Diida si Abraham Tuhan Jahowa 1-8. ᯑᯪᯤᯑ ᯘᯪ ᯀᯅ᯲ᯒᯂᯔ᯲ ᯖᯮᯂᯉ᯲ ᯐᯂᯬᯋ ᯘᯑ – ᯥᯀᯞᯮ
Bagabaga taringot tu hatutubu ni si Isak tu si Sarah, hape ndang dihaporseai rohana 9-15. ᯅᯎᯅᯎ ᯖᯒᯪᯝᯖᯬ᯲ ᯖᯮ ᯂᯖᯮᯖᯮᯅᯮ ᯉᯪ ᯘᯪ ᯤᯘᯄ᯦᯲ ᯖᯮ ᯘᯪ ᯘᯒᯂ᯲, ᯂᯇᯩ ᯉ᯲ᯑᯰ ᯑᯪᯂᯇᯒᯬ᯲ᯘᯩᯀᯤ ᯒᯬᯂᯉ ᯘᯪᯀ – ᯘᯔ᯲ᯇᯮᯞᯮ ᯞᯪᯔ
Lumbalumba taringot tu parsorion ni Sodom. Pangondihon ni si Abraham 16-33. ᯞᯔᯮ᯲ᯅᯞᯔᯮ᯲ᯅ ᯖᯒᯪᯝᯖᯬ᯲ ᯖᯮ ᯇᯒ᯲ᯘᯬᯒᯪᯀᯉᯬ᯲ ᯉᯪ ᯘᯬᯑᯔᯬ᯲. ᯇᯝᯉᯬ᯲ᯑᯪᯂᯉᯬ᯲ ᯉᯪ ᯘᯪ ᯀᯅ᯲ᯒᯂᯔ᯲ ᯘᯔ᯲ᯇᯮᯞᯮ ᯀᯬᯉᯔᯬ᯲ – ᯖᯬᯞᯮᯇᯮᯞᯮ ᯖᯬᯞᯮ
Diida si Abraham Tuhan Jahowa 1-8. ᯑᯪᯤᯑ ᯘᯪ ᯀᯅ᯲ᯒᯂᯔ᯲ ᯖᯮᯂᯉ᯲ ᯐᯂᯬᯋ ᯘᯑ – ᯥᯀᯞᯮ
I. 1 Dung i diida si Abraham ma Jahowa di tombak Mamre, tongon hundul ibana di baba pintu ni undungundungna, di parngiar ni ari. ᯑᯮᯰ ᯤ ᯑᯪᯤᯑ ᯘᯪ ᯀᯅ᯲ᯒᯂᯔ᯲ ᯔ ᯐᯂᯬᯋ ᯑᯪ ᯖᯔᯬ᯲ᯅᯄ᯦᯲ ᯔᯔ᯲ᯒᯩ ᯖᯬᯝᯉᯬ᯲ ᯂᯉᯮ᯲ᯑᯞᯮ᯲ ᯤᯅᯉ ᯑᯪ ᯅᯅ ᯇᯉᯪ᯲ᯖᯮ ᯉᯪ ᯀᯉᯮ᯲ᯑᯮᯝᯉᯮ᯲ᯑᯮᯰᯉ, ᯑᯪ ᯇᯒ᯲ᯝᯪᯀᯒ᯲ ᯉᯪ ᯀᯒᯪ
2 Dung i manaili ma ibana, gabe diida ma tolu halak jongjong di jolona. Jadi dung diida marlojong ma ibana manomunomu nasida sian baba pintu ni undungundungna, jala dipatungki tu tano. ᯑᯮᯰ ᯤ ᯔᯉᯤᯞᯪ ᯔ ᯤᯅᯉ, ᯎᯅᯩ ᯑᯪᯤᯑ ᯔ ᯖᯬᯞᯮ ᯂᯞᯄ᯦᯲ ᯐᯬᯰᯐᯬᯰ ᯑᯪ ᯐᯬᯞᯬᯉ. ᯐᯑᯪ ᯑᯮᯰ ᯑᯪᯤᯑ ᯔᯒ᯲ᯞᯬᯐᯬᯰ ᯔ ᯤᯅᯉ ᯔᯉᯬᯔᯮᯉᯬᯔᯮ ᯉᯘᯪᯑ ᯘᯪᯀᯉ᯲ ᯅᯅ ᯇᯉᯪ᯲ᯖᯮ ᯉᯪ ᯀᯉᯮ᯲ᯑᯮᯝᯉᯮ᯲ᯑᯮᯰᯉ, ᯐᯞ ᯑᯪᯇᯖᯮᯰᯄ᯦ᯪ ᯖᯮ ᯖᯉᯬ
3 Dung i ninna ma: Molo asi roham marnida ahu, ale Tuhanku, sai unang laosi naposomon. ᯑᯮᯰ ᯤ ᯉᯉᯪ᯲ᯉ ᯔ : ᯔᯬᯞᯬ ᯀᯘᯪ ᯒᯬᯂᯔ᯲ ᯔᯒ᯲ᯉᯪᯑ ᯀᯂᯮ, ᯀᯞᯩ ᯖᯮᯂᯉ᯲ᯄ᯦ᯮ, ᯘᯤ ᯥᯉᯰ ᯞᯀᯬᯘᯪ ᯉᯇᯬᯘᯬᯔᯉᯬ᯲
4 Ua binoan aek i otik, asa diburi hamu totmuna, jala mangunsande hamu di toru ni hau on. ᯥᯀ ᯅᯪᯉᯬᯀᯉ᯲ ᯀᯀᯄᯩ᯦᯲ ᯤ ᯀᯬᯖᯄ᯦ᯪ᯲ ᯀᯘ ᯑᯪᯅᯮᯒᯪ ᯂᯔᯮ ᯖᯖᯬ᯲ᯔᯮᯉ, ᯐᯞ ᯔᯝᯉᯮ᯲ᯘᯉ᯲ᯑᯩ ᯂᯔᯮ ᯑᯪ ᯖᯬᯒᯮ ᯉᯪ ᯂᯥ ᯀᯉᯬ᯲
5 Asa huboan sagusagu santopik, gabe togar rohamuna, dung i tulus hamu, ai ala ni do umbahen na ro hamu tu lambung ni naposomuna on. Jadi ninna nasida ma: Bahen ma songon na nidokmu. ᯀᯘ ᯂᯮᯅᯬᯀᯉ᯲ ᯘᯎᯮᯘᯎᯮ ᯘᯉ᯲ᯖᯬᯇᯄ᯦ᯪ᯲, ᯎᯅᯩ ᯖᯬᯎᯒ᯲ ᯒᯬᯂᯔᯮᯉ, ᯑᯮᯰ ᯤ ᯖᯮᯞᯘᯮ᯲ ᯂᯔᯮ, ᯀᯤ ᯀᯞ ᯉᯪ ᯑᯬ ᯀᯔᯮ᯲ᯅᯂᯉᯩ᯲ ᯉ ᯒᯬ ᯂᯔᯮ ᯖᯮ ᯞᯔ᯲ᯅᯮᯰ ᯉᯪ ᯉᯇᯬᯘᯬᯔᯮᯉ ᯀᯉᯬ᯲. ᯐᯑᯪ ᯉᯉᯪ᯲ᯉ ᯉᯘᯪᯑ ᯔ : ᯅᯂᯉᯩ᯲ ᯔ ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ᯔᯮ
6 Dung i humalaput ma si Abraham tu undungundungna, mandapothon si Sarah, ninna ma: Halaputi ma ne niitak arga tolu bale, dogili bahen sagusagu! ᯑᯮᯰ ᯤ ᯂᯮᯔᯞᯇᯖᯮ᯲ ᯔ ᯘᯪ ᯀᯅ᯲ᯒᯂᯔ᯲ ᯖᯮ ᯀᯉᯮ᯲ᯑᯮᯝᯉᯮ᯲ᯑᯮᯰᯉ, ᯔᯉ᯲ᯑᯇᯖᯬ᯲ᯂᯉᯬ᯲ ᯘᯪ ᯘᯒᯂ᯲, ᯉᯉᯪ᯲ᯉ ᯔ : ᯂᯞᯇᯮᯖᯪ ᯔ ᯉᯩ ᯉᯪᯤᯖᯄ᯦᯲ ᯀᯒ᯲ᯎ ᯖᯬᯞᯮ ᯅᯞᯩ, ᯑᯬᯎᯪᯞᯪ ᯅᯂᯉᯩ᯲ ᯘᯎᯮᯘᯎᯮ !
7 Marlojong ma ianggo si Abraham manopot inganan ni lombu, jala dibuat anak ni lombu sada na mokmok, jala na uli, dilehon ma tu naposo, na humalaput paulihon i. ᯔᯒ᯲ᯞᯬᯐᯬᯰ ᯔ ᯤᯀᯰᯎᯬ ᯘᯪ ᯀᯅ᯲ᯒᯂᯔ᯲ ᯔᯉᯬᯇᯖᯬ᯲ ᯤᯝᯉᯉ᯲ ᯉᯪ ᯞᯔᯬ᯲ᯅᯮ, ᯐᯞ ᯑᯪᯅᯮᯀᯖ᯲ ᯀᯉᯄ᯦᯲ ᯉᯪ ᯞᯔᯬ᯲ᯅᯮ ᯘᯑ ᯉ ᯔᯄ᯦ᯬ᯲ᯔᯄ᯦ᯬ᯲, ᯐᯞ ᯉ ᯥᯞᯪ, ᯑᯪᯞᯩᯂᯉᯬ᯲ ᯔ ᯖᯮ ᯉᯇᯬᯘᯬ, ᯉ ᯂᯮᯔᯞᯇᯖᯮ᯲ ᯇᯥᯞᯪᯂᯉᯬ᯲ ᯤ
8 Dung i diboan si Abraham ma susu na nialhotan dohot susu na tata dohot anak ni lombu na pinauli i, jala dipampeakkon tu jolonasida; jongjong ma ianggo ibana di lambungnasida, di toru ni hau i, jadi mangan ma nasida. ᯑᯮᯰ ᯤ ᯑᯪᯅᯬᯀᯉ᯲ ᯘᯪ ᯀᯅ᯲ᯒᯂᯔ᯲ ᯔ ᯘᯮᯘᯮ ᯉ ᯉᯪᯀᯞ᯲ᯂᯬᯖᯉ᯲ ᯑᯬᯂᯖᯬ᯲ ᯘᯮᯘᯮ ᯉ ᯖᯖ ᯑᯬᯂᯖᯬ᯲ ᯀᯉᯄ᯦᯲ ᯉᯪ ᯞᯔᯬ᯲ᯅᯮ ᯉ ᯇᯪᯉᯥᯞᯪ ᯤ, ᯐᯞ ᯑᯪᯇᯔ᯲ᯇᯩᯀᯄ᯦᯲ᯄ᯦ᯉᯬ᯲ ᯖᯮ ᯐᯬᯞᯬᯉᯘᯪᯑ : ᯐᯬᯰᯐᯬᯰ ᯔ ᯤᯀᯰᯎᯬ ᯤᯅᯉ ᯑᯪ ᯞᯔ᯲ᯅᯮᯰᯉᯘᯪᯑ, ᯑᯪ ᯖᯬᯒᯮ ᯉᯪ ᯂᯥ ᯤ, ᯐᯑᯪ ᯔᯝᯉ᯲ ᯔ ᯉᯘᯪᯑ
Bagabaga taringot tu hatutubu ni si Isak tu si Sarah, hape ndang dihaporseai rohana 9-15. ᯅᯎᯅᯎ ᯖᯒᯪᯝᯖᯬ᯲ ᯖᯮ ᯂᯖᯮᯖᯮᯅᯮ ᯉᯪ ᯘᯪ ᯤᯘᯄ᯦᯲ ᯖᯮ ᯘᯪ ᯘᯒᯂ᯲, ᯂᯇᯩ ᯉ᯲ᯑᯰ ᯑᯪᯂᯇᯒᯬ᯲ᯘᯩᯀᯤ ᯒᯬᯂᯉ ᯘᯪᯀ – ᯘᯔ᯲ᯇᯮᯞᯮ ᯞᯪᯔ
II. 9 Dung i ninna nasida ma tu ibana: Didia do si Sarah, jolmami? Di undungundung indi do, ninna. ᯑᯮᯰ ᯤ ᯉᯉᯪ᯲ᯉ ᯉᯘᯪᯑ ᯔ ᯖᯮ ᯤᯅᯉ : ᯑᯪᯑᯪᯀ ᯑᯬ ᯘᯪ ᯘᯒᯂ᯲ ᯐᯞᯬ᯲ᯔᯔᯪ ? ᯑᯪ ᯀᯉᯮ᯲ᯑᯮᯝᯉᯮ᯲ᯑᯮᯰ ᯉ᯲ᯑᯪ ᯑᯬ, ᯉᯉᯪ᯲ᯉ
10 Dung i didok ma: Sai na mulak do Ahu tu ho taon i songon on, ida adong ma anak ni si Sarah, jolmami. Dohot ma si Sarah umbegesa sian balik ni pintu ni undungundung, hajongjonganna i. ᯑᯮᯰ ᯤ ᯑᯪᯑᯄ᯦ᯬ᯲ ᯔ : ᯘᯤ ᯔᯮᯞᯄ᯦᯲ ᯑᯬ ᯀᯂᯮ ᯖᯮ ᯂᯬ ᯖᯀᯉᯬ᯲ ᯤ ᯘᯬᯝᯉᯬ᯲ ᯀᯉᯬ᯲, ᯤᯑ ᯀᯑᯬᯰ ᯔ ᯀᯉᯄ᯦᯲ ᯉᯪ ᯘᯪ ᯘᯒᯂ᯲, ᯐᯞᯬ᯲ᯔᯔᯪ : ᯑᯬᯂᯖᯬ᯲ ᯔ ᯘᯪ ᯘᯒᯂ᯲ ᯀᯔᯮ᯲ᯅᯩᯎᯩᯘ ᯘᯪᯀᯉ᯲ ᯅᯞᯄ᯦ᯪ᯲ ᯇᯉᯪ᯲ᯖᯮ ᯉᯪ ᯀᯉᯮ᯲ᯑᯮᯝᯉᯮ᯲ᯑᯮᯰ, ᯂᯐᯬᯰᯐᯬᯝᯉ᯲ᯉ ᯤ
11 Alai nunga pola sarimatua be si Abraham dohot si Sarah, nunga pola montok si Sarah marningot hasomalan ni boruboru hian. ᯀᯞᯤ ᯉᯮᯝ ᯇᯬᯞ ᯘᯒᯪᯔᯖᯮᯀ ᯅᯩ ᯘᯪ ᯀᯅ᯲ᯒᯂᯔ᯲ ᯑᯬᯂᯖᯬ᯲ ᯘᯪ ᯘᯒᯂ᯲, ᯉᯮᯝ ᯇᯬᯞ ᯔᯉᯬ᯲ᯖᯄ᯦ᯬ᯲ ᯘᯪ ᯘᯒᯂ᯲ ᯔᯒ᯲ᯉᯪᯝᯖᯬ᯲ ᯂᯘᯬᯔᯞᯉ᯲ ᯉᯪ ᯅᯬᯒᯮᯅᯬᯒᯮ ᯂᯪᯀᯉ᯲
12 Jadi mengkel ma si Sarah di bagasan rohana, ninna ma: Dung matua pe ahu hape, asa adong di ahu si las ni roha, ubanon dohot rajangku? ᯐᯑᯪ ᯔᯰᯩᯄ᯦ᯞᯩ᯲ ᯔ ᯘᯪ ᯘᯒᯂ᯲ ᯑᯪ ᯅᯎᯘᯉ᯲ ᯒᯬᯂᯉ, ᯉᯉᯪ᯲ᯉ ᯔ : ᯑᯮᯰ ᯔᯖᯮᯀ ᯇᯩ ᯀᯂᯮ ᯂᯇᯩ, ᯀᯘ ᯀᯑᯬᯰ ᯑᯪ ᯀᯂᯮ ᯘᯪ ᯞᯘ᯲ ᯉᯪ ᯒᯬᯂ : ᯥᯅᯉᯉᯬ᯲ ᯑᯬᯂᯖᯬ᯲ ᯒᯐᯰᯄ᯦ᯮ
13 Dung i ninna Jahowa ma tu si Abraham: Boasa ma tung parengkelan ni si Sarah hatangki ninna do: Tung na tutu ma ulaning ahu manubuhon, dung matua ahu? ᯑᯮᯰ ᯤ ᯉᯉᯪ᯲ᯉ ᯐᯂᯬᯋ ᯔ ᯖᯮ ᯘᯪ ᯀᯅ᯲ᯒᯂᯔ᯲ : ᯅᯬᯀᯘ ᯔ ᯖᯮᯰ ᯇᯒᯰᯩᯄᯩ᯦ᯞᯉ᯲ ᯉᯪ ᯘᯪ ᯘᯒᯂ᯲ ᯂᯖᯰᯄ᯦ᯪ ᯉᯉᯪ᯲ᯉ ᯑᯬ : ᯖᯮᯰ ᯉ ᯖᯮᯖᯮ ᯔ ᯥᯞᯉᯪᯰ ᯀᯂᯮ ᯔᯉᯮᯅᯮᯂᯉᯬ᯲, ᯑᯮᯰ ᯔᯖᯮᯀ ᯀᯂᯮ ?
14 Adong do huroha, na so tarpatupa Jahowa? Sai na mulak do Ahu manopot ho taon i songon on, jala adong ma anak sada di si Sarah. ᯀᯑᯬᯰ ᯑᯬ ᯂᯮᯒᯬᯂ, ᯉ ᯘᯬ ᯖᯒ᯲ᯇᯖᯮᯇ ᯐᯂᯬᯋ ? ᯘᯤ ᯉ ᯔᯮᯞᯄ᯦᯲ ᯑᯬ ᯀᯂᯮ ᯔᯉᯬᯇᯖᯬ᯲ ᯂᯬ ᯖᯀᯉᯬ᯲ ᯤ ᯘᯬᯝᯉᯬ᯲ ᯀᯉᯬ᯲, ᯐᯞ ᯀᯑᯬᯰ ᯔ ᯀᯉᯄ᯦᯲ ᯘᯑ ᯑᯪ ᯘᯪ ᯘᯒᯂ᯲
15 Jadi ninna si Sarah ma mansoadahon: Ndang na mengkel ahu, ai na mabiar do ibana; alai ninna Jahowa ma: Ndangana, ai na mengkel do ho tutu. ᯐᯑᯪ ᯉᯉᯪ᯲ᯉ ᯘᯪ ᯘᯒᯂ᯲ ᯔ ᯔᯉ᯲ᯘᯬᯀᯑᯂᯉᯬ᯲ : ᯉ᯲ᯑᯰ ᯉ ᯔᯰᯩᯄ᯦ᯞᯩ᯲ ᯀᯂᯮ, ᯀᯤ ᯉ ᯔᯅᯪᯀᯒ᯲ ᯑᯬ ᯤᯅᯉ, ᯀᯞᯤ ᯉᯉᯪ᯲ᯉ ᯐᯂᯬᯋ ᯔ : ᯉ᯲ᯑᯝᯉ, ᯀᯤ ᯉ ᯔᯰᯩᯄ᯦ᯞᯩ᯲ ᯑᯬ ᯂᯬ ᯖᯮᯖᯮ
Lumbalumba taringot tu parsorion ni Sodom. Pangondihon ni si Abraham 16-33. ᯞᯔᯮ᯲ᯅᯞᯔᯮ᯲ᯅ ᯖᯒᯪᯝᯖᯬ᯲ ᯖᯮ ᯇᯒ᯲ᯘᯬᯒᯪᯀᯉᯬ᯲ ᯉᯪ ᯘᯬᯑᯔᯬ᯲. ᯇᯝᯉᯬ᯲ᯑᯪᯂᯉᯬ᯲ ᯉᯪ ᯘᯪ ᯀᯅ᯲ᯒᯂᯔ᯲ ᯘᯔ᯲ᯇᯮᯞᯮ ᯀᯬᯉᯔᯬ᯲ – ᯖᯬᯞᯮᯇᯮᯞᯮ ᯖᯬᯞᯮ
III. 16 Dung i hehe ma sian i na tolu baoa i, ditondong ma dompak Sodom; jadi dipataru si Abraham ma nasida. ᯑᯮᯰ ᯤ ᯂᯩᯂᯩ ᯔ ᯘᯪᯀᯉ᯲ ᯤ ᯉ ᯖᯬᯞᯮ ᯅᯀᯬᯀ ᯤ, ᯑᯪᯖᯉᯬ᯲ᯑᯬᯰ ᯔ ᯑᯔᯬ᯲ᯇᯄ᯦᯲ ᯘᯬᯑᯔᯬ᯲ : ᯐᯑᯪ ᯑᯪᯇᯖᯒᯮ ᯘᯪ ᯀᯅ᯲ᯒᯂᯔ᯲ ᯔ ᯉᯘᯪᯑ
17 Dung i ninna Jahowa ma: Tung pamorso ma Ahu maradophon si Abraham taringot tu na naeng bahenonku? ᯑᯮᯰ ᯤ ᯉᯉᯪ᯲ᯉ ᯐᯂᯬᯋ ᯔ : ᯖᯮᯰ ᯇᯔᯒᯬ᯲ᯘᯬ ᯔ ᯀᯂᯮ ᯔᯒᯑᯇᯬ᯲ᯂᯉᯬ᯲ ᯘᯪ ᯀᯅ᯲ᯒᯂᯔ᯲ ᯖᯒᯪᯝᯖᯬ᯲ ᯖᯮ ᯉ ᯉᯀᯰᯩ ᯅᯂᯩᯉᯉᯬ᯲ᯄ᯦ᯮ ?
18 Sai na gabe bangso na balga jala na sangap do si Abraham sogot, jala dapotan pasupasu marhitehite ibana nasa bangso di tano on. ᯘᯤ ᯉ ᯎᯅᯩ ᯅᯰᯘᯬ ᯉ ᯅᯞ᯲ᯎ ᯐᯞ ᯉ ᯘᯝᯇ᯲ ᯑᯬ ᯘᯪ ᯀᯅ᯲ᯒᯂᯔ᯲ ᯘᯬᯎᯖᯬ᯲, ᯐᯞ ᯑᯇᯬᯖᯉ᯲ ᯇᯘᯮᯇᯘᯮ ᯔᯒ᯲ᯂᯪᯖᯩᯂᯪᯖᯩ ᯤᯅᯉ ᯉᯘ ᯅᯰᯘᯬ ᯑᯪ ᯖᯉᯬ ᯀᯉᯬ᯲
19 Ai hutanda do ibana, sai na tonaanna muse angka anakna dohot pinomparna di pudina, asa diingot nasida dalan ni Jahowa mangulahon hatigoran dohot uhum, asa dipatolhas Jahowa tu si Abraham na pinarbagabagana tu ibana. ᯀᯤ ᯂᯮᯖᯉ᯲ᯑ ᯑᯬ ᯤᯅᯉ, ᯘᯤ ᯉ ᯖᯬᯉᯀᯉ᯲ᯉ ᯔᯮᯘᯩ ᯀᯰᯄ᯦ ᯀᯉᯄ᯦᯲ᯉ ᯑᯬᯂᯖᯬ᯲ ᯇᯪᯉᯔᯬ᯲ᯇᯒ᯲ᯉ ᯑᯪ ᯇᯮᯑᯪᯉ, ᯀᯘ ᯑᯪᯤᯝᯖᯬ᯲ ᯉᯘᯪᯑ ᯑᯞᯉ᯲ ᯉᯪ ᯐᯂᯬᯋ ᯔᯝᯮᯞᯂᯉᯬ᯲ ᯂᯖᯪᯎᯬᯒᯉ᯲ ᯑᯬᯂᯖᯬ᯲ ᯥᯂᯔᯮ᯲, ᯀᯘ ᯑᯪᯇᯖᯞᯬ᯲ᯂᯘ᯲ ᯐᯂᯬᯋ ᯖᯮ ᯘᯪ ᯀᯅ᯲ᯒᯂᯔ᯲ ᯉ ᯇᯪᯉᯒ᯲ᯅᯎᯅᯎᯉ ᯖᯮ ᯤᯅᯉ
20 Dung i didok Jahowa ma: Maungaung do angguhangguk badar sian Sodom dohot Gomorra, ai manahatang do dosanasida i. ᯑᯮᯰ ᯤ ᯑᯪᯑᯄ᯦ᯬ᯲ ᯐᯂᯬᯋ ᯔ : ᯔᯥᯝᯀᯮᯰ ᯑᯬ ᯀᯰᯎᯮᯂᯰᯎᯄ᯦ᯮ᯲ ᯅᯑᯒ᯲ ᯘᯪᯀᯉ᯲ ᯘᯬᯑᯔᯬ᯲ ᯑᯬᯂᯖᯬ᯲ ᯎᯬᯔᯒᯬ᯲ᯒ, ᯀᯤ ᯔᯉᯂᯖᯰ ᯑᯬ ᯑᯬᯘᯉᯘᯪᯑ ᯤ
21 Na tuat ma Ahu, asa huida manang na sun hinajahat ni na niulanasida i, hombar tu angguhangguk na tolhas i tu Ahu, molo ndang, gabe huboto. ᯉ ᯖᯮᯀᯖ᯲ ᯔ ᯀᯂᯮ, ᯀᯘ ᯂᯮᯤᯑ ᯔᯉᯰ ᯉ ᯘᯉᯮ᯲ ᯂᯪᯉᯐᯂᯖ᯲ ᯉᯪ ᯉ ᯉᯪᯥᯞᯉᯘᯪᯑ ᯤ, ᯂᯔᯬ᯲ᯅᯒ᯲ ᯖᯮ ᯀᯰᯎᯮᯂᯰᯎᯄ᯦ᯮ᯲ ᯉ ᯖᯞᯬ᯲ᯂᯘ ᯖᯮ ᯀᯂᯮ, ᯔᯬᯞᯬ ᯉ᯲ᯑᯰ, ᯎᯅᯩ ᯂᯮᯅᯬᯖᯬ
22 Dung i manirpang ma sian i na dua baoa i mardalan dompak Sodom; alai jongjong dope ianggo si Abraham di jolo ni Jahowa. ᯑᯮᯰ ᯤ ᯔᯉᯒᯪ᯲ᯇᯰ ᯔ ᯘᯪᯀᯉ᯲ ᯤ ᯉ ᯑᯮᯀ ᯅᯀᯬᯀ ᯤ ᯔᯒ᯲ᯑᯞᯉ᯲ ᯑᯔᯬ᯲ᯇᯄ᯦᯲ ᯘᯬᯑᯔᯬ᯲ : ᯀᯞᯤ ᯐᯬᯰᯐᯬᯰ ᯑᯬᯇᯩ ᯤᯀᯰᯎᯬ ᯘᯪ ᯀᯅ᯲ᯒᯂᯔ᯲ ᯑᯪ ᯐᯬᯞᯬ ᯉᯪ ᯐᯂᯬᯋ
23 Dung i dipajonok si Abraham, jala ninna ma: Tung ripashononmu ma na tigor rap dohot parjahat? ᯑᯮᯰ ᯤ ᯑᯪᯇᯐᯬᯉᯄ᯦ᯬ᯲ ᯘᯪ ᯀᯅ᯲ᯒᯂᯔ᯲, ᯐᯞ ᯉᯉᯪ᯲ᯉ ᯔ : ᯖᯮᯰ ᯒᯪᯇᯘ᯲ᯂᯬᯉᯉᯬ᯲ᯔᯮ ᯔ ᯉ ᯖᯪᯎᯒᯬ᯲ ᯒᯇ᯲ ᯑᯬᯂᯖᯬ᯲ ᯇᯒ᯲ᯐᯂᯖ᯲ ?
24 Atek tung adong limapulu halak, angka na tigor di bagasan huta i, tung ripashononmu ma i, ndang olananmu huta i ala na limapulu na tigor i, angka na di bagasan i. ᯀᯖᯄᯩ᯦᯲ ᯖᯮᯰ ᯀᯑᯬᯰ ᯞᯪᯔᯇᯮᯞᯮ ᯂᯞᯄ᯦᯲, ᯀᯰᯄ᯦ ᯉ ᯖᯪᯎᯒᯬ᯲ ᯑᯪ ᯅᯎᯘᯉ᯲ ᯂᯮᯖ ᯤ, ᯖᯮᯰ ᯒᯪᯇᯘ᯲ᯂᯬᯉᯉᯬ᯲ᯔᯮ ᯔ ᯤ, ᯉ᯲ᯑᯰ ᯀᯬᯞᯉᯉ᯲ᯔᯮ ᯂᯮᯖ ᯤ ᯀᯞ ᯉ ᯞᯪᯔᯇᯮᯞᯮ ᯉ ᯖᯪᯎᯒᯬ᯲ ᯤ, ᯀᯰᯄ᯦ ᯉ ᯑᯪ ᯅᯎᯘᯉ᯲ ᯤ
25 Dao ma i sian Ho mangulahon sisongon i: mambunu na tigor rap dohot parjahat; tung sobokkon parjahat ma na tigor i? Palias ma i sian Ho, tung na so uhum ma bahenon ni Siuhumi liat portibi on? ᯑᯀᯬ ᯔ ᯤ ᯘᯪᯀᯉ᯲ ᯂᯬ ᯔᯝᯮᯞᯂᯉᯬ᯲ ᯘᯪ ᯘᯬᯝᯉᯬ᯲ ᯤ : ᯔᯔ᯲ᯅᯮᯉᯮ ᯉ ᯖᯪᯎᯒᯬ᯲ ᯒᯇ᯲ ᯑᯬᯂᯖᯬ᯲ ᯇᯒ᯲ᯐᯂᯖ᯲ : ᯖᯮᯰ ᯘᯬᯅᯄ᯦ᯬ᯲ᯄ᯦ᯉᯬ᯲ ᯇᯒ᯲ᯐᯂᯖ᯲ ᯔ ᯉ ᯖᯪᯎᯒᯬ᯲ ᯤ ? ᯇᯞᯪᯀᯘ᯲ ᯔ ᯤ ᯘᯪᯀᯉ᯲ ᯂᯬ, ᯖᯮᯰ ᯉ ᯘᯬ ᯥᯂᯔᯮ᯲ ᯔ ᯅᯂᯩᯉᯉᯬ᯲ ᯉᯪ ᯘᯪᯥᯂᯮᯔᯪ ᯞᯪᯀᯖ᯲ ᯇᯒᯬ᯲ᯖᯪᯅᯪ ᯀᯉᯬ᯲ ?
26 Jadi ninna Jahowa ma: Molo tung jumpang Ahu di bagasan huta Sodom limapulu halak, angka na tigor, sai ma olanangku na saluat i ala nasida. ᯐᯑᯪ ᯉᯉᯪ᯲ᯉ ᯐᯂᯬᯋ ᯔ : ᯔᯬᯞᯬ ᯖᯮᯰ ᯐᯔᯮ᯲ᯇᯰ ᯀᯂᯮ ᯑᯪ ᯅᯎᯘᯉ᯲ ᯂᯮᯖ ᯘᯬᯑᯔᯬ᯲ ᯞᯪᯔᯇᯮᯞᯮ ᯂᯞᯄ᯦᯲, ᯀᯰᯄ᯦ ᯉ ᯖᯪᯎᯒᯬ᯲, ᯘᯤ ᯔ ᯀᯬᯞᯉᯰᯄ᯦ᯮ ᯉ ᯘᯞᯮᯀᯖ᯲ ᯤ ᯀᯞ ᯉᯘᯪᯑ
27 Dung i ninna si Abraham ma mangalusi: Sombangku ale Tuhan, nunga sapala hum ahu mamungka mangkatai dohot Ho; atek pe orbuk jala sirabun ahu. ᯑᯮᯰ ᯤ ᯉᯉᯪ᯲ᯉ ᯘᯪ ᯀᯅ᯲ᯒᯂᯔ᯲ ᯔ ᯔᯝᯞᯮᯘᯪ : ᯘᯔᯬ᯲ᯅᯰᯄ᯦ᯮ ᯀᯞᯩ ᯖᯮᯂᯉ᯲, ᯉᯮᯝ ᯘᯇᯞ ᯂᯔᯮ᯲ ᯀᯂᯮ ᯔᯔᯮᯰᯄ᯦ ᯔᯰᯄ᯦ᯖᯤ ᯑᯬᯂᯖᯬ᯲ ᯂᯬ : ᯀᯖᯄᯩ᯦ ᯇᯩ ᯀᯒᯬ᯲ᯅᯄ᯦ᯮ᯲ ᯐᯞ ᯘᯪᯒᯅᯉᯮ᯲ ᯀᯂᯮ
28 Ua tung moru lima halak sian na limapulu angka na pintor i, tung ripashononmu ma luhut huta i ala ni na lima i? Jadi ninna ma: Ndang ripashononku molo tung jumpang Ahu disi opatpulu lima. ᯥᯀ ᯖᯮᯰ ᯔᯬᯒᯮ ᯞᯪᯔ ᯂᯞᯄ᯦᯲ ᯘᯪᯀᯉ᯲ ᯉ ᯞᯪᯔᯇᯮᯞᯮ ᯤ ᯀᯰᯄ᯦ ᯉ ᯇᯉᯪ᯲ᯖᯒᯬ᯲ ᯤ, ᯖᯮᯰ ᯒᯪᯇᯘ᯲ᯂᯬᯉᯉᯬ᯲ᯔᯮ ᯔ ᯞᯮᯂᯖᯮ᯲ ᯂᯮᯖ ᯤ ᯀᯞ ᯉᯪ ᯉ ᯞᯪᯔ ᯤ ? ᯐᯑᯪ ᯉᯉᯪ᯲ᯉ ᯔ : ᯉ᯲ᯑᯰ ᯒᯪᯇᯘ᯲ᯂᯬᯉᯉᯬ᯲ᯄ᯦ᯮ ᯔᯬᯞᯬ ᯖᯮᯰ ᯐᯔᯮ᯲ᯇᯰ ᯀᯂᯮ ᯑᯪᯘᯪ ᯀᯬᯇᯖ᯲ᯇᯮᯞᯮ ᯞᯪᯔ
29 Dung i diulahi si Abraham muse dope mandok tu Ibana, ninna ma: Ua tung opatpulu jumpang disi! Jadi ninna Jahowa ma: Ndang hahuaonku nasida ala ni na opatpulu i. ᯑᯮᯰ ᯤ ᯑᯪᯀᯞᯮᯘᯪ ᯘᯪ ᯀᯅ᯲ᯒᯂᯔ᯲ ᯔᯮᯘᯩ ᯑᯬᯇᯩ ᯔᯉ᯲ᯑᯄ᯦ᯬ᯲ ᯖᯮ ᯤᯅᯉ ᯉᯉᯪ᯲ᯉ ᯔ : ᯥᯀ ᯖᯮᯰ ᯀᯬᯇᯖ᯲ᯇᯮᯞᯮ ᯐᯔᯮ᯲ᯇᯰ ᯑᯪᯘᯪ ! ᯐᯑᯪ ᯉᯉᯪ᯲ᯉ ᯐᯂᯬᯋ ᯔ : ᯉ᯲ᯑᯰ ᯂᯂᯮᯀᯀᯉᯬ᯲ᯄ᯦ᯮ ᯉᯘᯪᯑ ᯀᯞ ᯉᯪ ᯉ ᯀᯬᯇᯖ᯲ᯇᯮᯞᯮ ᯤ
30 Dung i ninna si Abraham ma: Ua unang tung tarrimas Ho, ale Tuhan, ala hudatdati mandok: Atek tung jumpang disi tolupulu! Jadi ninna Jahowa ma: Ndang hahuaonku nasida, molo tung jumpang Ahu tolupulu disi. ᯑᯮᯰ ᯤ ᯉᯉᯪ᯲ᯉ ᯘᯪ ᯀᯅ᯲ᯒᯂᯔ᯲ ᯔ : ᯥᯀ ᯥᯉᯰ ᯖᯮᯰ ᯖᯒ᯲ᯒᯪᯔᯘ᯲ ᯂᯬ ᯀᯞᯩ ᯖᯮᯂᯉ᯲, ᯀᯞ ᯂᯮᯑᯖ᯲ᯑᯖᯪ ᯔᯉ᯲ᯑᯄ᯦ᯬ᯲ : ᯀᯖᯄᯩ᯦᯲ ᯐᯔᯮ᯲ᯇᯰ ᯑᯪᯘᯪ ᯖᯬᯞᯮᯇᯮᯞᯮ ! ᯐᯑᯪ ᯉᯉᯪ᯲ᯉ ᯐᯂᯬᯋ ᯔ : ᯉ᯲ᯑᯰ ᯂᯂᯮᯀᯀᯉᯬ᯲ᯄ᯦ᯮ ᯉᯘᯪᯑ, ᯔᯬᯞᯬ ᯖᯮᯰ ᯐᯔᯮ᯲ᯇᯰ ᯀᯂᯮ ᯖᯬᯞᯮᯇᯮᯞᯮ ᯑᯪᯘᯪ
31 Dung i ninna si Abraham ma: Ida ma, nunga sapala hum ahu mamungka mandok tu Tuhanki: Ua tung jumpang disi duapulu. Jadi ninna Jahowa ma: Ndang ripashononku ala ni na duapulu i. ᯑᯮᯰ ᯤ ᯉᯉᯪ᯲ᯉ ᯘᯪ ᯀᯅ᯲ᯒᯂᯔ᯲ ᯔ : ᯤᯑ ᯔ, ᯉᯮᯝ ᯘᯇᯞ ᯂᯔᯮ᯲ ᯀᯂᯮ ᯔᯔᯮᯰᯄ᯦ ᯔᯉ᯲ᯑᯄ᯦ᯬ᯲ ᯖᯮ ᯖᯮᯂᯉ᯲ᯄ᯦ᯪ : ᯥᯀ ᯖᯮᯰ ᯐᯔᯮ᯲ᯇᯰ ᯑᯪᯘᯪ ᯑᯮᯀᯇᯮᯞᯮ. ᯐᯮᯑᯪ ᯉᯉᯪ᯲ᯉ ᯐᯂᯬᯋ ᯔ : ᯉ᯲ᯑᯰ ᯒᯪᯇᯘ᯲ᯂᯬᯉᯉᯬ᯲ᯄ᯦ᯮ ᯀᯞ ᯉᯪ ᯉ ᯑᯮᯀᯇᯮᯞᯮ ᯤ
32 Jadi ninna si Abraham ma: Unang tung tarrimas Ho, ale Tuhanki, ala na mandok ahu dope holan sahali on: Atek tung jumpang disi sampulu? Jadi ninna Jahowa ma: Ndang ripashononku nasida ala ni na sampulu i. ᯐᯑᯪ ᯉᯉᯪ᯲ᯉ ᯘᯪ ᯀᯅ᯲ᯒᯂᯔ᯲ ᯔ : ᯥᯉᯰ ᯖᯮᯰ ᯖᯒ᯲ᯒᯪᯔᯘ᯲ ᯂᯬ ᯀᯞᯩ ᯖᯮᯂᯉ᯲ᯄ᯦ᯪ, ᯀᯞ ᯉ ᯔᯉ᯲ᯑᯄ᯦ᯬ᯲ ᯀᯂᯮ ᯑᯬᯇᯩ ᯂᯬᯞᯉ᯲ ᯘᯂᯞᯪ ᯀᯉᯬ᯲ : ᯀᯖᯄᯩ᯦᯲ ᯖᯮᯰ ᯐᯔᯮ᯲ᯇᯰ ᯑᯪᯘᯪ ᯘᯔ᯲ᯇᯮᯞᯮ? ᯐᯑᯪ ᯉᯉᯪ᯲ᯉ ᯐᯂᯬᯋ ᯔ : ᯉ᯲ᯑᯰ ᯒᯪᯇᯘ᯲ᯂᯬᯉᯉᯬ᯲ᯄ᯦ᯮ ᯀᯞ ᯉᯪ ᯉ ᯘᯔ᯲ᯇᯮᯞᯮ ᯤ
33 Jadi dung sun Jahowa mangkatai dohot si Abraham, laho ma Ibana, mulak ma dohot si Abraham tu ingananna. ᯐᯑᯪ ᯑᯮᯰ ᯘᯉᯮ᯲ ᯐᯂᯬᯋ ᯔᯰᯄ᯦ᯖᯤ ᯑᯬᯂᯖᯬ᯲ ᯘᯪ ᯀᯅ᯲ᯒᯂᯔ᯲, ᯞᯂᯬ ᯔ ᯤᯅᯉ, ᯔᯮᯞᯄ᯦᯲ ᯔ ᯑᯬᯂᯖᯬ᯲ ᯘᯪ ᯀᯅ᯲ᯒᯂᯔ᯲ ᯖᯮ ᯤᯝᯉᯉ᯲ᯉ