᯉ᯲ ᯉᯪ ᯐᯂᯬᯋ ᯔᯮᯘᯩ ᯖᯮ ᯤᯅᯉ : ᯤᯑ ᯔ, ᯉᯀᯮᯰ ᯎᯅᯩᯎᯅᯩᯀᯉ᯲ ᯂᯬ, ᯐᯞ ᯖᯮᯅᯮᯀᯉ᯲ ᯀᯉᯄ᯦᯲ ᯂᯬ, ᯅᯂᯩᯉᯉᯬ᯲ᯔᯮ ᯔ ᯎᯬᯀᯒ᯲ᯉ ᯘᯪ ᯀᯘᯪ᯲ᯔᯀᯞᯩ᯲, ᯀᯤ ᯉᯮᯝ ᯑᯪᯖᯝᯪᯂᯉᯬ᯲ ᯐᯂᯬᯋ ᯂᯪᯉᯑᯝᯞᯬ᯲ᯔᯮ
12 Jala jolma sobokkon hije ibana sogot. Tanganna mangalo sude jolma jala tangan ni sude jolma mangalo ibana; jala marpagaran ibana di jolo ni angka donganna sabutuha sasudena. ᯐᯞ ᯐᯞᯬ᯲ᯔ ᯘᯬᯅᯄ᯦ᯬ᯲ᯄ᯦ᯉᯬ᯲ ᯂᯪᯐᯩ ᯤᯅᯉ ᯘᯬᯎᯖᯬ᯲. ᯖᯝᯉ᯲ᯉ ᯔᯝᯞᯬ ᯘᯮᯑᯩ ᯐᯞᯬ᯲ᯔ ᯐᯞ ᯖᯝᯉ᯲ ᯉᯪ ᯘᯮᯑᯩ ᯐᯞᯬ᯲ᯔ ᯔᯝᯞᯬ ᯤᯅᯉ : ᯐᯞ ᯔᯒ᯲ᯇᯎᯒᯉ᯲ ᯤᯅᯉ ᯑᯪ ᯐᯬᯞᯬ ᯉᯪ ᯀᯰᯄ᯦ ᯑᯬᯝᯉ᯲ᯉ ᯘᯅᯮᯖᯮᯂ ᯘᯘᯮᯑᯩᯉ
13 Jadi dibahen si Hagar ma goar ni Jahowa, na mangkatai dohot ibana: Ho do Debata na manatap ahu, ai ninna do: Marnida dope ahu tagamon, dung huida Ibana? ᯐᯑᯪ ᯑᯪᯅᯂᯉᯩ᯲ ᯘᯪ ᯂᯎᯒ᯲ ᯔ ᯎᯬᯀᯒ᯲ ᯉᯪ ᯐᯂᯬᯋ, ᯉ ᯔᯰᯄ᯦ᯖᯤ ᯑᯬᯂᯖᯬ᯲ ᯤᯅᯉ : ᯂᯬ ᯑᯬ ᯑᯩᯅᯖ ᯉ ᯔᯉᯖᯇ᯲ ᯀᯂᯮ, ᯀᯤ ᯉᯉᯪ᯲ᯉ ᯑᯬ : ᯔᯒ᯲ᯉᯪᯑ ᯑᯬᯇᯩ ᯀᯂᯮ ᯖᯎᯔᯉᯬ᯲, ᯑᯮᯰ ᯂᯮᯤᯑ ᯤᯅᯉ ?
14 Ala ni digoar ma sumur i: Sumur Lakhai-Roi, na di holangkolang ni Kades dohot Bared. ᯀᯞ ᯉᯪ ᯑᯪᯎᯬᯀᯒ᯲ ᯔ ᯘᯮᯔᯒᯮ᯲ ᯤ : ᯘᯮᯔᯒᯮ᯲ ᯞᯄ᯦᯲ᯂᯤ ᯒᯬᯤ, ᯉ ᯑᯪ ᯂᯬᯞᯰᯄ᯦ᯬᯞᯰ ᯉᯪ ᯄ᯦ᯑᯘᯩ᯲ ᯑᯬᯂᯖᯬ᯲ ᯅᯒᯑᯩ᯲
15 Dung i ditubuhon si Hagar ma anak sada di si Abram, jadi dibahen si Abram ma goar ni anakna, na tinubuhon ni si Hagar i, Ismael. ᯑᯮᯰ ᯤ ᯑᯪᯖᯮᯅᯮᯂᯉᯬ᯲ ᯘᯪ ᯂᯎᯒ᯲ ᯔ ᯀᯉᯄ᯦᯲ ᯘᯑ ᯑᯪ ᯘᯪ ᯀᯅ᯲ᯒᯔ᯲, ᯐᯑᯪ ᯑᯪᯅᯂᯉᯩ᯲ ᯘᯪ ᯀᯅ᯲ᯒᯔ᯲ ᯔ ᯎᯬᯀᯒ᯲ ᯉᯪ ᯀᯉᯄ᯦᯲ᯉ, ᯉ ᯖᯪᯉᯮᯅᯮᯂᯉᯬ᯲ ᯉᯪ ᯘᯪ ᯂᯎᯒ᯲ ᯤ ᯀᯘᯪ᯲ᯔᯀᯞᯩ᯲
16 Marumur ualupulu onom taon si Abram di na tinubuhon ni si Hagar si Ismael i di si Abram. ᯔᯒᯮᯔᯒᯮ᯲ ᯥᯀᯞᯮᯇᯮᯞᯮ ᯀᯬᯉᯔᯬ᯲ ᯖᯀᯉᯬ᯲ ᯘᯪ ᯀᯅ᯲ᯒᯔ᯲ ᯑᯪ ᯉ ᯖᯪᯉᯮᯅᯮᯂᯉᯬ᯲ ᯉᯪ ᯘᯪ ᯂᯎᯒ᯲ ᯘᯪ ᯀᯘᯪ᯲ᯔᯀᯞᯩ᯲ ᯤ ᯑᯪ ᯘᯪ ᯀᯅ᯲ᯒᯔ᯲