Hamamasa ni aek na sumar 1-5. ᯂᯔᯔᯘ ᯉᯪ ᯀᯀᯄᯰᯩ᯲ ᯉ ᯘᯮᯔᯒ᯲ ᯘᯑ – ᯞᯪᯔ
Si Noak manangkasi marsikna 6-12. ᯘᯪ ᯉᯬᯀᯄ᯦᯲ ᯔᯉᯰᯄ᯦ᯘᯪ ᯔᯒ᯲ᯘᯄ᯦ᯪ᯲ᯉ ᯀᯬᯉᯔᯬ᯲ – ᯘᯔ᯲ᯇᯮᯞᯮ ᯑᯮᯀ
Haruruar sian parau 13-19. ᯂᯒᯮᯒᯮᯀᯒ᯲ ᯘᯪᯀᯉ᯲ ᯇᯒᯥ ᯘᯔ᯲ᯇᯮᯞᯮ ᯖᯬᯞᯮ – ᯘᯔ᯲ᯇᯮᯞᯮ ᯘᯪᯀ
Pelean hamauliateon. Bagabaga ni Debata 20-22. ᯇᯩᯞᯩᯀᯉ᯲ ᯂᯔᯥᯞᯪᯀᯖᯩᯀᯉᯬ᯲ ᯅᯎᯅᯎ ᯉᯪ ᯑᯩᯅᯖ ᯑᯮᯀᯇᯮᯞᯮ – ᯑᯮᯀᯇᯮᯞᯮ ᯑᯮᯀ
Hamamasa ni aek na sumar 1-5. ᯂᯔᯔᯘ ᯉᯪ ᯀᯀᯄᯰᯩ᯲ ᯉ ᯘᯮᯔᯒ᯲ ᯘᯑ – ᯞᯪᯔ
I. 1 Dung i diingot Debata ma si Noak dohot sude binatang ro di sude pinahan, angka na rap dohot ibana di bagasan parau i. Jadi dipabolushon Debata ma alogo tu tano i, asa moru aek i. ᯑᯮᯰ ᯤ ᯑᯪᯤᯝᯖᯬ᯲ ᯑᯩᯅᯖ ᯔ ᯘᯪ ᯉᯬᯀᯄ᯦᯲ ᯑᯬᯂᯖᯬ᯲ ᯘᯮᯑᯩ ᯅᯪᯉᯖᯰ ᯒᯬ ᯑᯪ ᯘᯮᯑᯩ ᯇᯪᯉᯂᯉ᯲, ᯀᯰᯄ᯦ ᯉ ᯒᯇ᯲ ᯑᯬᯂᯖᯬ᯲ ᯤᯅᯉ ᯑᯪ ᯅᯎᯘᯉ᯲ ᯇᯒᯥ ᯤ. ᯐᯑᯪ ᯑᯪᯇᯅᯬᯞᯘᯮ᯲ᯂᯉᯬ᯲ ᯑᯩᯅᯖ ᯔ ᯀᯞᯬᯎᯬ ᯖᯮ ᯖᯉᯬ ᯤ, ᯀᯘ ᯔᯬᯒᯮ ᯀᯀᯄᯩ᯦᯲ ᯤ
2 Dipolpol ma dohot angka mual ni lung i dohot angka pandiloan ni langit, jala dihomat udan tipotipo sian langit i. ᯑᯪᯇᯞᯬ᯲ᯇᯞᯬ᯲ ᯔ ᯑᯬᯂᯖᯬ᯲ ᯀᯰᯄ᯦ ᯔᯮᯀᯞ᯲ ᯉᯪ ᯞᯮᯰ ᯤ ᯑᯬᯂᯖᯬ᯲ ᯀᯰᯄ᯦ ᯇᯉ᯲ᯑᯪᯞᯬᯀᯉ᯲ ᯉᯪ ᯞᯝᯖᯪ᯲, ᯐᯞ ᯑᯪᯂᯬᯔᯖ᯲ ᯥᯑᯉ᯲ ᯖᯪᯇᯬᯖᯪᯇᯬ ᯘᯪᯀᯉ᯲ ᯞᯝᯖᯪ᯲ ᯤ
3 Jadi lam moru ma aek i sian tano on, salpu saratus limapulu borngin, nunga lam moru angka aek i. ᯐᯑᯪ ᯞᯔ᯲ ᯔᯬᯒᯮ ᯔ ᯀᯀᯄᯩ᯦᯲ ᯤ ᯘᯪᯀᯉ᯲ ᯖᯉᯬ ᯀᯉᯬ᯲, ᯘᯞ᯲ᯇᯮ ᯘᯒᯖᯘᯮ᯲ ᯞᯪᯔᯇᯮᯞᯮ ᯅᯒᯬ᯲ᯝᯉᯪ᯲, ᯉᯮᯝ ᯞᯔ᯲ ᯔᯬᯒᯮ ᯀᯰᯄ᯦ ᯀᯀᯄᯩ᯦᯲ ᯤ
4 Asa dung jumpang ari sampulu pitu di bulan sipahapitu, sangkot ma parau i di punsu ni dolok Ararat. ᯀᯘ ᯑᯮᯰ ᯐᯔᯮ᯲ᯇᯰ ᯀᯒᯪ ᯘᯔ᯲ᯇᯮᯞᯮ ᯇᯪᯖᯮ ᯑᯪ ᯅᯮᯞᯉ᯲ ᯘᯪᯇᯂᯇᯪᯖᯮ, ᯘᯰᯄ᯦ᯖᯬ᯲ ᯔ ᯇᯒᯥ ᯤ ᯑᯪ ᯇᯉᯮ᯲ᯘᯮ ᯉᯪ ᯑᯬᯞᯄ᯦ᯬ᯲ ᯀᯒᯒᯖ᯲
5 Dung i sai lam tu moruna aek i ro di bulan sipahasampulu; di artia di bulan sipahasampulu tarida ma angka punsu ni dolok. ᯑᯮᯰ ᯤ ᯘᯤ ᯞᯔ᯲ ᯖᯮ ᯔᯬᯒᯮᯉ ᯀᯀᯄᯩ᯦᯲ ᯤ ᯒᯬ ᯑᯪ ᯅᯮᯞᯉ᯲ ᯘᯪᯇᯂᯘᯔ᯲ᯇᯮᯞᯮ : ᯑᯪ ᯀᯒ᯲ᯖᯪᯀ ᯑᯪ ᯅᯮᯞᯉ᯲ ᯘᯪᯇᯂᯘᯔ᯲ᯇᯮᯞᯮ ᯖᯒᯪᯑ ᯔ ᯀᯰᯄ᯦ ᯇᯉᯮ᯲ᯘᯮ ᯉᯪ ᯑᯬᯞᯄ᯦ᯬ᯲
Si Noak manangkasi marsikna 6-12. ᯘᯪ ᯉᯬᯀᯄ᯦᯲ ᯔᯉᯰᯄ᯦ᯘᯪ ᯔᯒ᯲ᯘᯄ᯦ᯪ᯲ᯉ ᯀᯬᯉᯔᯬ᯲ – ᯘᯔ᯲ᯇᯮᯞᯮ ᯑᯮᯀ
II. 6 Salpu muse opatpulu borngin, diungkap si Noak ma pandiloan ni parau na binahenna i. ᯘᯞ᯲ᯇᯮ ᯔᯮᯘᯩ ᯀᯬᯇᯖ᯲ᯇᯮᯞᯮ ᯅᯒᯬ᯲ᯝᯉᯪ᯲, ᯑᯪᯀᯮᯰᯄ᯦ᯇ᯲ ᯘᯪ ᯉᯬᯀᯄ᯦᯲ ᯔ ᯇᯉ᯲ᯑᯪᯞᯬᯀᯉ᯲ ᯉᯪ ᯇᯒᯥ ᯉ ᯅᯪᯉᯂᯉᯩ᯲ᯉ ᯤ
7 Dipalua ma sada sigak, sai mulahulak do i, paima marsik aek i sian tano on. ᯑᯪᯇᯞᯮᯀ ᯔ ᯘᯑ ᯘᯪᯎᯄ᯦᯲, ᯘᯤ ᯔᯮᯞᯂᯮᯞᯄ᯦᯲ ᯑᯬ ᯤ, ᯇᯤᯔ ᯔᯒ᯲ᯘᯄ᯦ᯪ᯲ ᯀᯀᯄᯩ᯦᯲ ᯤ ᯘᯪᯀᯉ᯲ ᯖᯉᯬ ᯀᯉᯬ᯲
8 Dung i dipalua ma sian ibana sada darapati, asa diida manang naung marsik aek i sian sisik ni tano on. ᯑᯮᯰ ᯤ ᯑᯪᯇᯞᯮᯀ ᯔ ᯘᯪᯀᯉ᯲ ᯤᯅᯉ ᯘᯑ ᯑᯒᯇᯖᯪ, ᯀᯘ ᯑᯪᯤᯑ ᯔᯉᯰ ᯉᯀᯮᯰ ᯔᯒ᯲ᯘᯄ᯦ᯪ᯲ ᯀᯀᯄᯩ᯦᯲ ᯤ ᯘᯪᯀᯉ᯲ ᯘᯪᯘᯄ᯦ᯪ᯲ ᯉᯪ ᯖᯉᯬ ᯀᯉᯬ᯲
9 Alai ndang jumpang darapati hasonggopan ni palak ni patna, jadi mulak ma tu ibana, tu bagasan parau i, ai mangalantap dope aek i di sisik ni sandok tano on. Jadi disurdukkon si Noak ma tanganna, jala ditangkup darapati i manait tu ibana, tu bagasan parau i. ᯀᯞᯤ ᯉ᯲ᯑᯰ ᯐᯔᯮ᯲ᯇᯰ ᯑᯒᯇᯖᯪ ᯂᯘᯬᯰᯎᯬᯇᯉ᯲ ᯉᯪ ᯇᯞᯄ᯦᯲ ᯉᯪ ᯇᯖ᯲ᯉ, ᯐᯑᯪ ᯔᯮᯞᯄ᯦᯲ ᯔ ᯖᯮ ᯤᯅᯉ, ᯖᯮ ᯅᯎᯘᯉ᯲ ᯇᯒᯥ ᯤ, ᯀᯤ ᯔᯝᯞᯉ᯲ᯖᯇ᯲ ᯑᯬᯇᯩ ᯀᯀᯄᯩ᯦᯲ ᯤ ᯑᯪ ᯘᯪᯘᯄ᯦ᯪ᯲ ᯉᯪ ᯘᯉ᯲ᯑᯄ᯦ᯬ᯲ ᯖᯉᯬ ᯀᯉᯬ᯲. ᯐᯑᯪ ᯑᯪᯘᯒᯮ᯲ᯑᯄ᯦ᯮ᯲ᯄ᯦ᯉᯬ᯲ ᯘᯪ ᯉᯬᯀᯄ᯦᯲ ᯔ ᯖᯝᯉ᯲ᯉ, ᯐᯞ ᯑᯪᯖᯰᯄ᯦ᯇᯮ᯲ ᯑᯒᯇᯖᯪ ᯤ ᯔᯉᯀᯖᯪ᯲ ᯖᯮ ᯤᯅᯉ, ᯖᯮ ᯅᯎᯘᯉ᯲ ᯇᯒᯥ ᯤ
10 Dung i dipaima pitu borngin nari, diulahi ma paluahon sada darapati sian parau i. ᯑᯮᯰ ᯤ ᯑᯪᯇᯤᯔ ᯇᯪᯖᯮ ᯅᯒᯬ᯲ᯝᯉᯪ᯲ ᯉᯒᯪ, ᯑᯪᯥᯞᯂᯪ ᯔ ᯇᯞᯮᯀᯂᯉᯬ᯲ ᯘᯑ ᯑᯒᯇᯖᯪ ᯘᯪᯀᯉ᯲ ᯇᯒᯥ ᯤ
11 Mareak bot ari mulak ma darapati i tu ibana, jala ida ma, sada bulung ni hau jetun na rata di tuktukna. Jadi diboto si Noak ma naung marsik aek i sian tano on. ᯔᯒᯩᯀᯄ᯦᯲ ᯅᯖᯬ᯲ ᯀᯒᯪ ᯔᯮᯞᯄ᯦᯲ ᯔ ᯑᯒᯇᯖᯪ ᯤ ᯖᯮ ᯤᯅᯉ, ᯐᯞ ᯤᯑ ᯔ, ᯘᯑ ᯅᯮᯞᯮᯰ ᯉᯪ ᯂᯥ ᯐᯩᯖᯉᯮ᯲ ᯉ ᯒᯖ ᯑᯪ ᯖᯄ᯦ᯮ᯲ᯖᯄ᯦ᯮ᯲ᯉ, ᯐᯑᯪ ᯑᯪᯅᯬᯖᯬ ᯘᯪ ᯉᯬᯀᯄ᯦᯲ ᯔ ᯉᯀᯮᯰ ᯔᯒ᯲ᯘᯄ᯦ᯪ᯲ ᯀᯀᯄᯩ᯦᯲ ᯤ ᯘᯪᯀᯉ᯲ ᯖᯉᯬ ᯀᯉᯬ᯲
12 Dung i dipaima pitu borngin nari, asa dipalua muse sada darapati, alai ndang be mulak tu ibana. ᯑᯮᯰ ᯤ ᯑᯪᯇᯤᯔ ᯇᯪᯖᯮ ᯅᯒᯬ᯲ᯝᯉᯪ᯲ ᯉᯒᯪ, ᯀᯘ ᯑᯪᯇᯞᯮᯀ ᯔᯮᯘᯩ ᯘᯑ ᯑᯒᯇᯖᯪ, ᯀᯞᯤ ᯉ᯲ᯑᯰ ᯔᯮᯞᯄ᯦᯲ ᯖᯮ ᯤᯅᯉ
Haruruar sian parau 13-19. ᯂᯒᯮᯒᯮᯀᯒ᯲ ᯘᯪᯀᯉ᯲ ᯇᯒᯥ ᯘᯔ᯲ᯇᯮᯞᯮ ᯖᯬᯞᯮ – ᯘᯔ᯲ᯇᯮᯞᯮ ᯘᯪᯀ
III. 13 Dung i paonomratussadataonhon, di artia di bulan sipahasada, marsik situtu ma aek i sian tano on. Jadi diungkap si Noak ma tarup ni parau i, gabe diida ma naung mahiang sisik ni tano on. ᯑᯮᯰ ᯤ ᯇᯀᯬᯉᯔᯬ᯲ᯒᯖᯘᯮ᯲ᯘᯑᯖᯀᯉᯬ᯲ᯂᯉᯬ᯲, ᯑᯪ ᯀᯒ᯲ᯖᯪᯀ ᯑᯪ ᯅᯮᯞᯉ᯲ ᯘᯪᯇᯂᯘᯑ, ᯔᯒ᯲ᯘᯄ᯦ᯪ᯲ ᯘᯪᯖᯮᯖᯮ ᯔ ᯀᯀᯄᯩ᯦᯲ ᯤ ᯘᯪᯀᯉ᯲ ᯖᯉᯬ ᯀᯉᯬ᯲. ᯐᯑᯪ ᯑᯪᯀᯮᯰᯄ᯦ᯇ᯲ ᯘᯪ ᯉᯬᯀᯄ᯦᯲ ᯔ ᯖᯒᯇᯮ᯲ ᯉᯪ ᯇᯒᯥ ᯤ, ᯎᯅᯩ ᯑᯪᯤᯑ ᯔ ᯉᯀᯮᯰ ᯔᯂᯪᯀᯰ ᯘᯪᯘᯄ᯦ᯪ᯲ ᯉᯪ ᯖᯉᯬ ᯀᯉᯬ᯲
14 Jumpang ari duapulu pitu di bulan sipahadua, mahiang ma tano i. ᯐᯔᯮ᯲ᯇᯰ ᯀᯒᯪ ᯑᯮᯀᯇᯮᯞᯮ ᯇᯪᯖᯮ ᯑᯪ ᯅᯮᯞᯉ᯲ ᯘᯪᯇᯂᯑᯮᯀ, ᯔᯂᯪᯀᯰ ᯔ ᯖᯉᯬ ᯤ
15 Jadi ninna Debata ma mandok si Noak: ᯐᯑᯪ ᯉᯉᯪ᯲ᯉ ᯑᯩᯅᯖ ᯔ ᯔᯉ᯲ᯑᯄ᯦ᯬ᯲ ᯘᯪ ᯉᯬᯀᯄ᯦᯲
16 Ruar ma ho sian parau i, ho dohot jolmam dohot angka anakmu dohot jolma ni anakmu rap dohot ho. ᯒᯮᯀᯒ᯲ ᯔ ᯂᯬ ᯘᯪᯀᯉ᯲ ᯇᯒᯥ ᯤ, ᯂᯬ ᯑᯬᯂᯖᯬ᯲ ᯐᯞᯬ᯲ᯔᯔ᯲ ᯑᯬᯂᯖᯬ᯲ ᯀᯰᯄ᯦ ᯀᯉᯄ᯦᯲ᯔᯮ ᯑᯬᯂᯖᯬ᯲ ᯐᯞᯬ᯲ᯔ ᯉᯪ ᯀᯉᯄ᯦᯲ᯔᯮ ᯒᯇ᯲ ᯑᯬᯂᯖᯬ᯲ ᯂᯬ
17 Paruar ma rap dohot ho nasa binatang sian nasa na mardaging, angka pidong dohot pinahan dohot nasa na manjirir di tano i, asa rodot nasida, jala lam torop di tano on. ᯇᯒᯮᯀᯒ᯲ ᯔ ᯒᯇ᯲ ᯑᯬᯂᯖᯬ᯲ ᯂᯬ ᯉᯘ ᯅᯪᯉᯖᯰ ᯘᯪᯀᯉ᯲ ᯉᯘ ᯉ ᯔᯒ᯲ᯑᯎᯪᯰ, ᯀᯰᯄ᯦ ᯇᯪᯑᯬᯰ ᯑᯬᯂᯖᯬ᯲ ᯇᯪᯉᯂᯉ᯲ ᯑᯬᯂᯖᯬ᯲ ᯉᯘ ᯉ ᯔᯉ᯲ᯐᯪᯒᯒᯪ᯲ ᯑᯪ ᯖᯉᯬ ᯤ, ᯀᯘ ᯒᯬᯑᯖᯬ᯲ ᯉᯘᯪᯑ, ᯐᯞ ᯞᯔ᯲ ᯖᯬᯒᯇᯬ᯲ ᯑᯪ ᯖᯉᯬ ᯀᯉᯬ᯲
18 Jadi ruar ma si Noak rap dohot anakna dohot jolmana dohot jolma ni angka anakna i. ᯐᯑᯪ ᯒᯮᯀᯒ᯲ ᯔ ᯘᯪ ᯉᯬᯀᯄ᯦᯲ ᯒᯇ᯲ ᯑᯬᯂᯖᯬ᯲ ᯀᯉᯄ᯦᯲ᯉ ᯑᯬᯂᯖᯬ᯲ ᯐᯞᯬ᯲ᯔᯉ ᯑᯬᯂᯖᯬ᯲ ᯐᯞᯬ᯲ᯔ ᯉᯪ ᯀᯰᯄ᯦ ᯀᯉᯄ᯦᯲ᯉ ᯤ
19 Ruar ma sian parau i dohot sude binatang, sude gulokgulok dohot sude pidong, sude na manjirir di tano on masiboan mansamna be. ᯒᯮᯀᯒ᯲ ᯔ ᯘᯪᯀᯉ᯲ ᯇᯒᯥ ᯤ ᯑᯬᯂᯖᯬ᯲ ᯘᯮᯑᯩ ᯅᯪᯉᯖᯰ, ᯘᯮᯑᯩ ᯎᯮᯞᯄ᯦ᯬ᯲ᯎᯮᯞᯄ᯦ᯬ᯲ ᯑᯬᯂᯖᯬ᯲ ᯘᯮᯑᯩ ᯇᯪᯑᯬᯰ, ᯘᯮᯑᯩ ᯉ ᯔᯉ᯲ᯐᯪᯒᯒᯪ᯲ ᯑᯪ ᯖᯉᯬ ᯀᯉᯬ᯲ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ ᯅᯩ
Pelean hamauliateon. Bagabaga ni Debata 20-22. ᯇᯩᯞᯩᯀᯉ᯲ ᯂᯔᯥᯞᯪᯀᯖᯩᯀᯉᯬ᯲ ᯅᯎᯅᯎ ᯉᯪ ᯑᯩᯅᯖ ᯑᯮᯀᯇᯮᯞᯮ – ᯑᯮᯀᯇᯮᯞᯮ ᯑᯮᯀ
IV. 20 Dung i dipajok si Noak ma sada langgatan di Jahowa, jala dibuat sian nasa pinahan na ganjing dohot sian nasa pidong na ganjing bahen pelean situtungon, pelehononna di langgatan i. ᯑᯮ ᯤ ᯑᯪᯇᯐᯄ᯦ᯬ᯲ ᯘᯪ ᯉᯬᯀᯄ᯦᯲ ᯔ ᯘᯑ ᯞᯰᯎᯖᯉ᯲ ᯑᯪ ᯐᯂᯬᯋ, ᯐᯞ ᯑᯪᯅᯮᯀᯖ᯲ ᯘᯪᯀᯉ᯲ ᯉᯘ ᯇᯪᯉᯂᯉ᯲ ᯉ ᯎᯉ᯲ᯐᯪᯰ ᯑᯬᯂᯖᯬ᯲ ᯘᯪᯀᯉ᯲ ᯉᯘ ᯇᯪᯑᯬᯰ ᯉ ᯎᯉ᯲ᯐᯪᯰ ᯅᯂᯉᯩ᯲ ᯇᯩᯞᯩᯀᯉ᯲ ᯘᯪᯖᯮᯖᯮᯝᯉᯬ᯲, ᯇᯩᯞᯩᯂᯬᯉᯉᯬ᯲ᯉ ᯑᯪ ᯞᯰᯎᯖᯉ᯲ ᯤ
21 Jadi dung dianggo Jahowa uap na hushus i, ninna Jahowa ma di bagasan rohana: Ndang be ulahanku manorui tano on ala jolma i, ai na jat do pingkiran ni roha ni jolma sian sietehetehonna; jala ndang be ulahanku mangaragehon nasa na mangolu, songon na hubahen i. ᯐᯑᯪ ᯑᯮᯰ ᯑᯪᯀᯰᯎᯬ ᯐᯂᯬᯋ ᯥᯀᯇ᯲ ᯉ ᯂᯘᯮ᯲ᯂᯘᯮ᯲ ᯤ, ᯉᯉᯪ᯲ᯉ ᯐᯂᯬᯋ ᯔ ᯑᯪ ᯅᯎᯘᯉ᯲ ᯒᯬᯂᯉ : ᯉ᯲ᯑᯰ ᯅᯩ ᯥᯞᯂᯉ᯲ᯄ᯦ᯮ ᯔᯉᯬᯒᯮᯤ ᯖᯉᯬ ᯀᯉᯬ᯲ ᯀᯞ ᯐᯞᯬ᯲ᯔ ᯤ, ᯀᯤ ᯉ ᯐᯖ᯲ ᯑᯬ ᯇᯪᯰᯄ᯦ᯪᯒᯉ᯲ ᯉᯪ ᯒᯬᯂ ᯉᯪ ᯐᯞᯬ᯲ᯔ ᯘᯪᯀᯉ᯲ ᯘᯪᯀᯩᯖᯩᯂᯩᯖᯩᯂᯉᯬ᯲ᯉ ; ᯐᯞ ᯉ᯲ᯑᯰ ᯅᯩ ᯥᯞᯂᯉ᯲ᯄ᯦ᯮ ᯔᯝᯒᯎᯩᯂᯉᯬ᯲ ᯉᯘ ᯉ ᯔᯝᯬᯞᯮ, ᯘᯬᯝᯉᯬ᯲ ᯉ ᯂᯮᯅᯂᯉᯩ᯲ ᯤ
22 Onpe, saleleng adong tano on, ndang jadi mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin. ᯀᯉᯬ᯲ᯇᯩ, ᯘᯞᯩᯞᯰᯩ ᯀᯑᯬᯰ ᯖᯉᯬ ᯀᯉᯬ᯲, ᯉ᯲ᯑᯰ ᯐᯑᯪ ᯔᯉ᯲ᯘᯬᯂᯖᯬ᯲ ᯘᯅᯮᯒᯉᯬ᯲ ᯑᯬᯂᯖᯬ᯲ ᯎᯬᯖᯪᯞᯉᯬ᯲, ᯀᯒᯪ ᯝᯞᯪ ᯑᯬᯂᯖᯬ᯲ ᯀᯒᯪ ᯞᯘ᯲, ᯀᯒᯪ ᯞᯬᯎᯬ ᯑᯬᯂᯖᯬ᯲ ᯒᯉᯬ᯲ᯑᯬ ᯉᯪ ᯀᯒᯪ, ᯀᯒᯪᯀᯉ᯲ ᯑᯬᯂᯖᯬ᯲ ᯅᯒᯬ᯲ᯝᯉᯪ᯲