Ratarata ni bagabaga ni Debata tu si Abram Hamumuba ni goarna 1-9. ᯒᯖᯒᯖ ᯉᯪ ᯅᯎᯅᯎ ᯉᯪ ᯑᯩᯅᯖ ᯖᯮ ᯘᯪ ᯀᯅ᯲ᯒᯔ᯲ ᯂᯔᯮᯔᯮᯅ ᯉᯪ ᯎᯬᯀᯒ᯲ᯉ ᯘᯑ – ᯘᯪᯀ
Porsunaton tanda ni padan 10-14. ᯇᯒᯬ᯲ᯘᯮᯉᯖᯉᯬ᯲ ᯖᯉ᯲ᯑ ᯉᯪ ᯇᯑᯉ᯲ ᯘᯔ᯲ᯇᯮᯞᯮ – ᯘᯔ᯲ᯇᯮᯞᯮ ᯀᯬᯇᯖ᯲
Hamumuba ni goar ni si Sarai. Bagabaga taringot tu si Isak 15-22. ᯂᯔᯮᯔᯮᯅ ᯉᯪ ᯎᯬᯀᯒ᯲ ᯉᯪ ᯘᯪ ᯘᯒᯤ. ᯅᯎᯅᯎ ᯖᯒᯪᯝᯖᯬ᯲ ᯖᯮ ᯘᯪ ᯤᯘᯄ᯦᯲ ᯘᯔ᯲ᯇᯮᯞᯮ ᯞᯪᯔ – ᯑᯮᯀᯇᯮᯞᯮ ᯑᯮᯀ
Hasasaut ni parsunaton 23-27. ᯂᯘᯘᯀᯖᯮ᯲ ᯉᯪ ᯇᯒ᯲ᯘᯮᯉᯖᯉᯬ᯲ ᯑᯮᯀᯇᯮᯞᯮ ᯖᯬᯞᯮ – ᯑᯮᯀᯇᯮᯞᯮ ᯇᯪᯖᯮ
Ratarata ni bagabaga ni Debata tu si Abram Hamumuba ni goarna 1-9. ᯒᯖᯒᯖ ᯉᯪ ᯅᯎᯅᯎ ᯉᯪ ᯑᯩᯅᯖ ᯖᯮ ᯘᯪ ᯀᯅ᯲ᯒᯔ᯲ ᯂᯔᯮᯔᯮᯅ ᯉᯪ ᯎᯬᯀᯒ᯲ᯉ ᯘᯑ – ᯘᯪᯀ
I. 1 Jadi dung marumur siapulu sia taon si Abram, diida ma ro Jahowa na mandok tu ibana: Ahu do Debata, na sun hinagogo; sai marparange di jolongku ma ho, jala daulat roham! ᯐᯑᯪ ᯑᯮᯰ ᯔᯒᯮᯔᯒᯮ᯲ ᯘᯪᯀᯇᯮᯞᯮ ᯘᯪᯀ ᯖᯀᯉᯬ᯲ ᯘᯪ ᯀᯅ᯲ᯒᯔ᯲ ᯑᯪᯤᯑ ᯔ ᯒᯬ ᯐᯂᯬᯋ ᯉ ᯔᯉ᯲ᯑᯄ᯦ᯬ᯲ ᯖᯮ ᯤᯅᯉ : ᯀᯂᯮ ᯑᯬ ᯑᯩᯅᯖ, ᯉ ᯘᯉᯮ᯲ ᯂᯪᯉᯎᯬᯎᯬ ; ᯘᯤ ᯔᯒ᯲ᯇᯒᯝᯩ ᯑᯪ ᯐᯬᯞᯬᯰᯄ᯦ᯮ ᯔ ᯂᯬ, ᯐᯞ ᯑᯥᯞᯖ᯲ ᯒᯬᯂᯔ᯲ !
2 Asa hupahot padanhu dohot ho, jala hupatorop situtu ho. ᯀᯘ ᯂᯮᯇᯂᯖᯬ᯲ ᯇᯑᯉ᯲ᯄ᯦ᯮ ᯑᯬᯂᯖᯬ᯲ ᯂᯬ, ᯐᯞ ᯂᯮᯇᯖᯬᯒᯇᯬ᯲ ᯘᯪᯖᯮᯖᯮ ᯂᯬ
3 Jadi manungkap ma si Abram. Dung i mangkatai Debata muse dohot ibana: ᯐᯑᯪ ᯔᯉᯮᯰᯄ᯦ᯇ᯲ ᯔ ᯘᯪ ᯀᯅ᯲ᯒᯔ᯲, ᯑᯮᯰ ᯤ ᯔᯰᯄ᯦ᯖᯤ ᯑᯩᯅᯖ ᯔᯮᯘᯩ ᯑᯬᯂᯖᯬ᯲ ᯤᯅᯉ
4 Ianggo Ahu, ida ma, nunga hot padanhu dohot ho, jala torop angka bangso marompu tu ho sogot. ᯤᯀᯰᯎᯬ ᯀᯂᯮ, ᯤᯑ ᯔ, ᯉᯮᯝ ᯂᯖᯬ᯲ ᯇᯑᯉ᯲ᯂᯮ ᯑᯬᯂᯖᯬ᯲ ᯂᯬ, ᯐᯞ ᯖᯬᯒᯇᯬ᯲ ᯀᯰᯄ᯦ ᯅᯰᯘᯬ ᯔᯒᯔᯬ᯲ᯇᯮ ᯖᯮ ᯂᯬ ᯘᯬᯎᯖᯬ᯲
5 Ala ni ndang be si Abram goarmu dohonon, si Abraham ma goarmu, ai nunga hupabangkit ho gabe ompu ni torop angka bangso. ᯀᯞ ᯉᯪ ᯉ᯲ᯑᯰ ᯅᯩ ᯘᯪ ᯀᯅ᯲ᯒᯔ᯲ ᯎᯬᯀᯒ᯲ᯔᯮ ᯑᯬᯂᯬᯉᯉᯬ᯲, ᯘᯪ ᯀᯅ᯲ᯒᯂᯔ᯲ ᯔ ᯎᯬᯀᯒ᯲ᯔᯮ, ᯀᯤ ᯉᯮᯝ ᯂᯮᯇᯅᯰᯄ᯦ᯖᯪ᯲ ᯂᯬ ᯎᯅᯩ ᯀᯔᯬ᯲ᯇᯮ ᯉᯪ ᯖᯬᯒᯇᯬ᯲ ᯀᯰᯄ᯦ ᯅᯰᯘᯬ
6 Jala sopar situtu ho tumpahanku, jala pabangkitonku ho gabe ompu parsadaan ni angka bangso, jala marroan sian ho angka raja. ᯐᯞ ᯘᯬᯇᯒ᯲ ᯘᯪᯖᯮᯖᯮ ᯂᯬ ᯖᯔᯮ᯲ᯇᯂᯉᯬ᯲ᯄ᯦ᯮ, ᯐᯞ ᯇᯅᯰᯄ᯦ᯪᯖᯉᯬ᯲ᯄ᯦ᯮ ᯂᯬ ᯎᯅᯩ ᯀᯔᯬ᯲ᯇᯮ ᯇᯒ᯲ᯘᯑᯀᯉ᯲ ᯉᯪ ᯀᯰᯄ᯦ ᯅᯰᯘᯬ, ᯐᯞ ᯔᯒ᯲ᯒᯬᯀᯉ᯲ ᯘᯪᯀᯉ᯲ ᯂᯬ ᯀᯰᯄ᯦ ᯒᯐ
7 Sai pahotonku do padanhu tu ho dohot tu pinomparmu sogot marsundutsundut, gabe padan salelenglelengna, paboa Ahu gabe Debatam dohot Debata ni pinomparmu sogot. ᯘᯤ ᯇᯂᯬᯖᯉᯬ᯲ᯄ᯦ᯮ ᯑᯬ ᯇᯑᯉ᯲ᯄ᯦ᯮ ᯖᯮ ᯂᯬ ᯑᯬᯂᯖᯬ᯲ ᯖᯮ ᯇᯪᯉᯔᯬ᯲ᯇᯒ᯲ᯔᯮ ᯘᯬᯎᯖᯬ᯲ ᯔᯒ᯲ᯘᯉᯮ᯲ᯑᯖᯮ᯲ᯘᯉᯮ᯲ᯑᯖᯮ᯲, ᯎᯅᯩ ᯇᯑᯉ᯲ ᯘᯞᯩᯞᯰᯩᯞᯩᯞᯰᯩᯉ, ᯇᯅᯬᯀ ᯀᯂᯮ ᯎᯅᯩ ᯑᯩᯅᯖᯔ᯲ ᯑᯬᯂᯖᯬ᯲ᯑᯩᯅᯖ ᯉᯪ ᯇᯪᯉᯔᯬ᯲ᯇᯒ᯲ᯔᯮ ᯘᯬᯎᯖᯬ᯲
8 Jala lehononku tu ho dohot tu pinomparmu sogot tano paisolatanmu nuaeng, i ma sandok tano Kanaan bahen partohapan salelenglelengna, jala Debatanasida Ahu. ᯐᯞ ᯞᯩᯂᯬᯉᯉᯬ᯲ᯄ᯦ᯮ ᯖᯮ ᯂᯬ ᯑᯬᯂᯖᯬ᯲ ᯖᯮ ᯇᯪᯉᯔᯬ᯲ᯇᯒ᯲ᯔᯮ ᯘᯬᯎᯖᯬ᯲ ᯖᯉᯬ ᯇᯤᯘᯬᯞᯖᯉ᯲ᯔᯮ ᯉᯮᯀᯀᯰᯩ, ᯤ ᯔ ᯘᯉ᯲ᯑᯄ᯦ᯬ᯲ ᯖᯉᯬ ᯄ᯦ᯉᯀᯉ᯲ ᯅᯂᯉᯩ᯲ ᯇᯒ᯲ᯖᯬᯂᯇᯉ᯲ ᯘᯞᯩᯞᯰᯩᯞᯩᯞᯰᯩᯉ, ᯐᯞ ᯑᯩᯅᯖᯉᯘᯪᯑ ᯀᯂᯮ
9 Angkup ni didok Debata tu si Abraham: Ho pe, sai ingot ma padan na hubahen i, ho dohot pinomparmu sogot marsundutsundut.ᯀᯰᯄ᯦ᯇᯮ᯲ ᯉᯪ ᯑᯪᯑᯄ᯦ᯬ᯲ ᯑᯩᯅᯖ ᯖᯮ ᯘᯪ ᯀᯅ᯲ᯒᯂᯔ᯲ : ᯂᯬ ᯇᯩ, ᯘᯤ ᯤᯝᯖᯬ᯲ ᯔ ᯇᯑᯉ᯲ ᯉ ᯂᯮᯅᯂᯉᯩ᯲ ᯤ, ᯂᯬ ᯑᯬᯂᯖᯬ᯲ ᯇᯪᯉᯔᯬ᯲ᯇᯒ᯲ᯔᯮ ᯘᯬᯎᯖᯬ᯲ ᯔᯒ᯲ᯘᯉᯮ᯲ᯑᯖᯮ᯲ᯘᯉᯮ᯲ᯑᯖᯮ᯲
Porsunaton tanda ni padan 10-14. ᯇᯒᯬ᯲ᯘᯮᯉᯖᯉᯬ᯲ ᯖᯉ᯲ᯑ ᯉᯪ ᯇᯑᯉ᯲ ᯘᯔ᯲ᯇᯮᯞᯮ – ᯘᯔ᯲ᯇᯮᯞᯮ ᯀᯬᯇᯖ᯲
II. 10 On do padan siingotonmuna, na hubahen i tu ho dohot tu pinomparmu sogot: Ingkon sunaton do nasa baoa sian hamu. ᯀᯉᯬ᯲ ᯑᯬ ᯇᯑᯉ᯲ ᯘᯪᯤᯝᯬᯖᯉᯬ᯲ᯔᯮᯉ, ᯉ ᯂᯮᯅᯂᯉᯩ᯲ ᯤ ᯖᯮ ᯂᯬ ᯑᯬᯂᯖᯬ᯲ ᯖᯮ ᯇᯪᯉᯔᯬ᯲ᯇᯒ᯲ᯔᯮ ᯘᯬᯎᯖᯬ᯲ : ᯀᯪᯰᯄ᯦ᯉᯬ᯲ ᯘᯮᯉᯖᯉᯬ᯲ ᯑᯬ ᯉᯘ ᯅᯀᯬᯀ ᯘᯪᯀᯉ᯲ ᯂᯔᯮ
11 Ingkon sunatonmuna do sibuk ni sibursiburmuna bahen tanda ni padanhu dohot hamu. ᯀᯪᯰᯄ᯦ᯉᯬ᯲ ᯘᯮᯉᯖᯉᯬ᯲ᯔᯮᯉ ᯑᯬ ᯘᯪᯅᯄ᯦ᯮ᯲ ᯉᯪ ᯘᯪᯅᯒᯮ᯲ᯘᯪᯅᯒᯮ᯲ᯔᯮᯉ ᯅᯂᯉᯩ᯲ ᯖᯉ᯲ᯑ ᯉᯪ ᯇᯑᯉ᯲ᯄ᯦ᯮ ᯑᯬᯂᯖᯬ᯲ ᯂᯔᯮ
12 Ia anak sunatonmuna ma molo marumur ualu borngin, nasa baoa pinomparmuna na tubu di jabum dohot na tinuhor ni hepeng sian nasa halak sileban na so sian pinomparmu. ᯤᯀ ᯀᯉᯄ᯦᯲ ᯘᯮᯉᯖᯉᯬ᯲ᯔᯮᯉ ᯔ ᯔᯬᯞᯬ ᯔᯒᯮᯔᯒᯮ᯲ ᯥᯀᯞᯮ ᯅᯒᯬ᯲ᯝᯉᯪ᯲, ᯉᯘ ᯅᯀᯬᯀ ᯇᯪᯉᯔᯬ᯲ᯇᯒ᯲ᯔᯮᯉ ᯉ ᯖᯮᯅᯮ ᯑᯪ ᯐᯅᯔᯮ᯲ ᯑᯬᯂᯖᯬ᯲ ᯉ ᯖᯪᯉᯮᯂᯒᯬ᯲ ᯉᯪ ᯂᯩᯇᯰᯩ ᯘᯪᯀᯉ᯲ ᯉᯘ ᯂᯞᯄ᯦᯲ ᯘᯪᯞᯩᯅᯉ᯲ ᯉ ᯘᯬ ᯘᯪᯀᯉ᯲ ᯇᯪᯉᯔᯬ᯲ᯇᯒ᯲ᯔᯮ
13 Ingkon sunaton do na tubu di jabum dohot na tinuhor ni hepengmu, asa padan na salelengnilelengna do padanhu na di sibukmuna i. ᯀᯪᯰᯄ᯦ᯉᯬ᯲ ᯘᯮᯉᯖᯉᯬ᯲ ᯑᯬ ᯉ ᯖᯮᯅᯮ ᯑᯪ ᯐᯅᯔᯮ᯲ ᯑᯬᯂᯖᯬ᯲ ᯉ ᯖᯪᯉᯮᯂᯒᯬ᯲ ᯉᯪ ᯂᯩᯇᯰᯩᯔᯮ, ᯀᯘ ᯇᯑᯉ᯲ ᯉ ᯘᯞᯩᯞᯰᯩᯉᯪᯞᯩᯞᯰᯩᯉ ᯑᯬ ᯇᯑᯉ᯲ᯂᯮ ᯉ ᯑᯪ ᯘᯪᯅᯄ᯦ᯮ᯲ᯔᯮᯉ ᯤ
14 Ia baoa parhulup, na so tarsunat sibuk ni sibursiburna ripashononhon do ibana sian bangsona, ala diose padanhu. ᯤᯀ ᯅᯀᯬᯀ ᯇᯒ᯲ᯂᯮᯞᯇᯮ᯲, ᯉ ᯘᯬ ᯖᯒ᯲ᯘᯮᯉᯖ᯲ ᯘᯪᯅᯄ᯦ᯮ᯲ ᯉᯪ ᯘᯪᯅᯒᯮ᯲ᯘᯪᯅᯒᯮ᯲ᯉ ᯒᯪᯇᯘ᯲ᯂᯬᯉᯉᯬ᯲ᯂᯉᯬ᯲ ᯑᯬ ᯤᯅᯉ ᯘᯪᯀᯉ᯲ ᯅᯰᯘᯬᯉ, ᯀᯞ ᯑᯪᯀᯬᯘᯩ ᯇᯑᯉ᯲ᯂᯮ
Hamumuba ni goar ni si Sarai. Bagabaga taringot tu si Isak 15-22. ᯂᯔᯮᯔᯮᯅ ᯉᯪ ᯎᯬᯀᯒ᯲ ᯉᯪ ᯘᯪ ᯘᯒᯤ. ᯅᯎᯅᯎ ᯖᯒᯪᯝᯖᯬ᯲ ᯖᯮ ᯘᯪ ᯤᯘᯄ᯦᯲ ᯘᯔ᯲ᯇᯮᯞᯮ ᯞᯪᯔ – ᯑᯮᯀᯇᯮᯞᯮ ᯑᯮᯀ
III. 15 Dung i didok Debata muse tu si Abraham: Ndang be si Sarai dohononmu goar ni jolmam, si Sarah ma goarna. ᯑᯮᯰ ᯤ ᯑᯪᯑᯄ᯦ᯬ᯲ ᯑᯩᯅᯖ ᯔᯮᯘᯩ ᯖᯮ ᯘᯪ ᯀᯅ᯲ᯒᯂᯔ᯲ : ᯉ᯲ᯑᯰ ᯅᯩ ᯘᯪ ᯘᯒᯤ ᯑᯬᯂᯬᯉᯉᯬ᯲ᯔᯮ ᯎᯬᯀᯒ᯲ ᯉᯪ ᯐᯞᯬ᯲ᯔᯔ᯲ : ᯘᯪ ᯘᯒᯂ᯲ ᯔ ᯎᯬᯀᯒ᯲ᯉ
16 Ai pasupasuonku ibana, jala lehononku ma di ho anak sada nang sian ibana, jala pasupasuonku ibana gabe angka bangso; gari raja ni angka bangso marroan sian ibana sogot. ᯀᯤ ᯇᯘᯮᯇᯘᯮᯀᯉᯬ᯲ᯄ᯦ᯮ ᯤᯅᯉ, ᯐᯞ ᯞᯩᯂᯬᯉᯉᯬ᯲ᯄ᯦ᯮ ᯔ ᯑᯪ ᯂᯬ ᯀᯉᯄ᯦᯲ ᯘᯑ ᯉᯰ ᯘᯪᯀᯉ᯲ ᯤᯅᯉ, ᯐᯞ ᯇᯘᯮᯇᯘᯮᯀᯉᯬ᯲ᯄ᯦ᯮ ᯤᯅᯉ ᯎᯅᯩ ᯀᯰᯄ᯦ ᯅᯰᯘᯬ : ᯎᯒᯪ ᯒᯐ ᯉᯪ ᯀᯰᯄ᯦ ᯅᯰᯘᯬ ᯔᯒ᯲ᯒᯬᯀᯉ᯲ ᯘᯪᯀᯉ᯲ ᯤᯅᯉ
17 Jadi manungkap ma si Abraham jala mengkel, didok ma di bagasan rohana: Tung tubuan anak ma jolma sisaratus taon jala manubuhon ma tagamon si Sarah, na marumur siapulu taon? ᯐᯑᯪ ᯔᯉᯮᯰᯄ᯦ᯇ᯲ ᯔ ᯘᯪ ᯀᯅ᯲ᯒᯂᯔ᯲ ᯐᯞ ᯔᯰᯩᯄ᯦ᯞᯩ᯲, ᯑᯪᯑᯄ᯦ᯬ᯲ ᯔ ᯑᯪ ᯅᯎᯘᯉ᯲ ᯒᯬᯂᯉ : ᯖᯮᯰ ᯖᯮᯅᯮᯀᯉ᯲ ᯀᯉᯄ᯦᯲ ᯔ ᯐᯞᯬ᯲ᯔ ᯘᯪᯘᯒᯖᯘᯮ᯲ ᯖᯀᯉᯬ᯲ ᯐᯞ ᯔᯉᯮᯅᯮᯂᯉᯬ᯲ ᯔ ᯖᯎᯔᯉᯬ᯲ ᯘᯪ ᯘᯒᯂ᯲, ᯉ ᯔᯒᯮᯔᯒᯮ᯲ ᯘᯪᯀᯇᯮᯞᯮ ᯖᯀᯉᯬ᯲ ?
18 Dung i ninna si Abraham ma tu Debata: Asal mangolu si Ismael maradophon Ho! ᯑᯮᯰ ᯤ ᯉᯉᯪ᯲ᯉ ᯘᯪ ᯀᯅ᯲ᯒᯂᯔ᯲ ᯔ ᯖᯮ ᯑᯩᯅᯖ : ᯀᯘᯞ᯲ ᯔᯝᯬᯞᯮ ᯘᯪ ᯀᯘᯪ᯲ᯔᯀᯞᯩ᯲ ᯔᯒᯑᯇᯬ᯲ᯂᯉᯬ᯲ ᯂᯬ !
19 Jadi ninna Debata ma: Tongon do, ingkon tubuhonon ni si Sarah, jolmam anak sada di ho, bahen ma goarna si Isak; pahotonku do padanhu dohot ibana, padan na salelenglelengna, ro di pinomparna sogot. ᯐᯑᯪ ᯉᯉᯪ᯲ᯉ ᯑᯩᯅᯖ ᯔ : ᯖᯬᯝᯉᯬ᯲ ᯑᯬ, ᯀᯪᯰᯄ᯦ᯉᯬ᯲ ᯖᯮᯅᯮᯂᯬᯉᯉᯬ᯲ ᯉᯪ ᯘᯪ ᯘᯒᯂ᯲, ᯐᯞᯬ᯲ᯔᯔ᯲ ᯀᯉᯄ᯦᯲ ᯘᯑ ᯑᯪ ᯂᯬ, ᯅᯂᯉᯩ᯲ ᯔ ᯎᯬᯀᯒ᯲ᯉ ᯘᯪ ᯤᯘᯄ᯦᯲ : ᯇᯂᯬᯖᯉᯬ᯲ᯄ᯦ᯮ ᯑᯬ ᯇᯑᯉ᯲ᯂᯮ ᯑᯬᯂᯖᯬ᯲ ᯤᯅᯉ, ᯇᯑᯉ᯲ ᯉ ᯘᯞᯩᯞᯰᯩᯞᯩᯞᯰᯩᯉ, ᯒᯬ ᯑᯪ ᯇᯪᯉᯔᯬ᯲ᯇᯒ᯲ᯉ ᯘᯬᯎᯖᯬ᯲
20 Taringot tu si Ismael pe, nunga hutangihon ho, ida ma, nunga hupasupasu ibana, tumpahanku ma ibana gabe, asa torop situtu ibana. Sampulu dua raja tubuna, jala bangso na bolon ibana bahenonku. ᯖᯒᯪᯝᯖᯬ᯲ ᯖᯮ ᯘᯪ ᯀᯘᯪ᯲ᯔᯀᯞᯩ᯲ ᯇᯩ, ᯉᯮᯝ ᯂᯮᯖᯝᯪᯂᯉᯬ᯲ ᯂᯬ, ᯤᯑ ᯔ ᯉᯮᯝ ᯂᯮᯇᯘᯮᯇᯘᯮ ᯤᯅᯉ, ᯖᯔᯮ᯲ᯇᯂᯉ᯲ᯄ᯦ᯮ ᯔ ᯤᯅᯉ ᯎᯅᯩ, ᯀᯘ ᯖᯬᯒᯇᯬ᯲ ᯘᯪᯖᯮᯖᯮ ᯤᯅᯉ. ᯘᯔ᯲ᯇᯮᯞᯮ ᯑᯮᯀ ᯒᯐ ᯖᯮᯅᯮᯉ, ᯐᯞ ᯅᯰᯘᯬ ᯉ ᯅᯬᯞᯉᯬ᯲ ᯤᯅᯉ ᯅᯂᯩᯉᯉᯬ᯲ᯄ᯦ᯮ
21 Alai anggo padanhu pahotonku dohot si Isak, situbuhonon ni si Sarah di ho, taon i songon on. ᯀᯞᯤ ᯀᯰᯎᯬ ᯇᯑᯉ᯲ᯂᯮ ᯇᯂᯬᯖᯉᯬ᯲ᯄ᯦ᯮ ᯑᯬᯂᯖᯬ᯲ ᯘᯪ ᯤᯘᯄ᯦᯲, ᯘᯪᯖᯮᯅᯮᯂᯬᯉᯉᯬ᯲ ᯉᯪ ᯘᯪ ᯘᯒᯂ᯲ ᯑᯪ ᯂᯬ, ᯖᯀᯉᯬ᯲ ᯤ ᯘᯬᯝᯉᯬ᯲ ᯀᯉᯬ᯲
22 Jadi dung sun Debata mangkatai dohot ibana, manaek ma Debata sian si Abraham. ᯐᯑᯪ ᯑᯮᯰ ᯘᯉᯮ᯲ ᯑᯩᯅᯖ ᯔᯰᯄ᯦ᯖᯤ ᯑᯬᯂᯖᯬ᯲ ᯤᯅᯉ, ᯔᯉᯀᯄᯰᯩ᯲ ᯔ ᯑᯩᯅᯖ ᯘᯪᯀᯉ᯲ ᯘᯪ ᯀᯅ᯲ᯒᯂᯔ᯲
Hasasaut ni parsunaton 23-27. ᯂᯘᯘᯀᯖᯮ᯲ ᯉᯪ ᯇᯒ᯲ᯘᯮᯉᯖᯉᯬ᯲ ᯑᯮᯀᯇᯮᯞᯮ ᯖᯬᯞᯮ – ᯑᯮᯀᯇᯮᯞᯮ ᯇᯪᯖᯮ
IV. 23 Dung i dibuat si Abraham ma si Ismael, anakna i dohot sude anak angka na tubu di jabuna ro di sude na tinuhor ni hepengna, nasa baoa, pangisi ni jabu ni si Abraham, jala disunati sibuk ni sibursiburnasida, laos di ari pangkataianna, songon na nidok ni Debata tu ibana. ᯑᯮᯰ ᯤ ᯑᯪᯅᯮᯀᯖ᯲ ᯘᯪ ᯀᯅ᯲ᯒᯂᯔ᯲ ᯔ ᯘᯪ ᯀᯘᯪ᯲ᯔᯀᯞᯩ᯲, ᯀᯉᯄ᯦᯲ᯉ ᯤ ᯑᯬᯂᯖᯬ᯲ ᯘᯮᯑᯩ ᯀᯉᯄ᯦᯲ ᯀᯰᯄ᯦ ᯉ ᯖᯮᯅᯮ ᯑᯪ ᯐᯅᯮᯉ ᯒᯬ ᯑᯪ ᯘᯮᯑᯩ ᯉ ᯖᯪᯉᯮᯂᯒᯬ᯲ ᯉᯪ ᯂᯩᯇᯰᯩᯉ, ᯉᯘ ᯅᯀᯬᯀ, ᯇᯝᯪᯘᯪ ᯉᯪ ᯐᯅᯮ ᯉᯪ ᯘᯪ ᯀᯅ᯲ᯒᯂᯔ᯲, ᯐᯞ ᯑᯪᯘᯮᯉᯖᯪ ᯘᯪᯅᯄ᯦ᯮ᯲ ᯉᯪ ᯘᯪᯅᯒᯮ᯲ᯘᯪᯅᯒᯮ᯲ᯉᯘᯪᯑ ᯞᯀᯘᯬ᯲ ᯑᯪ ᯀᯒᯪ ᯇᯰᯄ᯦ᯖᯤᯀᯉ᯲ᯉ, ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ ᯉᯪ ᯑᯩᯅᯖ ᯖᯮ ᯤᯅᯉ
24 Ia umur ni si Abraham di na tarsunat i sibuk ni sibursiburna i siapulu sia taon do. ᯤᯀ ᯥᯔᯒᯮ᯲ ᯉᯪ ᯘᯪ ᯀᯅ᯲ᯒᯂᯔ᯲ ᯑᯪ ᯉ ᯖᯒ᯲ᯘᯮᯉᯖ᯲ ᯤ ᯘᯪᯅᯄ᯦ᯮ᯲ ᯉᯪ ᯘᯪᯅᯒᯮ᯲ᯘᯪᯅᯒᯮ᯲ᯉ ᯤ ᯘᯪᯀᯇᯮᯞᯮ ᯘᯪᯀ ᯖᯀᯉᯬ᯲ ᯑᯬ
25 Alai anggo umur ni si Ismael, anakna i, sampulu tolu taon do, di na tarsunat i sibuk ni sibursiburna i. ᯀᯞᯤ ᯀᯰᯎᯬ ᯥᯔᯒᯮ᯲ ᯉᯪ ᯘᯪ ᯀᯘᯪ᯲ᯔᯀᯞᯩ᯲, ᯀᯉᯄ᯦᯲ᯉ ᯤ, ᯘᯔ᯲ᯇᯮᯞᯮ ᯖᯬᯞᯮ ᯖᯀᯉᯬ᯲ ᯑᯬ, ᯑᯪ ᯉ ᯖᯒ᯲ᯘᯮᯉᯖ᯲ ᯤ ᯘᯪᯅᯄ᯦᯲ ᯉᯪ ᯘᯪᯅᯒᯮ᯲ᯘᯪᯅᯒᯮ᯲ᯉ ᯤ
26 Laos di ari na sasada i do tarsunat si Abraham dohot si Ismael anakna i. ᯞᯀᯘᯬ᯲ ᯑᯪ ᯀᯒᯪ ᯉ ᯘᯘᯑ ᯤ ᯑᯬ ᯖᯒ᯲ᯘᯮᯉᯖ᯲ ᯘᯪ ᯀᯅ᯲ᯒᯂᯔ᯲ ᯑᯬᯂᯖᯬ᯲ ᯘᯪ ᯀᯘᯪ᯲ᯔᯀᯞᯩ ᯀᯉᯄ᯦᯲ᯉ ᯤ
27 Ro di nasa baoa, pangisi ni jabuna, na tubu di jabuna dohot na tinuhor ni hepeng sian halak sileban, tarsunat do i rap dohot ibana. ᯒᯬ ᯑᯪ ᯉᯘ ᯅᯀᯬᯀ, ᯇᯝᯪᯘᯪ ᯉᯪ ᯐᯅᯮᯉ, ᯉ ᯖᯮᯅᯮ ᯑᯪ ᯐᯅᯮᯉ ᯑᯬᯂᯖᯬ᯲ ᯉ ᯖᯪᯉᯮᯂᯒᯬ᯲ ᯉᯪ ᯂᯩᯇᯰᯩ ᯘᯪᯀᯉ᯲ ᯂᯞᯄ᯦᯲ ᯘᯪᯞᯩᯅᯉ᯲, ᯖᯒ᯲ᯘᯮᯉᯖ᯲ ᯑᯬ ᯤ ᯒᯇ᯲ ᯑᯬᯂᯖᯬ᯲ ᯤᯅᯉ