Hatutubu ni si Isak 1-8. ᯂᯖᯮᯖᯮᯅᯮ ᯉᯪ ᯘᯪ ᯤᯘᯄ᯦᯲ ᯘᯑ – ᯥᯀᯞᯮ
Hababali ni si Ismael 9-16. ᯂᯅᯅᯞᯪ ᯉᯪ ᯘᯪ ᯀᯪᯘ᯲ᯔᯀᯩᯞ᯲ ᯘᯪᯀ – ᯘᯔ᯲ᯇᯮᯞᯮ ᯀᯬᯉᯬᯔ᯲
Bagabaga ni Debata tu si Hagar 17-21. ᯅᯎᯅᯎ ᯉᯪ ᯑᯩᯅᯖ ᯖᯮ ᯘᯪ ᯂᯎᯒ᯲
Parpadanan ni si Abimelek tu si Abraham 22-34. ᯇᯒ᯲ᯇᯑᯉᯉ᯲ ᯉᯪ ᯘᯪ ᯀᯅᯪᯔᯩᯞᯩᯄ᯦᯲ ᯖᯮ ᯘᯪ ᯀᯅ᯲ᯒᯂᯔ᯲
Hatutubu ni si Isak 1-8. ᯂᯖᯮᯖᯮᯅᯮ ᯉᯪ ᯘᯪ ᯤᯘᯄ᯦᯲ ᯘᯑ – ᯥᯀᯞᯮ
I. 1 Dung i ditatap Jahowa ma si Sarah, songon na nidokna i, jala dibahen Jahowa tu si Sarah songon na pinarbagana i. ᯑᯮᯰ ᯤ ᯑᯪᯖᯖᯇ᯲ ᯐᯂᯬᯋ ᯔ ᯘᯪ ᯘᯒᯂ᯲, ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ᯉ ᯤ, ᯐᯞ ᯑᯪᯅᯂᯉᯩ᯲ ᯐᯂᯬᯋ ᯖᯮ ᯘᯪ ᯘᯒᯂ᯲ ᯘᯬᯝᯉᯬ᯲ ᯉ ᯇᯪᯉᯒ᯲ᯅᯎᯉ ᯤ
2 Ai gabegabean ma si Sarah, jala ditubuhon anak sada di si Abraham, di hatutuana i, tongon di tingki, na nidok ni Debata tu ibana. ᯀᯤ ᯎᯅᯩᯎᯅᯩᯀᯉ᯲ ᯔ ᯘᯪ ᯘᯒᯂ᯲, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯘᯑ ᯑᯪ ᯘᯪ ᯀᯅ᯲ᯒᯂᯔ᯲, ᯑᯪ ᯂᯖᯮᯖᯮᯀᯉ ᯤ, ᯖᯬᯝᯉᯬ᯲ ᯑᯪ ᯖᯪᯰᯄ᯦ᯪ, ᯉ ᯉᯪᯑᯄ᯦ᯬ᯲ ᯉᯪ ᯑᯩᯅᯖ ᯖᯮ ᯤᯅᯉ
3 Dung i dibahen si Abraham ma goar ni anakna i, na tubu di ibana, tinubuhon ni si Sarah, si Isak. ᯑᯮᯰ ᯤ ᯑᯪᯅᯂᯉᯩ᯲ ᯘᯪ ᯀᯅ᯲ᯒᯂᯔ᯲ ᯔ ᯎᯬᯀᯩᯒ᯲ ᯉᯪ ᯀᯉᯄ᯦᯲ᯉ ᯤ, ᯉ ᯖᯮᯅᯮ ᯑᯪ ᯤᯅᯉ, ᯖᯪᯉᯮᯅᯮᯂᯉᯬ᯲ ᯉᯪ ᯘᯪ ᯘᯒᯂ᯲, ᯘᯪ ᯤᯘᯄ᯦᯲
4 Dung i paualubornginhon, disunat si Abraham ma si Isak, anakna i, songon na tinonahon ni Debata tu ibana. ᯑᯮᯰ ᯤ ᯇᯥᯀᯞᯮᯅᯒᯬ᯲ᯝᯉᯪ᯲ᯂᯉᯬ᯲, ᯑᯪᯘᯮᯉᯖ᯲ ᯘᯪ ᯀᯅ᯲ᯒᯂᯔ᯲ ᯔ ᯘᯪ ᯤᯘᯄ᯦᯲, ᯘᯬᯝᯉᯬ᯲ ᯉ ᯖᯪᯉᯬᯉᯂᯉᯬ᯲ ᯉᯪ ᯑᯩᯅᯖ ᯖᯮ ᯤᯅᯉ
5 Marumur saratus taon do si Abraham di na tubu i si Isak anakna i. ᯔᯒᯮᯔᯒᯮ᯲ ᯘᯒᯖᯘᯮ᯲ ᯖᯀᯉᯬ᯲ ᯑᯬ ᯘᯪ ᯀᯅ᯲ᯒᯂᯔ᯲ ᯑᯪ ᯉ ᯖᯮᯅᯮ ᯤ ᯘᯪ ᯤᯘᯄ᯦᯲ ᯀᯉᯄ᯦᯲ᯉ ᯤ
6 Jadi ninna si Sarah ma: Siparengkelon do dibahen Debata tu ahu; nasa na umbegesa parengkelanna do ahu. ᯐᯑᯪ ᯉᯉᯪ᯲ᯉ ᯘᯪ ᯘᯒᯂ᯲ ᯔ : ᯘᯪᯇᯒᯩᯰᯄ᯦ᯩᯞᯉᯬ᯲ ᯑᯬ ᯑᯪᯅᯂᯉᯩ᯲ ᯑᯩᯅᯖ ᯖᯮ ᯀᯂᯮ : ᯉᯘ ᯉ ᯀᯔᯮ᯲ᯅᯩᯎᯩᯘ ᯇᯒᯩᯰᯄ᯦ᯩᯞᯉ᯲ᯉ ᯑᯬ ᯀᯂᯮ
7 Angkup ni didok do: Tung ise ma na hum marbagahon di si Abraham, si Sarah pasusuhon anak? Ai nunga hutubuhon anak sada di hatutuana i. ᯀᯰᯄ᯦ᯇᯮ᯲ ᯉᯪ ᯑᯪᯑᯬᯄ᯦᯲ ᯑᯬ : ᯖᯮᯰ ᯤᯘᯩ ᯔ ᯉ ᯂᯔᯮ᯲ ᯔᯒ᯲ᯅᯎᯂᯉᯬ᯲ ᯑᯪ ᯘᯪ ᯀᯅ᯲ᯒᯂᯔ᯲, ᯘᯪ ᯘᯒᯂ᯲ ᯇᯘᯮᯇᯘᯮᯂᯉᯬ᯲ ᯀᯉᯄ᯦᯲ ? ᯀᯤ ᯉᯮᯝ ᯂᯮᯖᯮᯅᯮᯂᯉᯬ᯲ ᯀᯉᯄ᯦᯲ ᯘᯑ ᯑᯪ ᯂᯖᯮᯖᯮᯀᯉ ᯤ
8 Jadi dung lam balga posoposo i, jala sirang susu, marharoan bolon ma si Abraham, di ari na sirang susu i si Isak. ᯐᯑᯪ ᯑᯮᯰ ᯞᯔ᯲ ᯅᯞ᯲ᯎ ᯇᯬᯘᯬᯇᯬᯘᯬ ᯤ, ᯐᯞ ᯘᯪᯒᯰ ᯘᯮᯘᯮ, ᯔᯒ᯲ᯂᯒᯬᯀᯉ᯲ ᯅᯬᯞᯉᯬ᯲ ᯔ ᯘᯪ ᯀᯅ᯲ᯒᯂᯔ᯲, ᯑᯪ ᯀᯒᯪ ᯉ ᯘᯪᯒᯰ ᯘᯮᯘᯮ ᯤ ᯘᯪ ᯤᯘᯄ᯦᯲
Hababali ni si Ismael 9-16. ᯂᯅᯅᯞᯪ ᯉᯪ ᯘᯪ ᯀᯘᯪ᯲ᯔᯀᯞᯩ᯲ ᯘᯪᯀ – ᯘᯔ᯲ᯇᯮᯞᯮ ᯀᯬᯉᯔᯬ᯲
II. 9 Dung i sai diida si Sarah ma anak ni si Hagar, boru Misir i, na tinubuhonna di si Abraham, mangarehei. ᯑᯮᯰ ᯤ ᯘᯤ ᯑᯪᯤᯑ ᯘᯪ ᯘᯒᯂ᯲ ᯔ ᯀᯉᯄ᯦᯲ ᯉᯪ ᯘᯪ ᯂᯎᯒ᯲, ᯅᯬᯒᯮ ᯔᯪᯘᯒᯪ᯲ ᯤ, ᯉ ᯖᯪᯉᯮᯅᯮᯂᯉᯬ᯲ᯉ ᯑᯪ ᯘᯪ ᯀᯅ᯲ᯒᯂᯔ᯲, ᯔᯝᯒᯩᯂᯩᯤ
10 Jadi didok ma tu si Abraham: Pabali ma hatoban on rap dohot anakna i, ai ndang manean anak ni hatoban on rap dohot si Isak anakki. ᯐᯑᯪ ᯑᯪᯑᯄ᯦ᯬ᯲ ᯔ ᯖᯮ ᯘᯪ ᯀᯅ᯲ᯒᯂᯔ᯲ : ᯇᯅᯞᯪ ᯔ ᯂᯖᯬᯅᯉ᯲ ᯀᯉᯬ᯲ ᯒᯇ᯲ ᯑᯬᯂᯖᯬ᯲ ᯀᯉᯄ᯦᯲ᯉ ᯤ, ᯀᯤ ᯉ᯲ᯑᯰ ᯔᯉᯩᯀᯉ᯲ ᯀᯉᯄ᯦᯲ ᯉᯪ ᯂᯖᯬᯅᯉ᯲ ᯀᯉᯬ᯲ ᯒᯇ᯲ ᯑᯬᯂᯖᯬ᯲ ᯘᯪ ᯤᯘᯄ᯦᯲ ᯀᯉᯄ᯦᯲ᯄ᯦ᯪ
11 Alai sogo situtu do roha ni si Abraham di hata i, ala ni anakna i. ᯀᯞᯤ ᯘᯬᯎᯬ ᯘᯪᯖᯮᯖᯮ ᯑᯬ ᯒᯬᯂ ᯉᯪ ᯘᯪ ᯀᯅ᯲ᯒᯂᯔ᯲ ᯑᯪ ᯂᯖ ᯤ, ᯀᯞ ᯉᯪ ᯀᯉᯄ᯦᯲ᯉ ᯤ
12 Alai ninna Debata ma tu si Abraham: Unang sogo roham taringot tu dakdanak i dohot taringot tu hatobanmu; tangihon ma sude na nidok ni soara ni si Sarah tu ho, ai marhitehite si Isak do targoar di ho pinompar. ᯀᯞᯤ ᯉᯉᯪ᯲ᯉ ᯑᯩᯅᯖ ᯔ ᯖᯮ ᯘᯪ ᯀᯅ᯲ᯒᯂᯔ᯲ : ᯥᯉᯰ ᯘᯬᯎᯬ ᯒᯬᯂᯔ᯲ ᯖᯒᯪᯝᯖᯬ᯲ ᯖᯮ ᯑᯄ᯦᯲ᯑᯉᯄ᯦᯲ ᯤ ᯑᯬᯂᯖᯬ᯲ ᯖᯒᯪᯝᯖᯬ᯲ ᯖᯮ ᯂᯖᯬᯅᯉ᯲ᯔᯮ : ᯖᯝᯪᯂᯉᯬ᯲ ᯔ ᯘᯮᯑᯩ ᯉ ᯉᯪᯑᯄ᯦ᯬ᯲ ᯉᯪ ᯘᯬᯀᯒ ᯉᯪ ᯘᯪ ᯘᯒᯂ᯲ ᯖᯮ ᯂᯬ, ᯀᯤ ᯔᯒ᯲ᯂᯪᯖᯩᯂᯪᯖᯩ ᯘᯪ ᯤᯘᯄ᯦᯲ ᯑᯬ ᯖᯒ᯲ᯎᯬᯀᯒ᯲ ᯑᯪ ᯂᯬ ᯇᯪᯉᯔᯬ᯲ᯇᯒ᯲
13 Anak ni hatobanmi pe bahenonku do gabe bangso, ala pinomparmu ibana. ᯀᯉᯄ᯦᯲ ᯉᯪ ᯂᯖᯬᯅᯉ᯲ᯔᯪ ᯇᯩ ᯅᯂᯩᯉᯉᯬ᯲ᯄ᯦ᯮ ᯑᯬ ᯎᯅᯩ ᯅᯰᯘᯬ, ᯀᯞ ᯇᯪᯉᯔᯬ᯲ᯇᯒ᯲ᯔᯮ ᯤᯅᯉ
14 Jadi dipasogot si Abraham ma manogotna i hehe, dibuat ma sagusagu dohot aek satabutabu, dilehon ma i tu si Hagar, dipasandangkon ma tu abarana, dung i dipalaho ibana rap dohot dakdanak i. Jadi laho ma ibana, hape lilu do di halongonan Berseba. ᯐᯑᯪ ᯑᯪᯇᯘᯬᯎᯖᯬ᯲ ᯘᯪ ᯀᯅ᯲ᯒᯂᯔ᯲ ᯔ ᯔᯉᯬᯎᯖᯬ᯲ᯉ ᯤ ᯂᯩᯂᯩ, ᯑᯪᯅᯮᯀᯖ᯲ ᯔ ᯘᯎᯮᯘᯎᯮ ᯑᯬᯂᯖᯬ᯲ ᯀᯀᯄᯰᯩ᯲ ᯘᯖᯅᯮᯖᯅᯮ, ᯑᯪᯞᯩᯂᯉᯬ᯲ ᯔ ᯤ ᯖᯮ ᯘᯪ ᯂᯎᯒ᯲, ᯑᯪᯇᯘᯉ᯲ᯑᯰᯄ᯦ᯉᯬ᯲ ᯔ ᯖᯮ ᯀᯅᯒᯉ, ᯑᯮᯰ ᯤ ᯑᯪᯇᯞᯂᯬ ᯤᯅᯉ ᯒᯇ᯲ ᯑᯬᯂᯖᯬ᯲ ᯑᯄ᯦᯲ᯑᯉᯄ᯦᯲ ᯤ. ᯐᯑᯪ ᯞᯂᯬ ᯔ ᯤᯅᯉ, ᯂᯇᯩ ᯞᯪᯞᯮ ᯑᯬ ᯑᯪ ᯂᯞᯬᯝᯬᯉᯉ᯲ ᯅᯒᯩ᯲ᯘᯩᯅ
15 Jadi dung suda aek sian tabutabu i dipapeak ma dakdanak i tu toru ni ramba metmet. ᯐᯑᯪ ᯑᯮᯰ ᯘᯮᯑ ᯀᯀᯄᯰᯩ᯲ ᯘᯪᯀᯉ᯲ ᯖᯅᯮᯖᯅᯮ ᯤ ᯑᯪᯇᯇᯩᯀᯄ᯦᯲ ᯔ ᯑᯄ᯦᯲ᯑᯉᯄ᯦᯲ ᯤ ᯖᯮ ᯖᯬᯒᯮ ᯉᯪ ᯒᯔ᯲ᯅ ᯔᯖᯩ᯲ᯔᯖᯩ᯲
16 Dung i dipaholang ibana laho hundul arga sansinior sian i, ai ninna do: Ndang tarpaidaida ahu dakdanak i laho mate. Jadi sai hundul ibana tondong sian i, huhut dipangiar soarana jala tumatangis. ᯑᯮᯰ ᯤ ᯑᯪᯇᯂᯬᯞᯰ ᯤᯅᯉ ᯞᯂᯬ ᯂᯉᯮ᯲ᯑᯞᯮ᯲ ᯀᯒ᯲ᯎ ᯘᯉ᯲ᯘᯪᯉᯪᯀᯒᯬ᯲ ᯘᯪᯀᯉ᯲ ᯤ , ᯀᯤ ᯉᯉᯪ᯲ᯉ ᯑᯬ : ᯉ᯲ᯑᯰ ᯖᯒ᯲ᯇᯤᯑᯤᯑ ᯀᯂᯮ ᯑᯄ᯦᯲ᯑᯉᯄ᯦᯲ ᯤ ᯞᯂᯬ ᯔᯖᯩ. ᯐᯑᯪ ᯘᯤ ᯂᯉᯮ᯲ᯑᯞᯮ᯲ ᯤᯅᯉ ᯖᯉᯬ᯲ᯑᯬᯰ ᯘᯪᯀᯉ᯲ ᯤ, ᯂᯮᯂᯖᯮ᯲ ᯑᯪᯇᯝᯪᯀᯒ᯲ ᯘᯬᯀᯒᯉ ᯐᯞ ᯖᯮᯔᯖᯝᯘᯪ᯲
Bagabaga ni Debata tu si Hagar 17-21. ᯅᯎᯅᯎ ᯉᯪ ᯑᯩᯅᯖ ᯖᯮ ᯘᯪ ᯂᯎᯒ᯲
III. 17 Jadi ditangihon Debata ma soara ni dakdanak i, joujou ma suruan ni Debata sian banua ginjang di si Hagar, ninna ma mandok ibana; aha di ho ale Hagar? Unang ho mabiar, ai nunga ditangihon Debata soara ni dakdanak i sian hapeahanna i. ᯐᯑᯪ ᯑᯪᯖᯝᯪᯂᯉᯬ᯲ ᯑᯩᯅᯖ ᯔ ᯘᯬᯀᯒ ᯉᯪ ᯑᯄ᯦᯲ᯑᯉᯄ᯦᯲ ᯤ. ᯐᯬᯥᯐᯬᯥ ᯔ ᯘᯮᯒᯮᯀᯉ᯲ ᯉᯪ ᯑᯩᯅᯖ ᯘᯪᯀᯉ᯲ ᯅᯉᯮᯀ ᯎᯉᯪ᯲ᯐᯰ ᯑᯪ ᯘᯪ ᯂᯎᯒ᯲, ᯉᯉᯪ᯲ᯉ ᯔ ᯔᯉ᯲ᯑᯄ᯦ᯬ᯲ ᯤᯅᯉ : ᯀᯂ ᯑᯪ ᯂᯬ ᯀᯞᯩ ᯂᯎᯒ᯲ ? ᯥᯉᯰ ᯂᯬ ᯔᯅᯪᯀᯒ᯲, ᯀᯤ ᯉᯮᯝ ᯑᯪᯖᯝᯪᯂᯉᯬ᯲ ᯑᯩᯅᯖ ᯘᯬᯀᯒ ᯉᯪ ᯑᯄ᯦᯲ᯑᯉᯄ᯦᯲ ᯤ ᯘᯪᯀᯉ᯲ ᯂᯇᯩᯀᯂᯉ᯲ᯉ ᯤ
18 Hehe ma ho, pahehe ma dakdanak i jala togu ibana dohot tanganmu ai bahenonku do ibana gabe bangso na bolon. ᯂᯩᯂᯩ ᯔ ᯂᯬ, ᯇᯂᯩᯂᯩ ᯔ ᯑᯄ᯦᯲ᯑᯉᯄ᯦᯲ ᯤ ᯐᯞ ᯖᯬᯎᯮ ᯤᯅᯉ ᯑᯬᯂᯖᯬ᯲ ᯖᯝᯉ᯲ᯔᯮ ᯀᯤ ᯅᯂᯩᯉᯉᯬ᯲ᯄᯮ ᯑᯬ ᯤᯅᯉ ᯎᯅᯩ ᯅᯰᯘᯬ ᯉ ᯅᯬᯞᯉᯬ᯲
19 Dung i dipatonggor Debata ma mata ni si Hagar, gabe diida ma sada mual. Jadi laho ma ibana manggohi tabutabu i dohot aek, jala dipainum dakdanak i. ᯑᯮᯰ ᯤ ᯑᯪᯇᯖᯬᯰᯎᯒᯬ᯲ ᯑᯩᯅᯖ ᯔ ᯔᯖ ᯉᯪ ᯘᯪ ᯂᯎᯒ᯲ ᯎᯅᯩ ᯑᯪᯤᯑ ᯔ ᯘᯑ ᯔᯮᯀᯞ᯲. ᯐᯑᯪ ᯞᯂᯬ ᯔ ᯤᯅᯉ ᯔᯰᯎᯬᯂᯪ ᯖᯅᯮᯖᯅᯮ ᯤ ᯑᯬᯂᯖᯬ᯲ ᯀᯀᯄᯩ᯦᯲, ᯐᯞ ᯑᯪᯇᯤᯉᯔᯮ᯲ ᯑᯄ᯦᯲ᯑᯉᯄ᯦᯲ ᯤ
20 Dung i ditumpak Debata ma dakdanak i magodang, laos maringan ibana di halongonan, diula ma parsioron. ᯑᯮᯰ ᯤ ᯑᯪᯖᯔᯮ᯲ᯇᯄ᯦᯲ ᯑᯩᯅᯖ ᯔ ᯑᯄ᯦᯲ᯑᯉᯄ᯦᯲ ᯤ ᯔᯎᯬᯑᯰ, ᯞᯀᯘᯬ᯲ ᯔᯒᯪᯝᯉ᯲ ᯤᯅᯉ ᯑᯪ ᯂᯞᯬᯝᯬᯉᯉ᯲, ᯑᯪᯥᯞ ᯔ ᯇᯒ᯲ᯘᯪᯀᯬᯒᯉᯬ᯲
21 Jadi maringan ibana di halongonan Elaparan, gabe dibuat inana i ma sada boru Misir bahen jolmana. ᯐᯑᯪ ᯔᯒᯪᯝᯉ᯲ ᯤᯅᯉ ᯑᯪ ᯂᯞᯬᯝᯬᯉᯉ᯲ ᯀᯩᯞᯇᯒᯉ᯲, ᯎᯅᯩ ᯑᯪᯅᯮᯀᯖ᯲ ᯤᯉᯉ ᯤ ᯔ ᯘᯑ ᯅᯬᯒᯮ ᯔᯪᯘᯒᯪ᯲ ᯅᯂᯉᯩ᯲ ᯐᯞᯬ᯲ᯔᯉ
Parpadanan ni si Abimelek tu si Abraham 22-34. ᯇᯒ᯲ᯇᯑᯉᯉ᯲ ᯉᯪ ᯘᯪ ᯀᯅᯪᯔᯩᯞᯄᯰᯩ᯲ ᯖᯮ ᯘᯪ ᯀᯅ᯲ᯒᯂᯔ᯲
IV. 22 Dung i ro ma uju i hata ni si Abimelek dohot si Pikol, partogi ni angka paranganna i mandok tu si Abraham: Sai didongani Debata do ho di sude na niulam. ᯑᯮᯰ ᯤ ᯒᯬ ᯔ ᯥᯐᯮ ᯤ ᯂᯖ ᯉᯪ ᯘᯪ ᯀᯅᯪᯔᯩᯞᯄᯩ᯦᯲ ᯑᯬᯂᯖᯬ᯲ ᯘᯪ ᯇᯪᯄ᯦ᯞᯬ᯲, ᯇᯒ᯲ᯖᯬᯎᯪ ᯉᯪ ᯀᯰᯄ᯦ ᯇᯒᯝᯉᯉ᯲ᯉ ᯤ ᯔᯉ᯲ᯑᯄ᯦ᯬ᯲ ᯖᯮ ᯘᯪ ᯀᯅ᯲ᯒᯂᯔ᯲ : ᯘᯤ ᯑᯪᯑᯬᯝᯉᯪ ᯑᯩᯅᯖ ᯑᯬ ᯂᯬ ᯑᯪ ᯘᯮᯑᯩ ᯉ ᯉᯪᯥᯞᯔ᯲
23 On pe, mangmangkon ma dison tu Debata: Molo tung marmihimmihim ho tu ahu, manang tu angka anakku, ro di pinomparhu sogot! Nda maruhum na denggan ho tu ahu dohot tu tano paisolatanmu, marningot uhum na denggan na hubahen i tu ho. ᯀᯉᯬ᯲ ᯇᯩ, ᯔᯰᯔᯰᯄ᯦ᯉᯬ᯲ ᯔ ᯑᯪᯘᯉᯬ᯲ ᯖᯮ ᯑᯩᯅᯖ : ᯔᯬᯞᯬ ᯖᯮᯰ ᯔᯒ᯲ᯔᯪᯂᯔᯪ᯲ᯔᯪᯂᯔᯪ᯲ ᯂᯬ ᯖᯮ ᯀᯂᯮ, ᯔᯉᯰ ᯖᯮ ᯀᯰᯄ᯦ ᯀᯉᯄ᯦᯲ᯄ᯦ᯮ, ᯒᯬ ᯑᯪ ᯇᯪᯉᯔᯬ᯲ᯇᯒ᯲ᯂᯮ ᯘᯬᯎᯖᯬ᯲ ! ᯉ᯲ᯑ ᯔᯒᯮᯂᯔᯮ᯲ ᯉ ᯑᯰᯩᯎᯉ᯲ ᯂᯬ ᯖᯮ ᯀᯂᯮ ᯑᯬᯂᯖᯬ᯲ ᯖᯮ ᯖᯉᯬ ᯇᯤᯘᯬᯞᯖᯉ᯲ᯔᯮ, ᯔᯒ᯲ᯉᯪᯝᯖᯬ᯲ ᯥᯂᯔᯮ᯲ ᯉ ᯑᯰᯩᯎᯉ᯲ ᯉ ᯂᯮᯅᯂᯉᯩ᯲ ᯤ ᯖᯮ ᯂᯬ
24 Jadi ninna si Abraham ma: Humangmangkon pe. ᯐᯑᯪ ᯉᯉᯪ᯲ᯉ ᯘᯪ ᯀᯅ᯲ᯒᯂᯔ᯲ ᯔ : ᯂᯮᯔᯰᯔᯰᯄ᯦ᯉᯬ᯲ ᯇᯩ
25 Alai disarita si Abraham do si Abimelek ala sumur, na nirampas ni angka naposo ni si Abimelek. ᯀᯞᯤ ᯑᯪᯘᯒᯪᯖ ᯘᯪ ᯀᯅ᯲ᯒᯂᯔ᯲ ᯑᯬ ᯘᯪ ᯀᯅᯪᯔᯩᯞᯄᯩ᯦᯲ ᯀᯞ ᯘᯮᯔᯒᯮ᯲, ᯉ ᯉᯪᯒᯔ᯲ᯇᯘ᯲ ᯉᯪ ᯀᯰᯄ᯦ ᯉᯇᯬᯘᯬ ᯉᯪ ᯘᯪ ᯀᯅᯪᯔᯩᯞᯄᯩ᯦᯲
26 Dung i ninna si Abimelek ma: Ndang pamotoanku manang ise na mambahen songon i; ho pe antong, ndang dialualuhon ho tu ahu, jala ndang dung hubege, nda sadari on. ᯑᯮᯰ ᯤ ᯉᯉᯪ᯲ᯉ ᯘᯪ ᯀᯅᯪᯔᯩᯞᯄᯩ᯦᯲ ᯔ : ᯉ᯲ᯑᯰ ᯇᯔᯬᯖᯬᯀᯉ᯲ᯄ᯦ᯮ ᯔᯉᯰ ᯤᯘᯩ ᯉ ᯔᯔ᯲ᯅᯂᯉᯩ᯲ ᯘᯬᯝᯉᯬ᯲ ᯤ : ᯂᯬ ᯇᯩ ᯀᯉ᯲ᯖᯬᯰ ᯉ᯲ᯑᯰ ᯑᯪᯀᯞᯮᯀᯞᯮᯂᯉᯬ᯲ ᯂᯬ ᯖᯮ ᯀᯂᯮ, ᯐᯞ ᯉ᯲ᯑᯰ ᯑᯮᯰ ᯂᯮᯅᯩᯎᯩ, ᯉ᯲ᯑ ᯘᯑᯒᯪ ᯀᯉᯬ᯲
27 Jadi dipambuat si Abraham ma birubiru dohot lombu, jala di parlehon tu si Abimelek, jadi marbulan be ma nasida na dua. ᯐᯑᯪ ᯑᯪᯇᯔ᯲ᯅᯮᯀᯖ᯲ ᯘᯪ ᯀᯅ᯲ᯒᯂᯔ᯲ ᯔ ᯅᯪᯒᯮᯅᯪᯒᯮ ᯑᯬᯂᯖᯬ᯲ ᯞᯔᯬ᯲ᯅᯮ, ᯐᯞ ᯑᯪᯇᯒ᯲ᯞᯩᯂᯉᯬ᯲ ᯖᯮ ᯘᯪ ᯀᯅᯪᯔᯩᯞᯄᯩ᯦᯲, ᯐᯑᯪ ᯔᯒ᯲ᯅᯮᯞᯉ᯲ ᯅᯩ ᯔ ᯉᯘᯪᯑ ᯉ ᯑᯮᯀ
28 Dung i dipapulik si Abraham ma pitu anak ni birubiru. ᯑᯮᯰ ᯤ ᯑᯪᯇᯇᯮᯞᯄ᯦ᯪ᯲ ᯘᯪ ᯀᯅ᯲ᯒᯂᯔ᯲ ᯔ ᯇᯪᯖᯮ ᯀᯉᯄ᯦᯲ ᯉᯪ ᯅᯪᯒᯮᯅᯪᯒᯮ
29 Jadi ninna si Abimelek ma tu si Abraham: Tu aha ma anak ni birubiru na pitu on, angka na pinapulikmon? ᯐᯑᯪ ᯉᯉᯪ᯲ᯉ ᯘᯪ ᯀᯅᯪᯔᯩᯞᯄᯩ᯦᯲ ᯔ ᯖᯮ ᯘᯪ ᯀᯅ᯲ᯒᯂᯔ᯲ : ᯖᯮ ᯀᯂ ᯔ ᯀᯉᯄ᯦᯲ ᯅᯪᯒᯮᯅᯪᯒᯮ ᯉ ᯇᯪᯖᯮ ᯀᯉᯬ, ᯀᯰᯄ᯦ ᯉ ᯇᯪᯉᯇᯮᯞᯄ᯦ᯪ᯲ᯔᯉᯬ᯲ ?
30 Dung i ninna si Abraham ma: Sai jalo ma na pitu anak ni birubiru on sian tanganku bahen sitindangingku, paboa ahu sihali sumur on. ᯑᯮᯰ ᯤ ᯉᯉᯪ᯲ᯉ ᯘᯪ ᯀᯅ᯲ᯒᯂᯔ᯲ ᯔ : ᯘᯤ ᯐᯞᯬ ᯔ ᯉ ᯇᯪᯖᯮ ᯀᯉᯄ᯦᯲ ᯉᯪ ᯅᯪᯒᯮᯅᯪᯒᯮ ᯀᯉᯬ᯲ ᯘᯪᯀᯉ᯲ ᯖᯝᯉ᯲ᯄ᯦ᯮ ᯅᯂᯉᯩ᯲ ᯘᯪᯖᯉᯪ᯲ᯑᯝᯪᯰᯄ᯦ᯮ, ᯇᯅᯬᯀ ᯀᯂᯮ ᯘᯪᯂᯞᯪ ᯘᯮᯔᯒᯮ᯲ ᯀᯉᯬ᯲
31 Ala ni do umbahen margoar Berseba (sumur parbulanan) huta i, ala disi marbulan nasida na dua i. ᯀᯞ ᯉᯪ ᯑᯬ ᯀᯔᯮ᯲ᯅᯂᯉᯩ᯲ ᯔᯒ᯲ᯎᯬᯀᯒ᯲ ᯅᯒᯩ᯲ᯘᯩᯅ (ᯘᯮᯔᯒᯮ᯲ ᯇᯒ᯲ᯅᯮᯞᯉᯉ᯲) ᯂᯮᯖ ᯤ, ᯀᯞ ᯑᯪᯘᯪ ᯔᯒ᯲ᯅᯮᯞᯉ᯲ ᯉᯘᯪᯑ ᯉ ᯑᯮᯀ ᯤ
32 Asa marpadan ma nasida di Berseba. Dung i hehe ma si Abimelek dohot si Pikol, partogi ni paranganna i, asa mulak nasida tu tano ni halak Palistim. ᯀᯘ ᯔᯒ᯲ᯇᯑᯉ᯲ ᯔ ᯉᯘᯪᯑ ᯑᯪ ᯅᯒᯩ᯲ᯘᯩᯅ. ᯑᯮᯰ ᯤ ᯂᯩᯂᯩ ᯔ ᯘᯪ ᯀᯅᯪᯔᯩᯞᯄᯩ᯦᯲ ᯑᯬᯂᯖᯬ᯲ ᯘᯪ ᯇᯪᯄ᯦ᯞᯬ᯲, ᯇᯒ᯲ᯖᯬᯎᯪ ᯉᯪ ᯇᯒᯝᯉ᯲ᯉ ᯤ, ᯀᯘ ᯔᯮᯞᯄ᯦᯲ ᯉᯘᯪᯑ ᯖᯮ ᯖᯉᯬ ᯉᯪ ᯂᯞᯄ᯦᯲ ᯇᯞᯘᯪ᯲ᯖᯔᯪ᯲
33 Dung i disuan si Abraham ma angka hau ara di Berseba, jala dipajoujou disi goar ni Jahowa, Debata saleleng ni lelengna. ᯑᯮᯰ ᯤ ᯑᯪᯘᯮᯀᯉ᯲ ᯘᯪ ᯀᯅ᯲ᯒᯂᯔ᯲ ᯔ ᯀᯰᯄ᯦ ᯂᯥ ᯀᯒ ᯑᯪ ᯅᯒᯩ᯲ᯘᯩᯅ ᯐᯞ ᯑᯪᯇᯐᯬᯥᯐᯬᯥ ᯑᯪᯘᯪ ᯎᯬᯀᯒ᯲ ᯉᯪ ᯐᯂᯬᯋ. ᯑᯩᯅᯖ ᯘᯞᯩᯞᯰᯩ ᯉᯪ ᯞᯩᯞᯰᯩᯉ
34 Jadi na nia leleng si Abraham maisolat di tano ni halak Palistim. ᯐᯑᯪ ᯉ ᯉᯪᯀ ᯞᯩᯞᯰᯩ ᯘᯪ ᯀᯅ᯲ᯒᯂᯔ᯲ ᯔᯤᯘᯬᯞᯖ᯲ ᯑᯪ ᯖᯉᯬ ᯉᯪ ᯂᯞᯄ᯦᯲ ᯇᯞᯘᯪ᯲ᯖᯔᯪ᯲