Pasupasu ni Debata tu jolma na malua i 1-7. ᯇᯘᯮᯇᯘᯮ ᯉᯪ ᯑᯩᯅᯖ ᯖᯮ ᯐᯞᯬ᯲ᯔ ᯉ ᯔᯞᯮᯀ ᯤ ᯘᯑ – ᯇᯪᯖᯮ
Padan ni Debata dohot jolma i. Halibutongan, partinandaan ni padan i 8-17. ᯇᯑᯉ᯲ ᯉᯪ ᯑᯩᯅᯖ ᯑᯬᯂᯖᯬ᯲ ᯐᯞᯬ᯲ᯔ ᯤ. ᯂᯞᯪᯅᯮᯖᯬᯝᯉ᯲, ᯇᯒ᯲ᯖᯪᯉᯉ᯲ᯑᯀᯉ᯲ ᯉᯪ ᯇᯑᯉ᯲ ᯤ ᯥᯀᯞᯮ – ᯘᯔᯇᯮᯞᯮ ᯇᯪᯖᯮ
Hamabukon ni si Noak. Bura dohot pasupasu panurirangonna tu angka anakna i 18-29. ᯂᯔᯅᯮᯄ᯦ᯉᯬ᯲ ᯉᯪ ᯘᯪ ᯉᯬᯀᯄ᯦᯲. ᯅᯮᯒ ᯑᯬᯂᯖᯬ᯲ ᯇᯘᯮᯇᯘᯮ ᯇᯉᯮᯒᯪᯒᯝᯉᯬ᯲ᯉ ᯖᯮ ᯀᯰᯄ᯦ ᯀᯉᯄ᯦᯲ᯉ ᯤ ᯘᯔ᯲ᯇᯮᯞᯮ ᯥᯀᯞᯮ – ᯑᯮᯀᯇᯮᯞᯮ ᯘᯪᯀ
Pasupasu ni Debata tu jolma na malua i 1-7. ᯇᯘᯮᯇᯘᯮ ᯉᯪ ᯑᯩᯅᯖ ᯖᯮ ᯐᯞᯬ᯲ᯔ ᯉ ᯔᯞᯮᯀ ᯤ ᯘᯑ – ᯇᯪᯖᯮ
I. 1 Dung i dipasupasu Debata ma si Noak dohot angka anakna, ninna ma mandok nasida: Gabe ma hamu, asa sopar, jala gohi hamu ma tano on. ᯑᯮ ᯤ ᯑᯪᯇᯘᯮᯇᯘᯮ ᯑᯩᯅᯖ ᯔ ᯘᯪ ᯉᯬᯀᯄ᯦᯲ ᯑᯬᯂᯖᯬ᯲ ᯀᯰᯄ᯦ ᯀᯉᯄ᯦᯲ᯉ, ᯉᯉᯪ᯲ᯉ ᯔ ᯔᯉ᯲ᯑᯄ᯦ᯬ᯲ ᯉᯘᯪᯑ : ᯎᯅᯩ ᯔ ᯂᯔᯮ, ᯀᯘ ᯘᯬᯇᯒ᯲ ᯐᯞ ᯎᯬᯂᯪ ᯂᯔᯮ ᯔ ᯖᯉᯬ ᯀᯉᯬ᯲
2 Marhabiaran jala jimbolangon ma marnida hamu sude binatang di tano on, ro di sude pidong angka na martongatonga langit dohot nasa na manjirir di tano on, ro di dengke ni laut sudena, sahat tu tanganmu ma nasida. ᯔᯒ᯲ᯂᯅᯪᯀᯒᯉ᯲ ᯐᯞ ᯐᯔᯪ᯲ᯅᯬᯞᯝᯉᯬ᯲ ᯔ ᯔᯒ᯲ᯉᯪᯑ ᯂᯔᯮ ᯘᯮᯑᯩ ᯅᯪᯉᯖᯰ ᯑᯪ ᯖᯉᯬ ᯀᯉᯬ᯲, ᯒᯬ ᯑᯪ ᯘᯮᯑᯩ ᯇᯪᯑᯬᯰ ᯀᯰᯄ᯦ ᯉ ᯔᯒ᯲ᯖᯬᯝᯖᯬᯝ ᯞᯝᯖᯪ᯲ ᯑᯬᯂᯖᯬ᯲ ᯉᯘ ᯉ ᯔᯉ᯲ᯐᯪᯒᯒᯪ᯲ ᯑᯪ ᯖᯉᯬ ᯀᯉᯬ᯲, ᯒᯬ ᯑᯪ ᯑᯰᯩᯄᯰᯩ ᯉᯪ ᯞᯀᯖᯮ᯲ ᯘᯮᯑᯩᯉ, ᯘᯂᯖ᯲ ᯖᯮ ᯖᯝᯉ᯲ᯔᯮ ᯔ
3 Nasa na manggulmit, na mangolu bahen panganonmuna, sahat tu hamu ma i sudena hulehon, songon bulung rata ᯉᯘ ᯉ ᯔᯰᯎᯞᯮ᯲ᯔᯖᯪ᯲, ᯉ ᯔᯝᯬᯞᯮ ᯅᯂᯉᯩ᯲ ᯇᯝᯉᯉᯬ᯲ᯔᯮᯉ, ᯘᯂᯖ᯲ ᯖᯮ ᯂᯔᯮ ᯔ ᯤ ᯘᯮᯑᯩᯉ ᯂᯮᯞᯩᯂᯉᯬ᯲, ᯘᯬᯝᯉᯬ᯲ ᯅᯮᯞᯮᯰ ᯒᯖ
4 Alai unang pangan hamu juhut, molo di bagasan dope hosana, mandok mudarna i. ᯀᯞᯤ ᯥᯉᯰ ᯇᯝᯉ᯲ ᯂᯔᯮ ᯐᯮᯂᯖᯮ᯲, ᯔᯬᯞᯬ ᯑᯪ ᯅᯎᯘᯉ᯲ ᯑᯬᯇᯩ ᯂᯬᯘᯉ, ᯔᯉ᯲ᯑᯄ᯦ᯬ᯲ ᯔᯮᯑᯒ᯲ᯉ ᯤ
5 Tongon do, sai luluhononku do mudarmuna marguru tu hosamuna i; sai luluhononku do sian tangan ni nasa binatang dohot sian tangan ni jolma; sian tangan ni baoa donganna i luluhononku hosa ni jolma i. ᯖᯬᯝᯉᯬ᯲ ᯑᯬ, ᯘᯤ ᯞᯮᯞᯮᯂᯬᯉᯉᯬ᯲ᯄ᯦ᯮ ᯑᯬ ᯔᯮᯑᯒ᯲ᯔᯮᯉ ᯔᯒ᯲ᯎᯮᯒᯮ ᯖᯮ ᯂᯬᯘᯔᯮᯉ ᯤ ; ᯘᯤ ᯞᯮᯞᯮᯂᯬᯉᯉᯬ᯲ᯄ᯦ᯮ ᯑᯬ ᯘᯪᯀᯉ᯲ ᯖᯝᯉ᯲ ᯉᯪ ᯉᯘ ᯅᯪᯉᯖᯰ ᯑᯬᯂᯖᯬ᯲ ᯘᯪᯀᯉ᯲ ᯖᯝᯉ᯲ ᯉᯪ ᯐᯞᯬ᯲ᯔ : ᯘᯪᯀᯉ᯲ ᯖᯝᯉ᯲ ᯉᯪ ᯅᯀᯬᯀ ᯑᯬᯝᯉ᯲ᯉ ᯤ ᯞᯮᯞᯮᯂᯬᯉᯉᯬ᯲ᯄ᯦ᯮ ᯂᯬᯘ ᯉᯪ ᯐᯞᯬ᯲ᯔ ᯤ
6 Manang ise na mandurushon mudar ni jolma, durushonon ni jolma ma mudarna; ai tudos tu rupa ni Debata jolma i ditompa Debata. ᯔᯉᯰ ᯤᯘᯩ ᯉ ᯔᯉ᯲ᯑᯮᯒᯮᯘ᯲ᯂᯉᯬ᯲ ᯔᯮᯑᯒ᯲ ᯉᯪ ᯐᯞᯬ᯲ᯔ, ᯑᯮᯒᯘᯮ᯲ᯂᯬᯉᯉᯬ᯲ ᯉᯪᯐᯞᯬ᯲ᯔ ᯔ ᯔᯮᯑᯒ᯲ᯉ : ᯀᯤ ᯖᯮᯑᯘᯬ᯲ ᯖᯮ ᯒᯮᯇ ᯉᯪ ᯑᯩᯅᯖ ᯐᯞᯬ᯲ᯔ ᯤ ᯑᯪᯖᯔᯬ᯲ᯇ ᯑᯩᯅᯖ
7 Alai gabe ma anggo hamu asa sopar, lam rarat ma hamu di tano on, jala lam sopar disi. ᯀᯞᯤ ᯎᯅᯩ ᯔ ᯀᯰᯎᯬ ᯂᯔᯮ ᯀᯘ ᯘᯬᯇᯒ᯲, ᯞᯔ᯲ ᯒᯒᯖ᯲ ᯔ ᯂᯔᯮ ᯑᯪ ᯖᯉᯬ ᯀᯉᯬ᯲ ᯐᯞ ᯞᯔ᯲ ᯘᯬᯇᯒ᯲ ᯑᯪᯘᯪ
Padan ni Debata dohot jolma i. Halibutongan, partinandaan ni padan i 8-17. ᯇᯑᯉ᯲ ᯉᯪ ᯑᯩᯅᯖ ᯑᯬᯂᯖᯬ᯲ ᯐᯞᯬ᯲ᯔ ᯤ. ᯂᯞᯪᯅᯮᯖᯬᯝᯉ᯲, ᯇᯒ᯲ᯖᯪᯉᯉ᯲ᯑᯀᯉ᯲ ᯉᯪ ᯇᯑᯉ᯲ ᯤ ᯥᯀᯞᯮ – ᯘᯔᯇᯮᯞᯮ ᯇᯪᯖᯮ
II. 8 Dung i ninna Debata ma mandok si Noak dohot tu anakna angka na rap dohot ibana, botima i: ᯑᯮᯰ ᯤ ᯉᯉᯪ᯲ᯉ ᯑᯩᯅᯖ ᯔ ᯔᯉ᯲ᯑᯄ᯦ᯬ᯲ ᯘᯪ ᯉᯬᯀᯄ᯦᯲ ᯑᯬᯂᯖᯬ᯲ ᯖᯮ ᯀᯉᯄ᯦᯲ᯉ ᯀᯰᯄ᯦ ᯉ ᯒᯇ᯲ ᯑᯬᯂᯖᯬ᯲ ᯤᯅᯉ, ᯅᯬᯖᯪᯔ ᯤ
9 Ida ma anggo Ahu, pahotonku ma padanhu tu hamu ro di pinomparmuna sogot. ᯤᯑ ᯔ ᯀᯰᯎᯬ ᯀᯂᯮ, ᯇᯂᯬᯖᯉᯬ᯲ᯄ᯦ᯮ ᯔ ᯇᯑᯉ᯲ᯂᯮ ᯖᯮ ᯂᯔᯮ ᯒᯬ ᯑᯪ ᯇᯪᯉᯔᯬ᯲ᯇᯒ᯲ᯔᯮᯉ ᯘᯬᯎᯖᯬ᯲
10 Dohot tu nasa na marhosa na mangolu angka na rap dohot hamu, angka pidong, pinahan dohot nasa binatang ni tano on, angka na rap dohot hamu, sian luhut angka na ruar sian parau ro di sude pahanpahanan ni tano on. ᯑᯬᯂᯖᯬ᯲ ᯖᯮ ᯉᯘ ᯉ ᯔᯒ᯲ᯂᯬᯘ ᯉ ᯔᯝᯬᯞᯮ ᯀᯰᯄ᯦ ᯉ ᯒᯇ᯲ ᯑᯬᯂᯖᯬ᯲ ᯂᯔᯮ, ᯀᯰᯄ᯦ ᯇᯪᯑᯬᯰ, ᯇᯪᯉᯂᯉ᯲ ᯑᯬᯂᯖᯬ᯲ ᯉᯘ ᯅᯪᯉᯖᯰ ᯉᯪ ᯖᯉᯬ ᯀᯉᯬ᯲, ᯀᯰᯄ᯦ ᯉ ᯒᯇ᯲ ᯑᯬᯂᯖᯬ᯲ ᯂᯔᯮ, ᯘᯪᯀᯉ᯲ ᯞᯮᯂᯖᯮ᯲ ᯀᯰᯄ᯦ ᯉ ᯒᯮᯀᯒ᯲ ᯘᯪᯀᯉ᯲ ᯇᯒᯥ ᯒᯬ ᯑᯪ ᯘᯮᯑᯩ ᯇᯂᯉ᯲ᯇᯂᯉᯉ᯲ ᯉᯪ ᯖᯉᯬ ᯀᯉᯬ᯲
11 Pahotonku ma padanhu dohot hamu, paboa na so jadi be ripashonon ni aek na sumar nasa na mardaging, huhut paboa na so masa be aek na sumar i mangaripashon tano on. ᯇᯂᯬᯖᯉᯬ᯲ᯄ᯦ᯮ ᯔ ᯇᯑᯉ᯲ᯂᯮ ᯑᯬᯂᯖᯬ᯲ ᯂᯔᯮ, ᯇᯅᯬᯀ ᯉ ᯘᯬ ᯐᯑᯪ ᯅᯩ ᯒᯪᯇᯘ᯲ᯂᯬᯉᯉᯬ᯲ ᯉᯪ ᯀᯀᯄᯩ᯦᯲ ᯉ ᯘᯮᯔᯒ᯲ ᯉᯘ ᯉ ᯔᯒ᯲ᯑᯎᯪᯰ, ᯂᯮᯂᯖᯮ᯲ ᯇᯅᯬᯀ ᯉ ᯘᯬ ᯔᯘ ᯅᯩ ᯀᯀᯄᯩ᯦᯲ ᯉ ᯘᯮᯔᯒ᯲ ᯤ ᯔᯝᯒᯪᯇᯘ᯲ᯂᯉᯬ᯲ ᯖᯉᯬ ᯀᯉᯬ᯲
12 Dung i ninna Debata ma: On ma tanda ni padan na hubahen i tu hamu dohot tu nasa na marhosa na mangolu, angka na rap dohot hamu ro di salelenglelengna: ᯑᯮᯰ ᯤ ᯉᯉᯪ᯲ᯉ ᯑᯩᯅᯖ ᯔ : ᯀᯉᯬ᯲ ᯔ ᯖᯉ᯲ᯑ ᯉᯪ ᯇᯑᯉ᯲ ᯉ ᯂᯮᯅᯂᯉᯩ᯲ ᯤ ᯖᯮ ᯂᯔᯮ ᯑᯬᯂᯖᯬ᯲ ᯖᯮ ᯉᯘ ᯉ ᯔᯒ᯲ᯂᯬᯘ ᯉ ᯔᯝᯬᯞᯮ, ᯀᯰᯄ᯦ ᯉ ᯒᯇ᯲ ᯑᯬᯂᯖᯬ᯲ ᯂᯔᯮ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ
13 Halibutonganki, na hubahen i di ombun, i ma tanda ni padanhu dohot tano on. ᯂᯞᯪᯅᯮᯖᯬᯝᯉ᯲ᯄ᯦ᯪ, ᯉ ᯂᯮᯅᯂᯉᯩ᯲ ᯤ ᯑᯪ ᯀᯔᯬ᯲ᯅᯉᯮ᯲, ᯤ ᯔ ᯖᯉ᯲ᯑ ᯉᯪ ᯇᯑᯉ᯲ᯄ᯦ᯮ ᯑᯬᯂᯖᯬ᯲ ᯖᯉᯬ ᯀᯉᯬ᯲
14 Onpe, molo huparo ombun tu tano on, sai tarida ma halibutongan i di ombun. ᯀᯉᯬ᯲ᯇᯩ, ᯔᯬᯞᯬ ᯂᯮᯇᯒᯬ ᯀᯔᯬ᯲ᯅᯉᯮ᯲ ᯖᯮ ᯖᯉᯬ ᯀᯉᯬ᯲, ᯘᯤ ᯖᯒᯪᯑ ᯔ ᯂᯞᯪᯅᯮᯖᯬᯝᯉ᯲ ᯤ ᯑᯪ ᯀᯔᯬ᯲ᯅᯉᯮ᯲
15 Jadi ingotonku ma padan na hubahen i tu hamu dohot tu nasa na marhosa na mangolu, ro di sude na mardaging, paboa na so pamasaonku be aek na sumar i mangaripashon nasa na mardaging. ᯐᯑᯪ ᯤᯝᯬᯖᯉᯬ᯲ᯄ᯦ᯮ ᯔ ᯇᯑᯉ᯲ ᯉ ᯂᯮᯅᯂᯉᯩ᯲ ᯤ ᯖᯮ ᯂᯔᯮ ᯑᯬᯂᯖᯬ᯲ ᯖᯮ ᯉᯘ ᯉ ᯔᯒ᯲ᯂᯬᯘ ᯉ ᯔᯝᯬᯞᯮ, ᯒᯬ ᯑᯪ ᯘᯮᯑᯩ ᯉ ᯔᯒ᯲ᯑᯎᯪᯰ ᯇᯅᯬᯀ ᯉ ᯘᯬ ᯇᯔᯘᯀᯉᯬ᯲ᯄ᯦ᯮ ᯅᯩ ᯀᯀᯄᯩ᯦᯲ ᯉ ᯘᯮᯔᯒ᯲ ᯤ ᯔᯝᯒᯪᯇᯘ᯲ᯂᯉᯬ᯲ ᯉᯘ ᯉ ᯔᯒ᯲ᯑᯎᯪᯰ
16 Sai bahenonku do halibutongan i tu ombun, asa hubereng ibana marningot padan salelenglelengna binahen ni Debata tu nasa na marhosa na mangolu, tu nasa na mardaging, na di tano on. ᯘᯤ ᯅᯂᯩᯉᯉᯬ᯲ᯄ᯦ᯮ ᯑᯬ ᯂᯞᯪᯅᯮᯖᯬᯝᯉ᯲ ᯤ ᯖᯮ ᯀᯔᯬ᯲ᯅᯉᯮ᯲ ᯀᯘ ᯂᯮᯅᯩᯒᯰᯩ ᯤᯅᯉ ᯔᯒ᯲ᯉᯪᯝᯖᯬ᯲ ᯇᯑᯉ᯲ ᯘᯞᯩᯞᯰᯩᯞᯩᯞᯰᯩᯉ ᯅᯪᯉᯂᯉᯩ᯲ ᯉᯪ ᯑᯩᯅᯖ ᯖᯮ ᯉᯘ ᯉ ᯔᯒ᯲ᯂᯬᯘ ᯉ ᯔᯝᯬᯞᯮ ᯖᯮ ᯉᯘ ᯉ ᯔᯒ᯲ᯑᯎᯪᯰ, ᯉ ᯑᯪ ᯖᯉᯬ ᯀᯉᯬ᯲
17 Dung i ninna Debata ma tu si Noak: On ma tanda ni padan na hupahot tu nasa na mardaging, na di tano on. ᯑᯮᯰ ᯤ ᯉᯉᯪ᯲ᯉ ᯑᯩᯅᯖ ᯔ ᯖᯮ ᯘᯪ ᯉᯬᯀᯄ᯦᯲ : ᯀᯉᯬ᯲ ᯔ ᯖᯉ᯲ᯑ ᯉᯪ ᯇᯑᯉ᯲ ᯉ ᯂᯮᯇᯂᯖᯬ᯲ ᯖᯮ ᯉᯘ ᯉ ᯔᯒ᯲ᯑᯎᯪᯰ, ᯉ ᯑᯪ ᯖᯉᯬ ᯀᯉᯬ᯲
Hamabukon ni si Noak. Bura dohot pasupasu panurirangonna tu angka anakna i 18-29. ᯂᯔᯅᯮᯄ᯦ᯉᯬ᯲ ᯉᯪ ᯘᯪ ᯉᯬᯀᯄ᯦᯲. ᯅᯮᯒ ᯑᯬᯂᯖᯬ᯲ ᯇᯘᯮᯇᯘᯮ ᯇᯉᯮᯒᯪᯒᯝᯉᯬ᯲ᯉ ᯖᯮ ᯀᯰᯄ᯦ ᯀᯉᯄ᯦᯲ᯉ ᯤ ᯘᯔ᯲ᯇᯮᯞᯮ ᯥᯀᯞᯮ – ᯑᯮᯀᯇᯮᯞᯮ ᯘᯪᯀ
III. 18 Ianggo anak ni si Noak, angka na ruar sian parau i, on do: Si Sem, si Ham dohot si Japet. Alai anggo si Ham ama ni si Kanaan do i. ᯤᯀᯰᯎᯬ ᯀᯉᯄ᯦᯲ ᯉᯪ ᯘᯪ ᯉᯬᯀᯄ᯦᯲, ᯀᯰᯄ᯦ ᯉ ᯒᯮᯀᯒ᯲ ᯘᯪᯀᯉ᯲ ᯇᯒᯥ ᯤ ᯀᯉᯬ᯲ ᯑᯬ : ᯘᯪ ᯘᯔᯩ᯲, ᯘᯪ ᯂᯔ᯲ ᯑᯬᯂᯖᯬ᯲ ᯘᯪ ᯐᯇᯖᯩ᯲. ᯀᯞᯤ ᯀᯰᯎᯬ ᯘᯪ ᯂᯔ᯲ ᯀᯔ ᯉᯪ ᯘᯪ ᯄ᯦ᯉᯀᯉ᯲ ᯑᯬ ᯤ
19 Na tolu i do anak ni si Noak, jala sian nasida do rarat jolma i tu sandok tano on. ᯉ ᯖᯬᯞᯮ ᯤ ᯑᯬ ᯀᯉᯄ᯦᯲ ᯉᯪ ᯘᯪ ᯉᯬᯀᯄ᯦᯲, ᯐᯞ ᯘᯪᯀᯉ᯲ ᯉᯘᯪᯑ ᯑᯬ ᯒᯒᯖ᯲ ᯐᯞᯬ᯲ᯔ ᯤ ᯖᯮ ᯘᯉ᯲ᯑᯄ᯦ᯬ᯲ ᯖᯉᯬ ᯀᯉᯬ᯲
20 Dung i dipungka si Noak ma sada porlak anggur, ai paruma do ibana. ᯑᯮᯰ ᯤ ᯑᯪᯇᯮᯰᯄ᯦ ᯘᯪ ᯉᯬᯀᯄ᯦᯲ ᯔ ᯘᯑ ᯇᯒᯬ᯲ᯞᯄ᯦᯲ ᯀᯰᯎᯒᯮ᯲, ᯀᯤ ᯇᯒᯮᯔ ᯑᯬ ᯤᯅᯉ
21 Dung i diinum ma deba anggur i jadi mabuk, gabe dipasalang ibana di tongatonga ni undungundungna. ᯑᯮᯰ ᯤ ᯑᯪᯤᯉᯔᯮ᯲ ᯔ ᯑᯩᯅ ᯀᯰᯎᯒᯮ᯲ ᯤ ᯐᯑᯪ ᯔᯅᯄ᯦ᯮ᯲ ᯎᯅᯩ ᯑᯪᯇᯘᯞᯰ ᯤᯅᯉ ᯑᯪ ᯖᯬᯝᯖᯬᯝ ᯉᯪ ᯀᯉᯮ᯲ᯑᯮᯰᯀᯉᯮ᯲ᯑᯮᯰᯉ
22 Jadi diida si Ham, ama ni si Kanaan, parsaemaraon ni amana, gabe dipaboa ma tu hahana na dua i na di balian. ᯐᯑᯪ ᯑᯪᯤᯑ ᯘᯪ ᯂᯔ᯲, ᯀᯔ ᯉᯪ ᯘᯪ ᯄ᯦ᯉᯀᯉ᯲, ᯇᯒ᯲ᯘᯀᯩᯔᯒᯀᯉᯬ᯲ ᯉᯪ ᯀᯔᯉ, ᯎᯅᯩ ᯑᯪᯇᯅᯬᯀ ᯔ ᯖᯮ ᯂᯂᯉ ᯉ ᯑᯮᯀ ᯤ ᯉ ᯑᯪ ᯅᯞᯪᯀᯉ᯲
23 Dung i dibuat si Sem dohot si Japet sada ulos, jala diampehon tu abaranasida na dua, dung i mardalan pudi ma nasida laho manghungkupi parsaemaraon ni amanasida, bohinasida pe tundal do, asa unang diida parsaemaraon ni amanasida i. ᯑᯮᯰ ᯤ ᯑᯪᯅᯮᯀᯖ᯲ ᯘᯪ ᯘᯔᯩ᯲ ᯑᯬᯂᯖᯬ᯲ ᯘᯪ ᯐᯇᯖᯩ᯲ ᯘᯑ ᯥᯞᯘᯬ᯲, ᯐᯞ ᯑᯪᯀᯔ᯲ᯇᯩᯂᯉᯬ᯲ ᯖᯮ ᯀᯅᯒᯉᯘᯪᯑ ᯉ ᯑᯮᯀ, ᯑᯮᯰ ᯤ ᯔᯒ᯲ᯑᯞᯉ᯲ ᯇᯮᯑᯪ ᯔ ᯉᯘᯪᯑ ᯞᯂᯬ ᯔᯰᯂᯮᯰᯄ᯦ᯮᯇᯪ ᯇᯒ᯲ᯘᯀᯩᯔᯒᯀᯉᯬ᯲ ᯉᯪ ᯀᯔᯉᯘᯪᯑ, ᯅᯬᯂᯪᯉᯘᯪᯑ ᯇᯩ ᯖᯉᯮ᯲ᯑᯞ᯲ᯑᯬ, ᯀᯘ ᯥᯉᯰ ᯑᯪᯤᯑ ᯇᯒ᯲ᯘᯀᯩᯔᯒᯀᯉᯬ᯲ ᯉᯪ ᯀᯔᯉᯘᯪᯑ ᯤ
24 Dung tarjolma si Noak sian mabukna jala diboto na binahen ni anakna sianggian i tu ibana. ᯑᯮᯰ ᯖᯒ᯲ᯐᯞᯬ᯲ᯔ ᯘᯪ ᯉᯬᯀᯄ᯦᯲ ᯘᯪᯀᯉ᯲ ᯔᯅᯄ᯦ᯮ᯲ᯉ ᯐᯞ ᯑᯪᯅᯬᯖᯬ ᯉ ᯅᯪᯉᯂᯉᯩ᯲ ᯉᯪ ᯀᯉᯄ᯦᯲ᯉ ᯘᯪᯀᯰᯎᯪᯀᯉ᯲ ᯤ ᯖᯮ ᯤᯅᯉ
25 Jadi ninna ma: Hona bura ma si Kanaan, jampurut ni angka naposo ni angka hahana ma ibana. ᯐᯑᯪ ᯉᯉᯪ᯲ᯉ ᯔ: ᯂᯬᯉ ᯅᯮᯒ ᯔ ᯘᯪ ᯄ᯦ᯉᯀᯉ᯲, ᯐᯔ᯲ᯇᯮᯒᯖᯮ᯲ ᯉᯪ ᯀᯰᯄ᯦ ᯉᯇᯬᯘᯬ ᯉᯪ ᯀᯰᯄ᯦ ᯂᯂᯉ ᯔ ᯤᯅᯉ
26 Angkup ni didok ma: Pinuji ma Jahowa, Debata ni si Sem, jala naposona ma anggo si Kanaan. ᯀᯰᯄ᯦ᯇᯮ᯲ ᯉᯪ ᯑᯪᯑᯄ᯦ᯬ᯲ ᯔ : ᯇᯪᯉᯮᯐᯪ ᯔ ᯐᯂᯬᯋ, ᯑᯩᯅᯖ ᯉᯪ ᯘᯪ ᯘᯔᯩ᯲, ᯐᯞ ᯉᯇᯬᯘᯬᯉ ᯔ ᯀᯰᯎᯬ ᯘᯪ ᯄ᯦ᯉᯀᯉ᯲
27 Dipararat Debata ma ia si Japet, asa maringan ibana di bagasan undungundung ni si Sem, jala naposona ma anggo si Kanaan i. ᯑᯪᯇᯒᯒᯖ᯲ ᯑᯩᯅᯖ ᯔ ᯤᯀ ᯘᯪ ᯐᯇᯖᯩ᯲, ᯀᯘ ᯔᯒᯪᯝᯉ᯲ ᯤᯅᯉ ᯑᯪ ᯅᯎᯘᯉ᯲ ᯀᯉᯮ᯲ᯑᯮᯰᯀᯉᯮ᯲ᯑᯮᯰ ᯉᯪ ᯘᯪ ᯘᯔᯩ᯲, ᯐᯞ ᯉᯇᯬᯘᯬᯉ ᯔ ᯀᯰᯎᯬ ᯘᯪ ᯄ᯦ᯉᯀᯉ᯲ ᯤ
28 Ia leleng ni si Noak mangolu, dung aek na sumar i tolu ratus limapulu taon do. ᯤᯀ ᯞᯩᯞᯰᯩ ᯉᯪ ᯘᯪ ᯉᯬᯀᯄ᯦᯲ ᯔᯝᯬᯞᯮ, ᯑᯮᯰ ᯀᯀᯄ᯦ᯩ᯲ ᯉ ᯘᯮᯔᯒ᯲ ᯤ ᯖᯬᯞᯮ ᯒᯖᯘᯮ᯲ ᯞᯪᯔᯇᯮᯞᯮᯖᯀᯉᯬ᯲ ᯑᯬ
29 Jadi sia ratus limapulu taon ma sandok umur ni si Noak, dung i mate ma ibana. ᯐᯑᯪ ᯘᯪᯀ ᯒᯖᯘᯮ᯲ ᯞᯪᯔᯇᯮᯞᯮ ᯖᯀᯉᯬ᯲ ᯔ ᯘᯉ᯲ᯑᯄ᯦ᯬ᯲ ᯥᯔᯒᯮ᯲ ᯉᯪ ᯘᯪ ᯉᯬᯀᯄ᯦᯲, ᯑᯮᯰ ᯤ ᯔᯖᯩ ᯔ ᯤᯅᯉ