ᯔᯒ᯲ᯘᯪᯀᯐᯒ᯲ ᯔᯰᯎᯮᯒᯖᯪ᯲ ᯘᯮᯒᯖ᯲ ᯅᯖᯄ᯦᯲ Marsiajar Manggurit Surat Batak

Di zaman digital saonari on molo naeng marsiajar manggurithon surat Batak. Jumolo ma pangke hamuna situs na boi manguba leter Latin gabe leter Batak.
Sian situs i boi ma idaonmuna songon dia do dibahen disi manggurithon.
Dung i mura ma antusanmuna molo naeng manggurit manang mangarongkom pangke surat tangan.
Alai sai adong do na hurang pas di pangguritna i. Denggan ma paboa hamuna tu nampuna situs i asa dipature.

Ina ni surat Batak Toba
Asa mura ingoton ina ni surat Batak i didok ma songon on : aha na rata baoa i mangalapa sada gaja u ya nya.
Jadi 19 do ina ni surat Batak Toba. Alai uju dipatupa kongres kebudayaan Batak Toba na parjolo, ditolopi ma disi asa dipangke ina ni surat ca dohot ka Mandailing.
Molo ditambahon tompi gabe ca dohot ka ma i di Toba.

Uhum dohot padan siingoton
Uhumna anakna mamboan inana. Manang anak ni surat mamboan ina ni surat.
Dipagomos ma uhum i dohot padan. Tung na so jadi inana mamboan anakna. Manang tung na so jadi sada anak ni surat dihapit dua ina ni surat, molo diihuthon tanda pangolat.
Jadi pangolat gabe marondolan jala marhapatean tu anak ni surat.
Asa mura ingotonta uhumna i, dipatudos ma i songon tarombo ni Batak Toba. Anak do siboan tarombo

Ina ni surat I dohot U
Ia ina ni surat I dohot U jongjong sandiri jumujung uluna.
Tung na so jadi tambahonon manang tanda aha pe taho tu na dua ina ni surat i.
Jadi boha do manggurithon sada silbe ni hata molo adong i dohot u di jolona.
Hombar tu si adong do hinsuhinsu ni surat Batak.
Jumolo ma ina ni surat a, dung i diihuthon paninggil dohot anak ni surat.
Molo songon i boha do pamangke ni ina ni surat I dohot U ?
Pangke hamuna ma i uju gabe sada silbe ni hata na dua ina ni surat i.

Paninggil
Di ginjang sabola siamun ina ni surat do peakhononmuna paninggil.
Unang dipeakhon di ginjang ni anak ni surat.
Molo adong na hurang pas di hatorangan na hupasahat di tongosan on, gurithon hamuna ma di kolom komentar na di toru on, mauliate.