Dijangkon si Lot angka surusuruan i. Hajahaton ni halak Sodom 1-11. ᯑᯪᯐᯰᯄ᯦ᯉᯬ᯲ ᯘᯪ ᯞᯖᯬ᯲ ᯀᯰᯄ᯦ ᯘᯮᯒᯮᯘᯮᯒᯮᯀᯉ᯲ ᯤ. ᯂᯐᯂᯖᯉᯬ᯲ ᯉᯪ ᯂᯞᯄ᯦᯲ ᯘᯬᯑᯔᯬ᯲ ᯘᯑ – ᯘᯔ᯲ᯇᯮᯞᯮ ᯘᯑ
Halulua ni si Lot 12-23. ᯂᯞᯮᯞᯮᯀ ᯉᯪ ᯘᯪ ᯞᯖᯬ᯲ ᯘᯔ᯲ᯇᯮᯞᯮ ᯑᯮᯀ – ᯑᯮᯀᯇᯮᯞᯮ ᯖᯬᯞᯮ
Harorongrong ni Sodom ro di angka luat humaliang 24-29. ᯂᯒᯬᯒᯬᯰᯒᯬᯰ ᯉᯪ ᯘᯬᯑᯔᯬ᯲ ᯒᯬ ᯑᯪ ᯀᯰᯄ᯦ ᯞᯮᯀᯖ᯲ ᯂᯮᯔᯞᯪᯀᯰ ᯑᯮᯀᯇᯮᯞᯮ ᯀᯬᯇᯖ᯲ – ᯑᯮᯀᯇᯮᯞᯮ ᯘᯪᯀ
Dosa ni si Lot tu angka boruna 30-38. ᯑᯬᯘ ᯉᯪ ᯘᯪ ᯞᯖᯬ᯲ ᯖᯮ ᯀᯰᯄ᯦ ᯅᯬᯒᯮᯉ ᯖᯬᯞᯮᯇᯮᯞᯮ – ᯖᯬᯞᯮᯇᯮᯞᯮ ᯥᯀᯞᯮ
Dijangkon si Lot angka surusuruan i. Hajahaton ni halak Sodom 1-11. ᯑᯪᯐᯰᯄ᯦ᯉᯬ᯲ ᯘᯪ ᯞᯖᯬ᯲ ᯀᯰᯄ᯦ ᯘᯮᯒᯮᯘᯮᯒᯮᯀᯉ᯲ ᯤ. ᯂᯐᯂᯖᯉᯬ᯲ ᯉᯪ ᯂᯞᯄ᯦᯲ ᯘᯬᯑᯔᯬ᯲ ᯘᯑ – ᯘᯔ᯲ᯇᯮᯞᯮ ᯘᯑ
I. 1 Ianggo surusuruan na dua halak i tolhas ma bodarina i tu huta Sodom; alai hundulhundul di harbangan ni Sodom i si Lot. Jadi dung diida si Lot nasida, hehe ma ibana manomunomu nasida, dipatungkap ma bohina tu tano. ᯤᯀᯰᯎᯬ ᯘᯮᯒᯮᯘᯮᯒᯀᯉ᯲ ᯉ ᯑᯮᯀ ᯂᯞᯄ᯦᯲ ᯤ ᯖᯞᯬ᯲ᯂᯘ᯲ ᯔ ᯅᯬᯑᯒᯪᯉ ᯤ ᯖᯮ ᯂᯮᯖ ᯘᯬᯑᯔᯬ᯲ : ᯀᯞᯤ ᯂᯉᯮ᯲ᯑᯞᯮ᯲ᯂᯉᯮ᯲ᯑᯞᯮ᯲ ᯑᯪ ᯂᯒ᯲ᯅᯝᯉ᯲ ᯉᯪ ᯘᯬᯑᯔᯬ᯲ ᯤ ᯘᯪ ᯞᯖᯬ᯲. ᯐᯑᯪ ᯑᯮᯰ ᯑᯪᯤᯑ ᯘᯪ ᯞᯖᯬ᯲ ᯉᯘᯪᯑ, ᯂᯩᯂᯩ ᯔ ᯤᯅᯉ ᯔᯉᯬᯔᯮᯉᯬᯔᯮ ᯉᯘᯪᯑ, ᯑᯪᯇᯖᯮᯰᯄ᯦ᯇ᯲ ᯔ ᯅᯬᯂᯪᯉ ᯖᯮ ᯖᯉᯬ
2 Dung i ninna ma: Ua tuli ma hamu angka tuangku tu bagas ni naposomuna on, marborngin ma hamu jala buri hamu patmuna, sogot pe manogot i tulusi hamu dalanmuna i. Alai ninna nasida ma: Ndangana, sai marborngin di alaman on do hami. ᯑᯮᯰ ᯤ ᯉᯉᯪ᯲ᯉ ᯔ : ᯥᯀ ᯖᯮᯞᯪ ᯔ ᯂᯔᯮ ᯀᯰᯄ᯦ ᯖᯮᯀᯰᯄ᯦ᯮ ᯖᯮ ᯅᯎᯘ᯲ ᯉᯪ ᯉᯇᯬᯘᯬᯔᯮᯉ ᯀᯉᯬ᯲, ᯔᯒ᯲ᯅᯒᯬ᯲ᯝᯉᯪ᯲ ᯔ ᯂᯔᯮ ᯐᯞ ᯅᯮᯒᯪ ᯂᯔᯮ ᯇᯖ᯲ᯔᯮᯉ, ᯘᯬᯎᯖᯬ᯲ ᯇᯩ ᯔᯉᯬᯎᯖᯬ᯲ ᯤ ᯖᯮᯞᯮᯘᯪ ᯂᯔᯮ ᯑᯞᯉ᯲ᯔᯮᯉ ᯤ. ᯀᯞᯤ ᯉᯉᯪ᯲ᯉ ᯉᯘᯪᯑ ᯔ : ᯉ᯲ᯑᯝᯉ, ᯘᯤ ᯔᯒ᯲ᯅᯒᯬ᯲ᯝᯉᯪ᯲ ᯑᯪ ᯀᯞᯔᯉ᯲ ᯀᯉᯬ᯲ ᯑᯬ ᯂᯔᯪ
3 Dung i sai diparajarajai si Lot ma nasida, jadi tuli ma nasida sian ibana, dibongoti ma bagasna. Dung i dipauli ma sipanganonnasida, dilompa ma dohot sagusagu na so niigaran, jadi mangan nasida. ᯑᯮᯰ ᯤ ᯘᯤ ᯑᯪᯇᯒᯐᯒᯐᯤ ᯘᯪ ᯞᯖᯬ᯲ ᯔ ᯉᯘᯪᯑ, ᯐᯑᯪ ᯖᯮᯞᯪ ᯔ ᯉᯘᯪᯑ ᯘᯪᯀᯉ᯲ ᯤᯅᯉ, ᯑᯪᯅᯬᯝᯬᯖᯪ ᯔ ᯅᯎᯘ᯲ᯉ. ᯑᯮᯮᯰ ᯤ ᯑᯪᯇᯥᯞᯪ ᯔ ᯘᯪᯇᯝᯉᯉᯬ᯲ᯉᯘᯪᯑ, ᯑᯪᯞᯔᯬ᯲ᯇ ᯔ ᯑᯬᯂᯖᯬ᯲ ᯘᯎᯮᯘᯎᯮ ᯉ ᯘᯬ ᯉᯪᯤᯎᯒᯉ᯲, ᯐᯑᯪ ᯔᯝᯉ᯲ ᯉᯘᯪᯑ
4 Alai ndang dope laho modom nasida, nunga dihaliangi pangisi ni huta Sodom jabu i, tole dakdanak ro di na matua, tung tumpu do nasida sude. ᯀᯞᯤ ᯉ᯲ᯑᯰ ᯑᯬᯇᯩ ᯞᯂᯬ ᯔᯬᯑᯔᯬ᯲ ᯉᯘᯪᯑ ᯉᯮᯝ ᯑᯪᯂᯞᯪᯀᯝᯪ ᯇᯝᯪᯘᯪ ᯉᯪ ᯂᯮᯖ ᯘᯬᯑᯔᯬ᯲ ᯐᯅᯮ ᯤ, ᯖᯬᯞᯩ ᯑᯄ᯦᯲ᯑᯉᯄ᯦᯲ ᯒᯬ ᯑᯪ ᯉ ᯔᯖᯮᯀ, ᯖᯮᯰ ᯖᯔᯮ᯲ᯇᯮ ᯑᯬ ᯉᯘᯪᯑ ᯘᯮᯑᯩ
5 Sai joujou nasida mandok tu si Lot: Didia do baoa i angka na ro tu ho saborngin on? Togihon nasida ruar tu hami on, asa hutanda hami nasida. ᯘᯤ ᯐᯬᯥᯐᯬᯥ ᯉᯘᯪᯑ ᯔᯉ᯲ᯑᯄ᯦ᯬ᯲ ᯖᯮ ᯘᯪ ᯞᯖᯬ᯲ : ᯑᯪᯑᯪᯀ ᯑᯬ ᯅᯀᯬᯀ ᯤ ᯀᯰᯄ᯦ ᯉ ᯒᯬ ᯖᯮ ᯂᯬ ᯘᯅᯒᯬ᯲ᯝᯉᯪ᯲ ᯀᯉᯬ᯲ ? ᯖᯬᯎᯪᯂᯉᯬ᯲ ᯉᯘᯪᯑ ᯒᯮᯀᯒ᯲ ᯖᯮ ᯂᯔᯪ ᯀᯉᯬ᯲, ᯀᯘ ᯂᯮᯖᯉ᯲ᯑ ᯂᯔᯪ ᯉᯘᯪᯑ
6 Dung i ruar ma si Lot mandapothon nasida tu balian pintu, jala dihinsu pintu i di pudina. ᯑᯮᯰ ᯤ ᯒᯮᯀᯒ᯲ ᯔ ᯘᯪ ᯞᯖᯬ᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯉᯘᯪᯑ ᯖᯮ ᯅᯞᯪᯀᯉ᯲ ᯇᯉᯪ᯲ᯖᯮ, ᯐᯞ ᯑᯪᯂᯉᯪ᯲ᯘᯮ ᯇᯉᯪ᯲ᯖᯮ ᯤ ᯑᯪᯇᯮᯑᯪᯉ
7 Dung i ninna ma: Sombangku di hamu, ale angka dongan, unang bahen hamu na so uhum. ᯑᯮᯰ ᯤ ᯉᯉᯪ᯲ᯉ ᯔ : ᯘᯔᯬ᯲ᯅᯰᯄ᯦ᯮ ᯑᯪ ᯂᯔᯮ, ᯀᯞᯩ ᯀᯰᯄ᯦ ᯑᯬᯝᯉ᯲, ᯥᯉᯰ ᯅᯂᯉᯩ᯲ ᯂᯔᯮ ᯉ ᯘᯬ ᯥᯂᯔᯮ᯲
8 Ida ma adong do dua borungku, angka na so habubuhan dope, ua i ma hutogihon tu ruar, hulehon tu hamu, bahen hamu ma tu nasida lomo ni rohamuna, asal unang dibahen hamu manang aha tu halak on, ai ala ni do umbahen na marlinggom nasida tu bagashu. ᯤᯑ ᯔ ᯀᯑᯬᯰ ᯑᯬ ᯑᯮᯀ ᯅᯬᯒᯮᯰᯄ᯦ᯮ, ᯀᯰᯄ᯦ ᯉ ᯘᯬ ᯂᯅᯮᯅᯮᯂᯉ᯲ ᯑᯬᯇᯩ, ᯥᯀ ᯤ ᯔ ᯂᯮᯖᯬᯎᯪᯂᯉᯬ᯲ ᯖᯮ ᯒᯮᯀᯒ᯲, ᯂᯮᯞᯩᯂᯉᯬ᯲ ᯖᯮ ᯂᯔᯮ, ᯅᯂᯉᯩ᯲ ᯂᯔᯮ ᯔ ᯖᯮ ᯉᯘᯪᯑ ᯞᯬᯔᯬ ᯉᯪ ᯒᯬᯂᯔᯮᯉ, ᯀᯘᯞ᯲ ᯥᯉᯰ ᯑᯪᯅᯂᯉᯩ᯲ ᯂᯔᯮ ᯔᯉᯰ ᯀᯂ ᯖᯮ ᯂᯞᯄ᯦᯲ ᯀᯉᯬ᯲, ᯀᯤ ᯀᯞ ᯉᯪ ᯑᯬ ᯀᯔᯮ᯲ᯅᯂᯉᯩ᯲ ᯉ ᯔᯒ᯲ᯞᯪᯰᯎᯔᯬ᯲ ᯉᯘᯪᯑ ᯖᯮ ᯅᯎᯘ᯲ᯂᯮ
9 Alai ninna nasida ma: Pajonok ma tuson! Angkup ni didok nasida ma: Sasada ibana do na ro maisolat, jala sai naeng manguhumi ibana. On pe, umposi ma bahenonnami tu ho, asa tu nasida. Jadi dionjar nasida ma halak si Lot i, ditahopi ma naeng mangaloha pintu i. ᯀᯞᯤ ᯉᯉᯪ᯲ᯉ ᯉᯘᯪᯑ ᯔ : ᯇᯐᯬᯉᯄ᯦ᯬ᯲ ᯔ ᯖᯮᯘᯉᯬ᯲ ! ᯀᯰᯄ᯦ᯇᯮ᯲ ᯉᯪ ᯑᯪᯑᯄ᯦ᯬ᯲ ᯉᯘᯪᯑ ᯔ : ᯘᯘᯑ ᯤᯅᯉ ᯑᯬ ᯉ ᯒᯬ ᯔᯤᯘᯬᯞᯖ᯲, ᯐᯞ ᯘᯤ ᯉᯀᯰᯩ ᯔᯝᯮᯂᯮᯔᯪ ᯤᯅᯉ. ᯀᯉᯬ᯲ ᯇᯩ ᯀᯔᯮ᯲ᯇᯬᯘᯪ ᯔ ᯅᯂᯩᯉᯉᯬ᯲ᯉᯔᯪ ᯖᯮ ᯂᯬ, ᯀᯘ ᯖᯮ ᯉᯘᯪᯑ, ᯐᯑᯪ ᯑᯪᯀᯉᯬ᯲ᯐᯒ᯲ ᯉᯘᯪᯑ ᯔ ᯂᯞᯄ᯦᯲ ᯘᯪ ᯞᯖᯬ᯲ ᯤ, ᯑᯪᯖᯂᯬᯇᯪ ᯔ ᯉᯀᯰᯩ ᯔᯝᯞᯬᯂ ᯇᯉᯪ᯲ᯖᯮ ᯤ
10 Jadi disurdukkon angka baoa i tangannasida manait si Lot i tu nasida, masuk tu jabu, jala dihinsu ma pintu i. ᯐᯑᯪ ᯑᯪᯘᯒᯮ᯲ᯑᯄ᯦ᯮ᯲ᯄ᯦ᯉᯬ᯲ ᯀᯰᯄ᯦ ᯅᯀᯬᯀ ᯤ ᯖᯝᯉ᯲ᯉᯘᯪᯑ ᯔᯉᯀᯖᯪ᯲ ᯘᯪ ᯞᯖᯬ᯲ ᯤ ᯖᯮ ᯉᯘᯪᯑ, ᯔᯘᯄ᯦ᯮ᯲ ᯖᯮ ᯐᯅᯮ, ᯐᯞ ᯑᯪᯂᯉᯪ᯲ᯘᯮ ᯔ ᯇᯉᯪ᯲ᯖᯮ ᯤ
11 Ianggo baoa angka na di jolo pintu ni bagas i, dipapitung surusuruan i do, tole dakdanak ro di na magodang, gabe loja nasida mandadapi pintu i. ᯤᯀᯰᯎᯬ ᯅᯀᯬᯀ ᯀᯰᯄ᯦ ᯉ ᯑᯪ ᯐᯬᯞᯬ ᯇᯉᯪ᯲ᯖᯮ ᯉᯪ ᯅᯎᯘ᯲ ᯤ, ᯑᯪᯇᯇᯪᯖᯮᯰ ᯘᯮᯒᯮᯘᯮᯒᯮᯀᯉ᯲ ᯤ ᯑᯬ, ᯖᯬᯞᯩ ᯑᯄ᯦᯲ᯑᯉᯄ᯦᯲ ᯒᯬ ᯑᯪ ᯉ ᯔᯎᯬᯑᯰ, ᯎᯅᯩ ᯞᯬᯐ ᯉᯘᯪᯑ ᯔᯉ᯲ᯑᯑᯇᯪ ᯇᯉᯪ᯲ᯖᯮ ᯤ
Halulua ni si Lot 12-23. ᯂᯞᯮᯞᯮᯀ ᯉᯪ ᯘᯪ ᯞᯖᯬ᯲ ᯘᯔ᯲ᯇᯮᯞᯮ ᯑᯮᯀ – ᯑᯮᯀᯇᯮᯞᯮ ᯖᯬᯞᯮ
II. 12 Dung i ninna na dua baoa i ma mandok si Lot: Adong dope dison manang ise helam, manang anakmu, manang borum? Manang na songon diham di huta on, togihon ma nasida ruar sian inganan on. ᯑᯮᯰ ᯤ ᯉᯉᯪ᯲ᯉ ᯉ ᯑᯮᯀ ᯅᯀᯬᯀ ᯤ ᯔ ᯔᯉ᯲ᯑᯄ᯦ᯬ᯲ ᯘᯪ ᯞᯖᯬ᯲ : ᯀᯑᯬᯰ ᯑᯬᯇᯩ ᯑᯪᯘᯉᯬ᯲ ᯔᯉᯰ ᯤᯘᯩ ᯂᯩᯞᯔ᯲, ᯔᯉᯰ ᯀᯉᯄ᯦᯲ᯔᯮ, ᯔᯉᯰ ᯅᯬᯒᯔᯮ᯲ ? ᯔᯉᯰ ᯉ ᯘᯬᯝᯉᯬ᯲ ᯑᯪᯂᯔ᯲ ᯑᯪ ᯂᯮᯖ ᯀᯉᯬ᯲ ᯖᯬᯎᯪᯂᯉᯬ᯲ ᯔ ᯉᯘᯪᯑ ᯒᯮᯀᯒ᯲ ᯘᯪᯀᯉ᯲ ᯤᯝᯉᯉ᯲ ᯀᯉᯬ᯲
13 Ai naeng mangaripashon huta on do hami, ala na gogo angguhangguknasida tu jolo ni Jahowa, jala disuru Jahowa do hami mangaripashon huta i. ᯀᯤ ᯉᯀᯰᯩ ᯔᯝᯒᯪᯇᯘ᯲ᯂᯉᯬ᯲ ᯂᯮᯖ ᯀᯉᯬ᯲ ᯑᯬ ᯂᯔᯪ, ᯀᯞ ᯉ ᯎᯬᯎᯬ ᯀᯰᯎᯮᯂᯰᯎᯄ᯦ᯮ᯲ᯉᯘᯪᯑ ᯖᯮ ᯐᯬᯞᯬ ᯉᯪ ᯐᯂᯬᯋ, ᯐᯞ ᯑᯪᯘᯮᯒᯮ ᯐᯂᯬᯋ ᯑᯬ ᯂᯔᯪ ᯔᯝᯒᯪᯇᯘ᯲ᯂᯉᯬ᯲ ᯂᯮᯖ ᯀᯉᯬ᯲
14 Jadi ruar ma si Lot i, asa mangkatai dohot helana i, angka na mangoro boruna i, ninna ma: Hehe ma hamu ruar sian huta on, ai ripashonon ni Jahowa ma huta on. Alai diengkelengkel angka helana i do ibana. ᯐᯑᯪ ᯒᯮᯀᯒ᯲ ᯔ ᯘᯪ ᯞᯖᯬ᯲ ᯤ, ᯀᯘ ᯔᯰᯄ᯦ᯖᯤ ᯑᯬᯂᯖᯬ᯲ ᯂᯩᯞᯉ ᯤ, ᯀᯰᯄ᯦ ᯉ ᯔᯝᯬᯒᯬ ᯅᯬᯒᯮᯉ ᯤ, ᯉᯉᯪ᯲ᯉ ᯔ : ᯂᯩᯂᯩ ᯔ ᯂᯔᯮ, ᯒᯮᯀᯒ᯲ ᯘᯪᯀᯉ᯲ ᯂᯮᯖ ᯀᯉᯬ᯲, ᯀᯤ ᯒᯪᯇᯘ᯲ᯂᯬᯉᯉᯬ᯲ ᯉᯪ ᯐᯂᯬᯋ ᯔ ᯂᯮᯖ ᯀᯉᯬ᯲. ᯀᯞᯤ ᯑᯪᯀᯰᯩᯄᯰᯩᯞᯰᯩᯄ᯦ᯞᯩ᯲ ᯀᯰᯄ᯦ ᯂᯩᯞᯉ ᯤ ᯑᯬ ᯤᯅᯉ
15 Dung i mamungka buhabuha ijuk ari manogot i, didasdasi angka suruan i ma si Lot, ninna ma: Hehe ma ho, boan ma jolmam dohot borum na dua i naung disi, asa unang ripas dohot ho binahen ni hajahaton ni huta on ᯑᯮᯰ ᯤ ᯔᯔᯮᯰᯄ᯦ ᯅᯮᯂᯅᯮᯂ ᯤᯐᯄ᯦ᯮ᯲ ᯀᯒᯪ ᯔᯉᯬᯎᯖᯬ᯲ ᯤ, ᯑᯪᯑᯘ᯲ᯑᯘᯪ ᯀᯰᯄ᯦ ᯘᯮᯒᯮᯀᯉ᯲ ᯤ ᯔ ᯘᯪ ᯞᯖᯬ᯲, ᯉᯉᯪ᯲ᯉ ᯔ : ᯂᯩᯂᯩ ᯔ ᯂᯬ, ᯅᯬᯀᯉ᯲ ᯔ ᯐᯞᯬ᯲ᯔᯔ᯲ ᯑᯬᯂᯖᯬ᯲ ᯅᯬᯒᯔᯮ᯲ ᯉ ᯑᯮᯀ ᯤ ᯉᯀᯮᯰ ᯑᯪᯘᯪ, ᯀᯘ ᯥᯉᯰ ᯒᯪᯇᯘ᯲ ᯑᯬᯂᯖᯬ᯲ ᯂᯬ ᯅᯪᯉᯂᯉᯩ᯲ ᯉᯪ ᯂᯐᯂᯖᯉᯬ᯲ ᯉᯪ ᯂᯮᯖ ᯀᯉᯬ᯲
16 Alai sai dipagelegele langkana, jadi ditangkup baoa i ma tanganna dohot tangan ni jolmana dohot tangan ni boruna na dua i dibahen pangolanion ni Jahowa di ibana, ditogihon nasida ma ibana jala dipaulon tu balian ni huta i. ᯀᯞᯤ ᯘᯤ ᯑᯪᯇᯎᯩᯞᯩᯎᯩᯞᯩ ᯞᯰᯄ᯦ᯉ, ᯐᯑᯪ ᯑᯪᯖᯰᯄ᯦ᯇᯮ᯲ ᯅᯀᯬᯀ ᯤ ᯔ ᯖᯝᯉ᯲ᯉ ᯑᯬᯂᯖᯬ᯲ ᯖᯝᯉ᯲ ᯉᯪ ᯐᯞᯬ᯲ᯔᯉ ᯑᯬᯂᯖᯬ᯲ ᯖᯝᯉ᯲ ᯉᯪ ᯅᯬᯒᯮᯉ ᯉ ᯑᯮᯀ ᯤ ᯑᯪᯅᯂᯉᯩ᯲ ᯇᯝᯬᯞᯉᯪᯀᯉᯬ᯲ ᯉᯪ ᯐᯂᯬᯋ ᯑᯪ ᯤᯅᯉ, ᯑᯪᯖᯬᯎᯪᯂᯉᯬ᯲ ᯉᯘᯪᯑ ᯔ ᯤᯅᯉ ᯐᯞ ᯑᯪᯇᯥᯞᯉᯬ᯲ ᯖᯮ ᯅᯞᯪᯀᯉ᯲ ᯉᯪ ᯂᯮᯖ ᯤ
17 Jadi dung ro di balian tinogihonnasida i, ninna na sahalak ma: Palua ma hosam, unang bereng dompak pudim, jala unang ngongong ho di sandok rura on, tu dolok ma ho maporus, asa unang ripas ho. ᯐᯑᯪ ᯑᯮᯰ ᯒᯬ ᯑᯪ ᯅᯞᯪᯀᯉ᯲ ᯖᯪᯉᯬᯎᯪᯂᯉᯬ᯲ᯉᯘᯪᯑ ᯤ, ᯉᯉᯪ᯲ᯉ ᯉ ᯘᯂᯞᯄ᯦᯲ ᯔ : ᯇᯞᯮᯀ ᯔ ᯂᯬᯘᯔ᯲, ᯥᯉᯰ ᯅᯩᯒᯰᯩ ᯑᯔᯬ᯲ᯇᯄ᯦᯲ ᯇᯮᯑᯔᯪ᯲, ᯐᯞ ᯥᯉᯰ ᯝᯬᯝᯬᯰ ᯂᯬ ᯑᯪ ᯘᯉ᯲ᯑᯄ᯦ᯬ᯲ ᯒᯮᯒ ᯀᯉᯬ᯲, ᯖᯮ ᯑᯬᯞᯄ᯦ᯬ᯲ ᯔ ᯂᯬ ᯔᯇᯬᯒᯘᯮ᯲, ᯀᯘ ᯥᯉᯰ ᯒᯪᯇᯘ᯲ ᯂᯬ
18 Alai ninna si Lot ma mandok nasida: Ndangana, manomba ahu di Ho ale Tuhanku. ᯀᯞᯤ ᯉᯉᯪ᯲ᯉ ᯘᯪ ᯞᯖᯬ᯲ ᯔ ᯔᯉ᯲ᯑᯄ᯦ᯬ᯲ ᯉᯘᯪᯑ : ᯉ᯲ᯑᯝᯉ, ᯔᯉᯔᯬ᯲ᯅ ᯀᯂᯮ ᯑᯪ ᯂᯬ ᯀᯞᯩ ᯖᯮᯂᯉ᯲ᯄ᯦ᯮ
19 Ida ma, nunga sapala jumpangan asi ni roha naposomon maradophon Ho, sai pagodang ma asi ni roham na binahenmu tu ahu laho pangoluhon hosangku. Alai ndang tarbahen ahu malua ianggo tung tu dolok an, atek tung dapot hamagoan i ahu, tung mate ahu maon. ᯤᯑ ᯔ, ᯉᯮᯝ ᯘᯇᯞ ᯐᯔᯮ᯲ᯇᯝᯉ᯲ ᯀᯘᯪ ᯉᯪ ᯒᯬᯂ ᯉᯇᯬᯘᯬᯔᯉᯬ᯲ ᯔᯒᯑᯇᯬ᯲ᯂᯉᯬ᯲ ᯂᯬ, ᯘᯤ ᯇᯎᯬᯑᯰ ᯔ ᯀᯘᯪ ᯉᯪ ᯒᯬᯂᯔ᯲ ᯉ ᯅᯪᯉᯂᯉᯩ᯲ᯔᯮ ᯖᯮ ᯀᯂᯮ ᯞᯂᯬ ᯇᯝᯬᯞᯮᯂᯉᯬ᯲ ᯂᯬᯘᯰᯄ᯦ᯮ. ᯀᯞᯤ ᯉ᯲ᯑᯰ ᯖᯒ᯲ᯅᯂᯉᯩ᯲ ᯀᯂᯮ ᯔᯞᯮᯀ ᯤᯀᯰᯎᯬ ᯖᯮᯰ ᯖᯮ ᯑᯬᯞᯄ᯦ᯬ᯲ ᯀᯉ᯲, ᯀᯖᯄᯩ᯦᯲ ᯖᯮᯰ ᯑᯇᯖᯬ᯲ ᯂᯔᯎᯬᯀᯉ᯲ ᯤ ᯀᯂᯮ, ᯖᯮᯰ ᯔᯖᯩ ᯀᯂᯮ ᯔᯀᯉᯬ᯲
20 Ua bereng, jonok do huta an bahen haporusan, jala metmet do; ua tusi ma ahu loas maporus, nda na metmet do i nian? Asal mangolu hosangkon. ᯥᯀ ᯅᯩᯒᯰᯩ, ᯐᯬᯉᯄ᯦ᯬ᯲ ᯑᯬ ᯂᯮᯖ ᯀᯉ᯲ ᯅᯂᯉᯩ᯲ ᯂᯇᯬᯒᯮᯘᯉ᯲, ᯐᯞ ᯔᯖᯩ᯲ᯔᯖᯩ᯲ ᯑᯬ : ᯥᯀ ᯖᯮᯘᯪ ᯔ ᯀᯂᯮ ᯞᯬᯀᯘ᯲ ᯔᯇᯬᯒᯘᯮ᯲, ᯉ᯲ᯑ ᯉ ᯔᯖᯩ᯲ᯔᯖᯩ᯲ ᯑᯬ ᯤ ᯉᯪᯀᯉ᯲ ? ᯀᯘᯞ᯲ ᯔᯝᯬᯞᯮ ᯂᯬᯘᯰᯄ᯦ᯉᯬ᯲
21 Dung i ninna suruan i ma mandok ibana: Taringot tu hata ondeng pe tataponku do ho, ndang ripashononku huta na nidokmi. ᯑᯮᯰ ᯤ ᯉᯉᯪ᯲ᯉ ᯘᯮᯒᯮᯀᯉ᯲ ᯤ ᯔ ᯔᯉ᯲ᯑᯄ᯦ᯬ᯲ ᯤᯅᯉ : ᯖᯒᯪᯝᯖᯬ᯲ ᯖᯮ ᯂᯖ ᯀᯉᯬ᯲ᯑᯰᯩ ᯇᯩ ᯖᯖᯇᯉᯬ᯲ᯄ᯦ᯮ ᯑᯬ ᯂᯬ, ᯉ᯲ᯑᯰ ᯒᯪᯇᯘ᯲ᯂᯬᯉᯉᯬ᯲ᯄ᯦ᯮ ᯂᯮᯖ ᯉ ᯉᯪᯑᯄ᯦ᯬ᯲ᯔᯪ
22 Halaputi ma ne maporus tusi, ai ndang tarbahen Ahu mambahen manang dia, paima tolhas ho tusi. Ala ni do umbahen Zoar huta i digoar halak. ᯂᯞᯇᯮᯖᯪ ᯔ ᯉᯩ ᯔᯇᯬᯒᯘᯮ᯲ ᯖᯮᯘᯪ, ᯀᯤ ᯉ᯲ᯑᯰ ᯖᯒ᯲ᯅᯂᯉᯩ᯲ ᯀᯂᯮ ᯔᯔ᯲ᯅᯂᯉᯩ᯲ ᯔᯉᯰ ᯑᯪᯀ, ᯇᯤᯔ ᯖᯞᯬ᯲ᯂᯘ᯲ ᯂᯬ ᯖᯮᯘᯪ. ᯀᯞ ᯉᯪ ᯑᯬ ᯀᯔᯮ᯲ᯅᯂᯉᯩ᯲ ᯐᯬᯀᯒ᯲ ᯂᯮᯖ ᯤ ᯑᯪᯎᯬᯀᯒ᯲ ᯂᯞᯄ᯦᯲
23 Nunga pola binsar mata ni ari di tano on, di na sahat i si Lot tu Zoar. ᯉᯮᯝ ᯇᯬᯞ ᯅᯉᯪ᯲ᯘᯒ᯲ ᯔᯖ ᯉᯪ ᯀᯒᯪ ᯑᯪ ᯖᯉᯬ ᯀᯉᯬ᯲, ᯑᯪ ᯉ ᯘᯂᯖ᯲ ᯤ ᯘᯪ ᯞᯖᯬ᯲ ᯖᯮ ᯐᯬᯀᯒ᯲
Harorongrong ni Sodom ro di angka luat humaliang 24-29. ᯂᯒᯬᯒᯬᯰᯒᯬᯰ ᯉᯪ ᯘᯬᯑᯔᯬ᯲ ᯒᯬ ᯑᯪ ᯀᯰᯄ᯦ ᯞᯮᯀᯖ᯲ ᯂᯮᯔᯞᯪᯀᯰ ᯑᯮᯀᯇᯮᯞᯮ ᯀᯬᯇᯖ᯲ – ᯑᯮᯀᯇᯮᯞᯮ ᯘᯪᯀ
III. 24 Dung i diparo Jahowa ma udan barerang dohot api tu Sodom dohot tu Gomorra, sian Jahowa, sian banua ginjang. ᯑᯮᯰ ᯤ ᯑᯪᯇᯒᯬ ᯐᯂᯬᯋ ᯔ ᯥᯑᯉ᯲ ᯅᯒᯩᯒᯰ ᯑᯬᯂᯖᯬ᯲ ᯀᯇᯪ ᯖᯮ ᯘᯬᯑᯔᯬ᯲ ᯑᯬᯂᯖᯬ᯲ ᯖᯮ ᯎᯬᯔᯒᯬ᯲ᯒ, ᯘᯪᯀᯉ᯲ ᯐᯂᯬᯋ, ᯘᯪᯀᯉ᯲ ᯅᯉᯮᯀ ᯎᯉᯪ᯲ᯐᯰ
25 Jadi dipabalik Tuhan i ma angka huta i dohot na saluat i humaliang, ro di sude pangisi ni angka huta i dohot suansuanan ni tano i. ᯐᯑᯪ ᯑᯪᯇᯅᯞᯄ᯦ᯪ᯲ ᯖᯮᯂᯉ᯲ ᯤ ᯔ ᯀᯰᯄ᯦ ᯂᯮᯖ ᯤ ᯑᯬᯂᯖᯬ᯲ ᯉ ᯘᯞᯮᯀᯖ᯲ ᯤ ᯂᯮᯔᯞᯪᯀᯰ, ᯒᯬ ᯑᯪ ᯘᯮᯑᯩ ᯇᯝᯪᯘᯪ ᯉᯪ ᯀᯰᯄ᯦ ᯂᯮᯖ ᯤ ᯑᯬᯂᯖᯬ᯲ ᯘᯮᯀᯉ᯲ᯘᯮᯀᯉᯉ᯲ ᯉᯪ ᯖᯉᯬ ᯤ
26 Dung i manaili ma jolmana i dompak pudi, gabe batu sira ibana. ᯑᯮᯰ ᯤ ᯔᯉᯤᯞᯪ ᯔ ᯐᯞᯬ᯲ᯔᯉ ᯤ ᯑᯔᯬ᯲ᯇᯄ᯦᯲ ᯇᯮᯑᯪ, ᯎᯅᯩ ᯅᯖᯮ ᯘᯪᯒ ᯤᯅᯉ
27 Alai borhat do anggo si Abraham sogot manogot i tumopot hajongjonganna i di jolo ni Jahowa. ᯀᯞᯤ ᯅᯒᯬ᯲ᯂᯖ᯲ ᯑᯬ ᯀᯰᯎᯬ ᯘᯪ ᯀᯅ᯲ᯒᯂᯔ᯲ ᯘᯬᯎᯖᯬ᯲ ᯔᯉᯬᯎᯖᯬ᯲ ᯤ ᯖᯮᯔᯬᯇᯖᯬ᯲ ᯂᯐᯬᯰᯐᯬᯝᯉ᯲ᯉ ᯤ ᯑᯪ ᯐᯬᯞᯬ ᯉᯪ ᯐᯂᯬᯋ
28 Dung i ditatap ma dompak Sodom dohot Gomorra dohot dompak sude tano na humaliang i. Jadi diida ma martimpul timus sian tano i, songon timus ni pamurunan. ᯑᯮᯰ ᯤ ᯑᯪᯖᯖᯇ᯲ ᯔ ᯑᯔᯬ᯲ᯇᯄ᯦᯲ ᯘᯬᯑᯔᯬ᯲ ᯑᯬᯂᯖᯬ᯲ ᯎᯬᯔᯒᯬ᯲ᯒ ᯑᯬᯂᯖᯬ᯲ ᯑᯔᯬ᯲ᯇᯄ᯦᯲ ᯘᯮᯑᯩ ᯖᯉᯬ ᯉ ᯂᯮᯔᯞᯪᯀᯰ ᯤ. ᯐᯑᯪ ᯑᯪᯤᯑ ᯔ ᯔᯒ᯲ᯖᯔᯪ᯲ᯇᯞᯮ᯲ ᯖᯪᯔᯘᯮ᯲ ᯘᯪᯀᯉ᯲ ᯖᯉᯬ ᯤ, ᯘᯬᯝᯉᯬ᯲ ᯖᯪᯔᯘᯮ᯲ ᯉᯪ ᯇᯔᯮᯒᯮᯉᯉ᯲
29 Dung i laho mangaripashon Debata di angka huta ni rura i, diingot Debata ma si Abraham, ditogihon ma si Lot sian parsitongaan ni hamagoan laho mangago angka huta na niinganan ni si Lot najolo. ᯑᯮᯰ ᯤ ᯞᯂᯬ ᯔᯝᯒᯪᯇᯘ᯲ᯂᯉᯬ᯲ ᯑᯩᯅᯖ ᯑᯪ ᯀᯰᯄ᯦ ᯂᯮᯖ ᯉᯪ ᯒᯮᯒ ᯤ, ᯑᯪᯤᯝᯖᯬ᯲ ᯑᯩᯅᯖ ᯔ ᯘᯪ ᯀᯅ᯲ᯒᯂᯔ᯲, ᯑᯪᯖᯬᯎᯪᯂᯉᯬ᯲ ᯔ ᯘᯪ ᯞᯖᯬ᯲ ᯘᯪᯀᯉ᯲ ᯇᯒ᯲ᯘᯪᯖᯬᯝᯀᯉ᯲ ᯉᯪ ᯂᯔᯎᯬᯀᯉ᯲ ᯞᯂᯬ ᯔᯝᯎᯬ ᯀᯰᯄ᯦ ᯂᯮᯖ ᯉ ᯉᯪᯤᯝᯉᯉ᯲ ᯉᯪ ᯘᯪ ᯞᯖᯬ᯲ ᯉᯐᯬᯞᯬ
Dosa ni si Lot tu angka boruna 30-38. ᯑᯬᯘ ᯉᯪ ᯘᯪ ᯞᯖᯬ᯲ ᯖᯮ ᯀᯰᯄ᯦ ᯅᯬᯒᯮᯉ ᯖᯬᯞᯮᯇᯮᯞᯮ – ᯖᯬᯞᯮᯇᯮᯞᯮ ᯥᯀᯞᯮ
IV. 30 Dung i nangkok ma si Lot sian Zoar laho maringan tu dolok rap dohot boruna na dua i, ai mabiar do ibana maringan di Zoar, gabe diingani ma sada liang, ibana dohot boruna na dua i. ᯑᯮᯰ ᯤ ᯉᯰᯄ᯦ᯄ᯦ᯬ ᯔ ᯘᯪ ᯞᯖᯬ᯲ ᯘᯪᯀᯉ᯲ ᯐᯬᯀᯒ᯲ ᯞᯂᯬ ᯔᯒᯪᯝᯉ᯲ ᯖᯮ ᯑᯬᯞᯄ᯦ᯬ᯲ ᯒᯇ᯲ ᯑᯬᯂᯖᯬ᯲ ᯅᯬᯒᯮᯉ ᯉ ᯑᯮᯀ ᯤ, ᯀᯤ ᯔᯅᯪᯀᯒ᯲ ᯑᯬ ᯤᯅᯉ ᯔᯒᯪᯝᯉ᯲ ᯑᯪ ᯐᯬᯀᯒ᯲, ᯎᯅᯩ ᯑᯪᯤᯝᯉᯪ ᯔ ᯘᯑ ᯞᯪᯀᯰ, ᯤᯅᯉ ᯑᯬᯂᯖᯬ᯲ ᯅᯬᯒᯮᯉ ᯉ ᯑᯮᯀ ᯤ
31 Dung i ninna boruna sihahaan i mandok sianggian i: Nunga matua amanta, jala ndang adong be baoa di tano on na ro tu hita, songon hasomalan di liat portibi on. ᯑᯮᯰ ᯤ ᯉᯉᯪ᯲ᯉ ᯅᯬᯒᯮᯉ ᯘᯪᯂᯂᯀᯉ᯲ ᯤ ᯔᯉ᯲ᯑᯄ᯦ᯬ᯲ ᯘᯪᯀᯰᯎᯪᯀᯉ᯲ ᯤ. ᯉᯮᯝ ᯔᯖᯮᯀ ᯀᯔᯉ᯲ᯖ, ᯐᯞ ᯉ᯲ᯑᯰ ᯀᯑᯬᯰ ᯅᯩ ᯅᯀᯬᯀ ᯑᯪ ᯖᯉᯬ ᯀᯉᯬ᯲ ᯉ ᯒᯬ ᯖᯮ ᯂᯪᯖ, ᯘᯬᯝᯉᯬ᯲ ᯂᯘᯬᯔᯞᯉ᯲ ᯑᯪ ᯞᯪᯀᯖ᯲ ᯇᯒᯬ᯲ᯖᯪᯅᯪ ᯀᯉᯬ᯲
32 Tole, tapainumhon ma anggur tu amanta, jala taparangkupi ibana modom, asa tapangolu pinompar sian amanta. ᯖᯬᯞᯩ, ᯖᯇᯤᯉᯔᯮ᯲ᯂᯉᯬ᯲ ᯔ ᯀᯰᯎᯒᯮ᯲ ᯖᯮ ᯀᯔᯉ᯲ᯖ, ᯐᯞ ᯖᯇᯒᯰᯄ᯦ᯮᯇᯪ ᯤᯅᯉ ᯔᯬᯑᯔᯬ᯲, ᯀᯘ ᯖᯇᯝᯬᯞᯮ ᯇᯪᯉᯔᯬ᯲ᯇᯒ᯲ ᯘᯪᯀᯉ᯲ ᯀᯔᯉ᯲ᯖ
33 Jadi dipainumhon nasida ma anggur tu amanasida i di na saborngin i. Dung i ro sihahaan i diparangkupi ma amana i, ndang pamotoanna laho modom dohot laho hehe boruna i. ᯐᯑᯪ ᯑᯪᯇᯤᯉᯔᯮ᯲ᯂᯉᯬ᯲ ᯉᯘᯪᯑ ᯔ ᯀᯰᯎᯒᯮ᯲ ᯖᯮ ᯀᯔᯉᯘᯪᯑ ᯤ ᯑᯪ ᯉ ᯘᯅᯒᯬ᯲ᯝᯉᯪ᯲ ᯤ. ᯑᯮᯰ ᯤ ᯒᯬ ᯔ ᯘᯪᯂᯂᯀᯉ᯲ ᯤ ᯑᯪᯇᯒᯰᯰᯄ᯦ᯮᯇᯪ ᯔ ᯀᯔᯉ ᯤ, ᯉ᯲ᯑᯰ ᯇᯔᯬᯖᯬᯀᯉ᯲ᯉ ᯞᯂᯬ ᯔᯬᯑᯔᯬ᯲ ᯑᯬᯂᯖᯬ᯲ ᯞᯂᯬ ᯂᯩᯂᯩ ᯅᯬᯒᯮᯉ ᯤ
34 Manogotna i ninna sihahaan i ma tu sianggian i: Nunga huparangkupi damang i na borngin, talehon ma dohot saborngin on anggur inumonna, asa laho ho mangangkupi ibana, asa tapangolu pinompar sian amanta. ᯔᯉᯬᯎᯖᯬ᯲ᯉ ᯤ ᯉᯉᯪ᯲ᯉ ᯘᯪᯂᯂᯀᯉ᯲ ᯤ ᯔ ᯖᯮ ᯘᯪᯀᯰᯎᯪᯀᯉ᯲ ᯤ : ᯉᯮᯝ ᯂᯮᯇᯒᯰᯄ᯦ᯮᯇᯪ ᯑᯔᯰ ᯤ ᯉ ᯅᯒᯬ᯲ᯝᯉᯪ᯲, ᯖᯞᯩᯂᯉᯬ᯲ ᯔ ᯑᯬᯂᯖᯬ᯲ ᯘᯅᯒᯬ᯲ᯝᯉᯪ᯲ ᯀᯉᯬ᯲ ᯀᯰᯎᯒᯮ᯲ ᯤᯉᯮᯔᯉᯬ᯲ᯉ, ᯀᯘ ᯞᯂᯬ ᯂᯬ ᯔᯝᯰᯄ᯦ᯮᯇᯪ ᯤᯅᯉ, ᯀᯘ ᯖᯇᯝᯬᯞᯮ ᯇᯪᯉᯔᯬ᯲ᯇᯒ᯲ ᯘᯪᯀᯉ᯲ ᯀᯔᯉ᯲ᯖ
35 Jadi dilehon nasida ma di na saborngin i anggur inumon ni amanasida. Dung i hehe ma sianggian i diparangkupi ma ibana, ndang pamotoanna laho modom dohot laho hehe boruna i. ᯐᯑᯪ ᯑᯪᯞᯩᯂᯉᯬ᯲ ᯉᯘᯪᯑ ᯔ ᯑᯪ ᯉ ᯘᯅᯒᯬ᯲ᯝᯉᯪ᯲ ᯤ ᯀᯰᯎᯒᯮ᯲ ᯤᯉᯮᯔᯉᯬ᯲ ᯉᯪ ᯀᯔᯉᯘᯪᯑ. ᯑᯮᯰ ᯤ ᯂᯩᯂᯩ ᯔ ᯘᯪᯀᯰᯎᯪᯀᯉ᯲ ᯤ ᯑᯪᯇᯒᯰᯄ᯦ᯮᯇᯪ ᯔ ᯤᯅᯉ, ᯉ᯲ᯑᯰ ᯇᯔᯬᯖᯬᯀᯉ᯲ᯉ ᯞᯂᯬ ᯔᯬᯑᯔᯬ᯲ ᯑᯬᯂᯖᯬ᯲ ᯞᯂᯬ ᯂᯩᯂᯩ ᯅᯬᯒᯮᯉ ᯤ.
36 Jadi gabegabean be ma boru ni si Lot i duansa sian amanasida. ᯐᯑᯪ ᯎᯅᯩᯎᯅᯩᯀᯉ᯲ᯔ ᯅᯬᯒᯮ ᯉᯪ ᯘᯪ ᯞᯖᯬ᯲ ᯑᯮᯀᯉ᯲ᯘ ᯘᯪᯀᯉ ᯀᯔᯉᯘᯪᯑ
37 Dung i ditubuhon sihahaan i ma anak sada, dibahen ma goarna Moab, ibana do ompu ni halak Moab rasirasa nuaeng. ᯑᯮᯰ ᯤ ᯑᯪᯖᯮᯅᯮᯂᯉᯬ᯲ ᯘᯪᯀᯂᯀᯉ᯲ ᯤ ᯔ ᯀᯉᯄ᯦᯲ ᯘᯑ, ᯑᯪᯅᯂᯉᯩ᯲ ᯔ ᯎᯬᯀᯒ᯲ᯉ ᯔᯬᯀᯅ᯲, ᯤᯅᯉ ᯑᯬ ᯀᯔᯬ᯲ᯇᯮ ᯉᯪ ᯂᯞᯄ᯦᯲ ᯔᯬᯀᯅ᯲ ᯒᯘᯪ ᯒᯘ ᯉᯮᯀᯀᯰᯩ
38 Dohot sianggian i manubuhon anak sada, dibahen ma goarna Ben-Ammi, ibana do ompu ni halak Amon rasirasa nuaeng. ᯑᯬᯂᯖᯬ᯲ ᯘᯪᯀᯰᯎᯪᯀᯉ᯲ ᯤ ᯔᯉᯮᯅᯮᯂᯉᯬ᯲ ᯀᯉᯄ᯦᯲ ᯘᯑ, ᯑᯪᯅᯂᯉᯩ᯲ ᯔ ᯎᯬᯀᯒ᯲ᯉ ᯅᯉᯩ᯲ ᯀᯔ᯲ᯔᯪ, ᯤᯅᯉ ᯑᯬ ᯀᯔᯬ᯲ᯇᯮ ᯉᯪ ᯂᯞᯄ᯦᯲ ᯀᯔᯉᯬ᯲ ᯒᯘᯪᯒᯘ ᯉᯮᯀᯀᯰᯩ